San Juan 18 - Diósïri Karakata P´urheepecha Jimbo

Jesusinksï jupikastia

¹ Enga na indeni ambe uandapkia, Jesusi imeri jurhengorherichani jingunksï iurhekua Sedronini parhimespti, ka jurhengorheri jémbecha jingunksï echerirhu ma inchaakuspti enga jima jápka.

² Ka Júdasïjtu, ima enga intsïnharhitpeka, miuspti jima, jimboka Jesusi jurhengorheri jémbechani jinguni mémechani uéntaspka jima tángorheni.

³ Júdasï jimajku niáraspti p'urhejkutichani jinguni, engaksï tátecheri urhejtsïkuticha ka fariseouecha axaapka, erajkutarakuechani jupiarini ka k'ueramu étskutini ka atajpetarakua jupikatini.

⁴ Ka Jesusi, jimboka mítetixapka ambe enga xáni úkorhenchapiringa, kúmaaspti ka kurhamarheani: –¿Néntsï uéksïni?

⁵ Imaksï arhispti: –Jesusini Nasareti anapuni. Jesusi arhiaspti: –Jíska. Júdasïjtu, ima enga intsïnharhitpeka, imecha jinguni jámaxaptia.

⁶ Enga Jesusi arhiapka: “Jíska” tátsepani ísïksï niraspti ka kuarhatserasptiksï.

⁷ Ka ménderu uéntaspti kurhamarheani: –¿Nénijtsï jirinhantaxamki? Ka imaksï ménderu uandani: –Jesusini enga Nasareti anapueka.

⁸ Jesusi arhiaspti ménderu: –Arhiskaksïnia eskani jíska. Ísï jimbo ekajtsïni jíndeni juka p'irani, indechani jurajkua je eskaksï níntaaka.

⁹ Ísï úkorhespti jimboka ima uándaspka: “Eskarini xáni íntsaaka, nóma tsîtaska.”

¹⁰ Jimajku Simoni Pédru tiámu atajpetarakua p'íjpaarhaspti ka táteri jántspirini t'irerkandani anapu kutsïkua kachujpandikuni. Ima jántspiri Málko arhinhasïrempti.

¹¹ Jesusi Pédruni arhispti: –Patsantsï tiámu atajpetarakuani. ¿Andi no itsïmaa imani engarini Táte intskuka?

Jesusinksï Anasini pérakusti

¹² Ka p'urhejkutichaksï imecheri juramuti jinguni márkuksï, tiosïo kuárichani jinguni, Jesusiniksï jupikaspti ka jójkusptiksï.

¹³ Ka urhetaksï Anasio páspti, jimboka ima Kaifasiri tarhampirispka, enga ima uéxurhini k'éri táteni jápka.

¹⁴ Ima Caifasïsï arhiapti judiouechani eska sánderu sésispka eska ma ireteri jimbo ma k'uiripujku uarhipiringa.

Pédru Jesusini no míteni uandasti

¹⁵ Simoni Pédru ka máteru jurhengorheri, Jesusinksï chúxapaxapti. Imani máteru jurhengorherini, k'éri táta mítespti, ka Jesusi jinguni k'éri táto ekuarhu jamberi inchaspti,

¹⁶ ka Pédru uérakua jamukutini pakaraspti. Ima enga mítekatepka, uéraspti ka arhini nanakani enga incharpeni jápka eska jiáretapiringa Pédruni inchani, ka incharaspti.

¹⁷ Ima nanaka enga incharpeni jápka Pédruni ahispti: –¿Andi no t'u ima tatachiri jurhengorheri méski? Ka Pédru uandani: –Nómbe.

¹⁸ Jántspiricha ka tiósïo kuárichaksï kurhikaspti jimboka kánekua ts'irakorhexapka, Pédrujtu imecha jinguni jurhentaxapti.

Tátecheri urhejtsïkuri Jesusini jurhengorhericheri ambe kurhamarhesti

¹⁹ Tátecheri urhejtsïkuri Jesusini jurhengorheri jémbecheri ambe kurhamarhespti, kájtu kurhamarhespti ima ambesï jurhentpeni jápi.

²⁰ Jesusi arhispti: –Ji k'amak'amasï ka iámenduechani japarini uandaska; méntkisï k'umanchekua tángorhentskuarhu ka tiósïo jurhentpeska, jima engaksï iámendu judiouecha tángorhentajka, ka nómbema táparhakuni uandaska.

²¹ ¿Andirinisï jíndeni kurhamarhejki? Imechani kurhamarhea engajtsïni kurhajchaka engani arhiaka; imaksï mítesti ji ambe engani uandaka.

²² K'amaraspti ísï uandani ka tiósïo kuári ma enga jima jápka Jesusini páksanharhikuspti arhiparini: –¿Andirisï tátecheri urhejtsïkurini ísï mókukujki?

²³ Jesusi uandaspti: –Engani ambe ma nósesi uandaka, aiangpe ambe nósesi uandaski; ka ekani sési arhika, ¿Andirinisï atajki?

²⁴ Tátsekua Anasi Jesusini jójkutini Kaifasini axakuspti, imani enga k'éri tátepka.

Pédru ménderu no jiókorhesti eska Jesusini míteska

²⁵ Enga jiniani ísï úkorheni jápka, Pédru anhandetini jurhentaxapti, ka arhisptiksï: –¿Andi no t'u inderi jurhengorheri méski? Pédru no jiókorhespti uandaparini: –Ji nómbe.

²⁶ Tátsekua ménderu tátecheri jántspiri ma, ima enga imani jinguni márkuepka enga Pédru kachundikupka, kurhamarhespti: –¿Andi nókini t'úngenisï jini uéramani inde jinguni exe?

²⁷ Pédru ménderu uéntaspti no jiókorheni, ka t'arhechu jiánimendu ueraspti.

Jesusi Pilatu jinguni péranhasti

²⁸ Jesusinksï Kaifasio uératini juramukuarhu páspti. Eramarhanduesptia. Judiouechaksï no inchaspti juramukuarhu, nóksïnha járhani ka tátsekuaksïnha no úni k'uínchekua páskueri t'ireni.

²⁹ Pilatu uéraspti jima engaksï ima jápka ka arhiaspti: –¿Íni achetintsï ambe arhiparhatasïnki?

³⁰ Imaksï uandaspti: –Enga no nósesi ambe úripiringa, nóksïni juáchepiringa.

³¹ Pilatu arhiaspti: –Pántsï je ka cha arhinharhikuni je néna enga chári juramukua arhijka. Judiouechaksï ménderu uandaspti: –Jucha judiouecha no sésekua jatsiska némani uándikuni.

³² Ka ísï jámani úkorhespti eska Jesusi na uandarini jápka néna enga uarhipiringa.

³³ Pilatu juramukuarhu inchantaspti ka Jesusini uandajpaspti ka kurhamarheni: –¿Jeteru t'u judiouecheri irecheski?

³⁴ Jesusi arhispti: –Chéti jimborinisï ísï kurhamarheni jaki, o jimbokakini máteru nema aianguska.

³⁵ Pilatu arhispti: –¿Andi ji judioueski? Chéti ireta ka tátecheri urhejtsïkurichaksïnisï t'úngeni jíndeni intsïnharhitati. ¿Amberi niátaski andi?

³⁶ Jesusi arhispti: –Jucheti irechekua no ixu parhakpeni anapuesti. Eka ambe jucheti irechekua ixu parhakpeni anapuepiringa, jucheti ireta uarhipepirindia eskani no judiouechani intsïnharhitanhapiringa: Enga úka, jucheti irechekua no ixu anapuesti.

³⁷ Ka Pilatu jiájkani k'óru kurhamarhespti: –¿Ka ísï jámaniri irecheskia? Jesusi arhispti: Jo eskari na uandaka, Irecheska. Ji indeni únisïni andajpenuka ka indeni únisïni juka íni parhakpeni: Eskani xarhataaka ambe enga ísïka. Ne engaksï imani jingunika enga ísïka, kurhajchasïndijtsïni.

³⁸ Pilatu arhispti: –¿Ka ambesï ísïia? Enga ísï kurhamarhepka, Pilatu ménderu uéraspti judiouechani arhiani: –Ji íni achetini nómbema nósesi xékuntasïnga.

Nóksï uékaspti Jesusini jurajkuni

³⁹ Eka úka, chári p'indekua jimbo, jatsiskaksïni páskua jimbo ma jupikatani jurajkucheni: ¿Uéksïntsï eskaksïni judiouecheri irechani jurajkucheaka?

⁴⁰ Ménderuksï uéntaspti uinhachani: –¡Imani nómbe! ¡Barrabasini jurajku! Ka jini Barrabasi sïpajkurha mespti.