San Juan 16 - Diósïri Karakata P´urheepecha Jimbo

¹ Indeni ambeksïni arhixaka eskajtsïni no jámaaka ísku jatini nóteru mintsikani jarhani.

² Tángorhentskuarhuecharhujtsï chúnhantaaka. Ka niáraati jurhiata engaksïni jamberi ataaka uandikuni ka eratseatiksï eskaksï Diósïnisï marhuakuni jaka.

³ Ka ísïksï jámaati jimbokajtsïni Táteni ka jíndeni nótki mítesïnga

⁴ Íni ambeksïni arhixaka, uékani eska enga na niáraaka jurhiata ka ísï úkorheni, eskajtsï miántaaka eskaksïni aianguspkia. “Íni ambeksïni no arhixapka jimbokani cha jinguni jámaxapka.

Espiritu Sántuntsïni axacheati

⁵ Ka iásï imani jinguni niántaxamka engarini axaka, ka nónemarini sáni kurhamarhesïndi ji nani niraxamki;

⁶ jimintsï ménderueni jámsïnga, kánekuajtsï mískorheska engaksïni indeni ambe arhika.

⁷ Ka jíksïni imanisï arhini jaka enga ísïka: Chári jimbo sánderu sésisti eskani ji níntaaka. Jimboka ekani no níntaska, Espiritu Sántu no juuati chánksïni jinguni jarhani; ka ekani ji niraska, jíksïni axacheaka.

⁸ Ka na enga jatini ima juuaka, iámendu parhakpeni anapuechani k'amak'amasï jánhastauati ne enga k'amanharhintstika ka ne enga kaxumbitika ka ne engaksï arhikua jukaka;

⁹ imaksïsï k'amanharhintstiti engajtsïni no mintsikajka;

¹⁰ ka jísïni kaxumbitika, engani Táte jinguni nirani jámka, ka nóterujtsïni exeakia;

¹¹ ka imani enga Diósï arhinharhikukia, íni parhakpeni anapu juramutini, ima k'amanharhiranhantastia.

¹² Uánekua ambeteruksïni arhikuekaxaka, enga úka, iásïjtsï nótki úaka kurhanguni.

¹³ Enga Espiritu na juuakia, ima enga ísïka, imaksïni sési iámu ambe jánhastapaati; jimboka no imeri jimbo uandaaka, jimboka imanisï uandaaka enga kurhauaka, ka imaksïni aianguati ambe engateru jurhani jaka.

¹⁴ Imarini k'érikuarhu péraati, jimboka imani ambe uandaaka engani ji arhiaka.

¹⁵ Juchetisti iámu ambe enga Táte xáni jatsika. Jimboksïnisï arhika eskaksïni imani ambe aianguntaaka engani ji arhiaka.”

¹⁶ “No ióni jimbojtsïni cha nóteru exeni jauakia, ka no ióni jimbojkujtsïni ménderu exeaka.”

Mískorhekua tsípekua úkorhentaati

¹⁷ Ka jurhengorheri jémbechaksï kurhamarhperaspti: –¿Ambesï arhikuekajki? Enga arhijka eskachi no ióni jimbo nóteru exeakia, ka eskachi no ióni jimbojku ménderu exentaaka, ka eska Tátjemba jinguni niraxamka.

¹⁸ ¿Ambe arhikuekajki enga uandajka no ióni jimbojku arhini? Nóchi kurhangusïnga ambesï arhikuekani jaki.

¹⁹ Jesusi jánhaskaspti eskaksï kurhamarhekuekaxapka ka arhiaspti: –¿Kurhamarhperaxakijtsï jíksïni andisï arhi eskajtsïni no ióni jimbo nóteru exeakia ka eskajtsïni ménderu no ióni jimbojku exentaaka?

²⁰ Sési jimboksïni arhixaka eskajtsï ueraska ka eskajtsï p'amondakorheaka, ka parhakpeni anapuechaksï tsípeati. Mískorheakajtsï, enga úka, chári mískorhekua tsípekua úkorhentaati.

²¹ Uarhiti nósesi p'ikuarherasïndi enga sapini kángorheni jámkia; ka enga na sapini kángorhejkia, miripakurhisïndi imani enga p'amerani jápka, xáni tsípeni eska parhakpeni sapi ma andajpenuska.

²² Chájtujtsï iásï nósesi p'ikuarheraxaka, enga úka jíksïni ménderu exentaaka ka chájtsï mintsita jinguni tsípeaka ka chári tsípekuanksïni nónema úati euantani.

²³ “Jiájkantsïni nóteru ambe ma kurhamarheakia. Sésimendu jimboksïnisï arhini jaka: Ambe engajtsï Táteni xáni jucheti jimbo kurhakuska, íntskuatiksïni.

²⁴ Iásï jamberijtsï cha nótki ambe ma jucheti jimbo kurhakuxaka. Kurhajkorhe je ka intsïnhaakajtsï, ka ísï jámantsï k'amak'amasï tsípeaka.”

Parhakpeni jurhaska

²⁵ “Iámendu indeni ambeksïni terukutarantskua jimbo aianguska. Ka jurhiata niáraxatiia engaksïni nóteru terukutaratskua jimbo uandaxecheakia; Táteri ambeksïni méntku jurhimbitku aianguaka.

²⁶ Imani jurhiatekuajtsï jucheti jimbo kurhajkorheaka; ka no arhixaka eskaksïni Táteni ji arhicheaka.

²⁷ Táteksïnisï xénhchakorhejti jimbokajtsïni cha jíndeni xénhchasïnga ka jimbokajtsï jakajkuska eskani ji Diósï uéjtateska.

²⁸ Táteni uéakuska ka parhakpeni jurhaska. Ka iásï ménderuni uéjpentaaka Táte jinguni niántani.”

²⁹ Ka jurhengorheri jémbechaksï arhispti: –Iásï k'óruri jurhimbitku uandaxakaia, ka nóteruri terukutarantskua jimbo undaxakaia.

³⁰ Kurhanguskachia eskari iámendu ambe míteska ka eskari mítetini jarhasïngia amberisï kurhamarhenhaa náuekiksïni nótki ambe ma kurhamarheni jarhani. Indeni jimboksïni jakajkuchesïnga eskari Diósï uéjtateska.

³¹ Jesusi arhiaspti: –¿Mintsikaxakijtsïnia?

³² Jurhiatachka janostia ka iásïstichkia, engajtsï cha táchantku isï etsajkamaaka ka engajtsïni jandiójku jurarkuaka. Eka úka no jandiójku jarhaska, jimboka Táte jíndeni jinguni jarhaska.

³³ Íni ambeksïni arhixaka eskajtsï úaka jíndeni jinguni sési p'ikuarherantani. Parhakpentsï kómu nitamaaka. Eka úka uinhapekorhentsï je: Ji andaskia parhakpeni anapu uinhapekuani.