San Juan 13 - Diósïri Karakata P´urheepecha Jimbo

Jesusi jurhengorheri jémbechani jupandukuasti.

¹ Páskueri k'uínchekua andamutani, Jesusi mítetini eska ixu parhakpeni jurhiata janokuspkia uéjpentani ka Táte jinguni níntani, xénhchaaspti parhakpeni anapuechani engaksï imani chúxapempaka, ka k'amarhuni jamberi xénhchaasti.

² Engaksï chúrekueri t'ireni jápka, nóambakiti Júdasï Iskarioteni, Simoni uájpani, p'ikuarhenhetaraspti eska Jesusini intsïnharhitpepiringa,

³ Jesusi míteparini eska Táte iámendu ambe íntskuspka ka eska ima Diósïni jimbosï júpka ka eska ménderu Diósïni jingunisï níntani jámempka,

⁴ jauaraspti jima enga t'ireni jápka, p'iraspti enga tájtsïtatini jápka ka takusï ma jóangorheni.

⁵ Tátsekua urhanirhu ma itsï jatsiraspti ka uénaspti jurhengorheri jémbechani jupandukuani ka imani takusï jimbo kutsundukuantaaspti enga jóangorhetini jápka.

⁶ Enga Simoni Pédruni andarherapka; ima arhispti: “Acha, ¿Nénajturini t'u jupandukua?”

⁷ Jesusi arhispti: “Nótkiri kurhanguaka íni engani ji úni jaka: Tátsekua sánderuri kurhanguakia.”

⁸ Simoni Pédru arhispti: “Nómendurini jupandukuaka.” Jesusi arhispti: “Engakini no jupandukuska nóri jíndeni jinguniuaka.”

⁹ Simoni Pédru arhispti: “Acha, ásïrini jinijku jupanduku jiájkani, jupajkutarini ka jupajtsïtajturini.”

¹⁰ Jesusi arhispti: “Ima enga jikuarini jaka, no uétarhesïndi juparhekorheni, [jupanduntanderkusï uétarhejtia] iámu pímbinhasï jarhasti. Ka chájtsï pímbinharhati jarhaska, enga úka nójtsï iámendu pímbinharhaska.”

¹¹ Mítetixapti ne enga intsïnharhitpepiringa, jimbosï uandapti: “Nójtsï iámendu pímbinharhaska.”

¹² Enga na k'amarapka jupandukuani, xukuparhantaspti, ménderu uaxakantaspti jima enga t'ireni jápka, ka arhiaspti: “¿Kurhanguskijtsï ambeksïnisï úche?”

¹³ “Chájtsïni arhisïnga ‘Jurhentpiri’ arhini, ka ‘Acha’ arhini, ka sésijtsï arhisïnga jimbokani jindeska.

¹⁴ Nájkirukani ji Acheka ka Jurhentpirini jupandukuskaksïni, chájtujtsï jatsiska jupandukperani.

¹⁵ Jimbokaksïni ji uénaxaka exerani, ka eskajtsï chájtu ísï jámaaka eskaksïni ji na kámaka.

¹⁶ Sésesi jimbomenduksïni arhixaka: Jántspiri no sánderu ambesti eska ánchetpiri jémba, ka ánchperata úrijtu no sánderu k'éristi eska ima enga axaka.

¹⁷ Isïjtsï mítetinia, sési ambejtsï íntsïnhaaka engajtsï ísï jámaska.”

¹⁸ No iámendu cha jimbosïni arhini jaka; ji míteaska engani erakuakia; enga úka úkorhenisï úkorheati enga Karakata jaka: Ima enga jíndeni jinguni t'ireni jaka t'auarhekuekaxatirinia.

¹⁹ “Méntkuksïni arhixaka, enga nótki úkorheni jaka, ka jiájkani enga na ísï úkorheakia jakajkuakajtsï eskani Jíska.

²⁰ Sésesi jimbomenduksïni arhixaka: Ne enga jiókorheska imani engani ji axaka jíndenirini jiókorhexati, ka ne engarini jíndeni jiókorheska, jiókorhexati Imani engarini axaka.”

Jesusi uandantasti eska Júdasï intsïnharhitpeaka

²¹ Enga na ísï uandapka, Jesusi uandanheaspti ka uandantaspti: “Sésesi jimbomenduksïni arhixaka eskarini cha ma isï intsïnharhitpeaka.”

²² Jurhengorherichaksï ísku eratperaspti, ka nóksï jánhaskasïrempti nénisï arhini jápi.

²³ Jurhengorheri ma, enga Jesusi sánderu xénhchempka, Jesusini píretini uaxakatixapti.

²⁴ Ka Simoni Pédru nínharhikuspti ka arhini: “Kurhamarhe nénisï arhini jaki.”

²⁵ Ima Jesusini andanharhikueratini kurhamarhespti: Acha, ¿Néua?

²⁶ Jesusi arhispti: “Imeuati ne engani kurhinda kuakarhutakata íntskuska.” Ka enga na atarhutapka, Júdasï Iskariote íntskuspti Simoni uájpani.

²⁷ Ka enga ima ápka Satanasi incharhespti. Jesusi arhispti: “Sóntku u ambe engari úkuekani jaka.”

²⁸ Ka nónema enga xáni jima t'irenhani jánhapka kurhanguspti andisï ísï arhini jápi.

²⁹ Ka jimboka Júdasï tumina patsaripka, máruksï eratsesïrempti eska Jesusi arhikuekaxamempka: “Kókuani pia enga k'uínchekuarhu úrakua kueratani jaka”, o eska no jatsikorherichani sáni ambe íntsaapiringa.

³⁰ Enga na ápkia enga intsïnhapka, uéntapaspti. Ka chúrekuesptia.

Juramukua jimbanhe

³¹ Enga Júdasi na uérapka, Jesusi uandaspti: –Iásïstia enga Acha Uájpa k'érikuarhu péranhaka ka Diósï Imeri jimbo k'éri ambe arhinhasti.

³² Enga Diósï Ima jimbo k'érikuarhu péranhaka, Diósïjtu k'érikuarhu péraati imani, ka sóntkusï k'érikuarhu pérani jámtia

³³ “Jucheti uátsïticha, sánderkusïni cha jinguni jauakia. Chájtsïni jirinhantaaka, ka májkueni eskani judiouechani na arhiaka, eska jima engani ji nirani jámka, chájtsï no úaka nirani, ka chánksïntu májkuenksïni arhixaka.

³⁴ Jimbanhe juramukua máksïni jurajkuchexaka: Eskajtsï xénhchperaaka. Májkueni eskaksïni ji na xénhchkaka, chájtu májkueni xénhchpera je.

³⁵ Ísï jámantsï mítperaaka eskajtsï jucheti jurhengorheriska ekajtsï xénhchperaska.”

Jesusi uandantasti eska Pédru no míteni uandapiringa

³⁶ Simoni Pédru arhispti: –Tata, ¿Andi naniri niraxamki? Jesusi arhispti: –Iásïrini no úaka chúxapani jima engani ji nirani jámka; tátsekuarini chúxapaakia.

³⁷ Pédru arhispti: –¿Andikinisï iásï no ua chúxapani? ¡Ji t'úngeni jimbo jamberi uarhiaka enga ísï k'uaniska!

³⁸ Jesusi arhispti: –¿Ambe, t'u uarhia jíndeni jimbo? Sésesi jimbomendukini arhixaka: T'arhechu nótki jamberi uerani jauati, engarini t'u t'uíni tanimu xanharhi no míteni uandaakia.