San Juan 14 - Diósïri Karakata P´urheepecha Jimbo

Jesusi xanharisti Táteni jinguni nirani jamani

¹ “Ásï uandanhea je, Ekajtsï Diósïni mintsikajka jíndentujtsïni mintsika je.

² Jucheti Táteo kánekua ambandesti; enga no ísïpiringa, nóksïni aiangupiringa eskaksïni ambantskaracheni niraxamka.

³ Ka engani na niaraaka ka engaksïni na ambantskaracheakia, junguaka ka pákorheakaksïni, eskajtsï chájtu jima jauaka nani engani ji jauaka.

⁴ Ka jima engani ji nirani jámka chájtsï míteskia xanharini.”

⁵ Tomasi arhispti: –“Tata, nóchi míteska naniri niraxamki, ¿Nénasïni jucha miiuntskaia?”

⁶ Jesusi arhispti: –Ji xanhariska, ka imeska enga ísïka, ka tsípekueska. Nónema andarhentasïndi táteni enga no jíndeni jimboejka.

⁷ Engajtsïni jíndeni mítepiringa, Tátentujtsï mítepiringa; iásï uératintsï míteskia jimbokajtsï xéxaka.

⁸ Felipe arhispti: –Tata, Tátentku engajtsïni exeraska, nóteruchi ambe ma uandaaka.

⁹ Ka Jesusi arhispti: –Felipe, xáni iónistia engani cha jinguni jámaka ka ¿Nótkirini mítesïnki? Jimboka ne engarini jíndeni exerika, Tátentu exeristia; ¿Andirisï útasï uandajki eskaksïni Táteni exeraaka?

¹⁰ ¿Nóri jakajkusïnki eskani ji Táte jinguniska ka eska Táte jíndeni jinguniska? Engani xáni ambe uandajka, no p'itsïkorhesïnga uandani; Táte enga jíndeni jinguni jaka imasï mámaru sési ambe újti.

¹¹ Jakajkuchejtsïni eskani ji Táte jinguniska, ka eska Táte jíndeni jinguni jarhaska. Sikera imani jimbo jakajku je engani xáni ambe úka.

¹² Ísïmenduesti engaksïni arhini jaka: Ne engarini mintsïkaska, imajtu imani ambe úati engani ji újka, ka sánderu k'érati ambeteru úati jimbokani ji tátenisïni andarhentani jámka.

¹³ Ka ji úaka iámendu ambe engajtsï jucheti jimbo kurhajkorheaka, ka eska ísï jámani Uájpani jimbo Táte k'éri ambe arhinhaaka.

¹⁴ Engajtsïni jucheti jakangurhikua jimbo kurhacheska ambe ma, ji iámu ambe úaka.

Jesusi Espiritu Sántuni aiatspesti.

¹⁵ “Ekajtsïni xénhchajka, jucheti juramukuantsï kurhandirakuaka;

¹⁶ ka ji Táteni Espiritu Sántuni kurhakuaka, enga méntkisï cha jinguni jauaka,

¹⁷ Espiritu engamendu ísïka, imani engaksï parhakpeni anapuecha no újka p'irani jimbokaksï no exesïnga ka nójtuksï mítesti. Ka chájtsï míteska, jimboka cha jinguni irekaxaka.”

¹⁸ “Nóksïni uerandi jupindi pakataaka: K'uanhatseaka chánksïni jinguni.

¹⁹ Nóteru ióni jimbojtsïni parhakpeni anapuecha nóteru exeatia, ka chájtsïni k'óru exeaka, jimbokani ji tsípiti jarhaska ka chájtujtsï tsípekua jatsiaka.

²⁰ Ima jurhiatekuajtsï jánhaskaaka eskani ji jucheti Táteni jinguni májkueska ka eskajtsï chájtu jíndeni jinguni májkueska ka jíjtuni chánksïni jinguni májkueska.

²¹ Imarinisï xénhchajti enga jucheti juramukuechani míteaka ka kurhandirakuani; ka ne engarini xénhchaska, jucheti tátejtu xénhchaati; ka jíjtuni xénhchaaka ka xarhakuaka.”

²² Ka Júdasï (máteru Júdasï, no Iskariote) arhispti: –¿Andijtsïnisï juchantsïni xárhachea ka nóri máteru nemechani xarhakuani?

²³ Jesusi arhintaspti: “Ekarini nema xénhchka, kurhandirakuati jucheti uandakuani, ka jucheti Táte xénhchaati ka jucha andarheraaka, ka ima jingunichi irekaaka.

²⁴ Ima engarini no xénhchajka no kurhandirakusïndi jucheti undakuechani. Ka íni uadakua engajtsï kurhani jaka no juchetisti, jucheti Táteristi, ima engarini axaka.

²⁵ Ísïksïni arhixaka engani útasï chánksïni jinguni jaka.

²⁶ K'óru Espiritu Sántu, enga sési arhijpentajka, ka enga Táte, jucheti jimbo axaaka, iámu ambeksïni exeraati ka imani ambeksïni miátantaati engaksïni ji xáni arhikia.

²⁷ Sési jakuaksïni jurajkuchexaka; jucheti sési jakuaksïni jurajkuchexaka. Nóksïni xásï sési jakuasï íntskuni jaka eska parhakpeni anapuecha na jásï sési jakua íntspejka. Ásï uandanhea je ka ásï jáma je chénheni.

²⁸ Kurhariskajtsï engani ji uandaka: ‘Níntaaka ka junguaaka chánksïni jinguni.’ Ekajtsïni xénhchapiringa, chájtsï tsípepiringa engani Táte jinguni níntapiringa, jimboka Táte jíndeni jinguni sánderu k'ériska.

²⁹ Ka ínksïni ambe méntku arhixaka enga nótki úkorheni jaka, ka eskajtsï jakajkuaka enga na ísï úkorheakia.

³⁰ Chánksïni jinguni xántkuni uandaxeakia, jimboka íni parhakpeni anapu Irecha janoxakaia. Ima jíndeni jinguni nóma ambe uinhapekua kámsïndi;

³¹ mítenhe k'óru eskani ji Táteni xénhchasïnga ka eskani imani ambe úsïnga eskarini Táte na juramucheka. Jauara je. Juia je ixu kéndikuni.”