San Juan 17 - Diósïri Karakata P´urheepecha Jimbo

Parhakpeni anapuechaksïni nótki mítesïndi

¹ Enga na ísï ambe uandapka, Jesusi erancheparini uandaspti: “Táte iásïstichkia; chéti Uatsïtini k'érikuarhu péra, eskakini ísï jámani indejtu túngeni k'érikarhu péraaka.

² Ka májkueni eskari na juramukua íntskuka iámendu parhakpeni anapuechani jinguni, jiáreta eskajtu úaka intsaani méntku isï anapu irekua imechani engari t'u íntsaaka.

³ Indesï méntkisï anapu irekueti: Eskaksïni t'úngeni míteaka, májku Diósïni engamendu ísïka, ka Jesukristuni engari axaka.”

⁴ “Parhakpenirhukini ji k'érikuarhu péraska, imani ambe úparini engarini t'u axaka úrani.

⁵ Ka iásï, Táte, t'úrini k'érikuarhu péria, chéti ma akandani eskani jiántki uératini na sési jápka enga parhakpeni nótki jamberi jarhempka.”

⁶ “Parhakpeni anapuechani xéraaska na engari jáxeka, imechani engarini t'u íntsaaka. Chétisptiksï ka t'úrini íntsaaska; ka chéti Uandakuanksï kurhandirasti.

⁷ Iásïksï mítetixatiia eska chéti uéjtateska iámu ambe engarini xáni íntskuka;

⁸ jimboka uandakua engarini t'u arhiaka imechani arhiantaaska ka imaksï jiókorhesti ka jánhaskastiksïa eskani sési jimbo t'úngeni uéjtateska, ka jakajkustiksï eskarini t'u axaska.

⁹ Imechani jimbo kómarhaxaka; no parhakpeni anapuechanisïni kómarhijpekuani jaka, imechantku engarini t'u íntsaaka, jimbokaksï chétiska;

¹⁰ ka iámendu juchetichaksï chétisti ka iámendu chétichaksï juchetisti; ka indecheri úkuechani jimbo ji k'érikuarhu péranhaska.”

¹¹ “Ji nóteruni parhakpeni jarhaskia, enga úka indeksï parhakpeni jámaxati, ka ji t'úngeni jinguni k'uanhatsentaxaka. Táte engari auandarhu jaka, chéti jimbo patsakorhea imechani engarini íntsaaka, eskaksï májkueni márku jauaka eskachi jucha na jaka.

¹² Jiájkani engani ji imechani jinguni jámani jápka, ji chéti jimbo eranguasïrempka imechani engarini t'u íntsaapka. Eranguaska ka nóma tsînchekorhesti, imajku enga tsînchekorhekata japkia, ka eska ísï úkorhepiringa eska na karakata jaka.”

¹³ “Ka iásï t'u jinguni k'uanhatsentaxaka, ka parhakpeni uératini uandaxaka eskaksï indejtu iámu tsípeaka eskani ji na tsípejka.

¹⁴ Ji chéti Uandakua aianguaska, ka parhakpeni anapuechaksï kurhunhesïndi imani uandakuechani, jimbokaksï ima uandakuecha no parhakpeni anapueska, májkueni eskani jíjtuni na no parhakpeni anapueka.

¹⁵ Nókini arhixaka eskari parhakpeni p'íjpantauaka, sánderu sánikini arhixaka eskari Nóambakitini kénditakuauaka.

¹⁶ Indeksï no parhakpeni anapuesti, májkueni eskani ji na no parhakpeni anapueka.

¹⁷ Chéti uandakua jimbo míngorheantsï; jimboka chéti uandakua ísïska.

¹⁸ Eskarini t'u jíndeni na parhakpeni axaka, jíjtuni májkueni parhakpeni axaaska.

¹⁹ Ka imechani jimbo jíjtuni t'úngeni aiakorhentaxaka, eskaksï ísï jámani imajtu kaxumbentaaka imani jimbo enga ísïka.

²⁰ No indechani jimbojkusïni kómarhani jaka, imechantuni arhijpekuaxaka engaksï imechani kurhauarini jíndeni míntsikaaka.

²¹ Eskaksï iámendu ima no jurajkperaaka. Májkueni eskachi jucha na no jurhajperajka, eskaksï imajtu májku ambeuaka juchantsïni jinguni, ka eska parhakpeni anapuecha jakajkuaka eskarini t'u axaska.

²² Ji imani k'érikua íntsaaska engarini t'u íntskuka, eskaksï imajtu ísï májkueuaka eskachi jucha na májkueka:

²³ Ji imechani jinguni ka t'u jíndeni jinguni, eskaksï k'amak'amasï májkueuaka, ka eska parhakpeni mítenhaaka eskarini t'u axaska ka eskari májkueni xénhchaaska eskarini jíndeni na xénhchajka.”

²⁴ “Táte, imecha engarini t'u íntsaaka, uéksïnga eskaksï imajtu jima jauaka engani ji jauaka, eskaksï exembeaka jucheti k'érikuani engarini t'u íntskuka, jimbokarini t'uíni xénhchasïrempkia enga parhakpeni jamberi nótki jápka.

²⁵ Táte terujkani anhaxurhiri, parhakpeni anapuechaksïni nótki mítesïndi, k'óru jíkini míteska ka indeksï mítestia eskarini t'u axaska.

²⁶ Ji mítetaraaska ka mítetarauakateruni néskiri, eskaksï ísï jámani indejtu májkueni xénhchperaka eskarini t'u na xénhchaka jíndeni, ka eskani jíjtuni imechani jinguni jauaka.”