San Juan 12 - Diósïri Karakata P´urheepecha Jimbo

Uarhiti ma enga Jesusini p'untsumekua atandukuka

¹ Páskueri k'uínchekua kuímu jurhia andamutani, Jesusi Betania niraspti, jima enga Lásaru irekani jápka, ima enga Jesusi tsítantapka.

² Ka jimaksï chúrekua t'irekua úkuntaspti; ka Marta ambe kéntpeni jámaxapti, ka Lásaru máteruechani jinguni Jesusini pámbexapti t'ireni.

³ Ka Maria ma tsúntsu ambakiti p'untsurhukua p'índitaspti, enga kánekua jukaparhaka, ka Jesusini atandukuspti; ka jauiri jimbo kutsundukuntaspti. Ka p'untsurhukua uinimtakurhantaspti.

⁴ Ka Júdasï Iskariote, enga jurhengorheri jémbepka, ka enga tátsekua Jesusini intsïnharhitpepka, uandaspti:

⁵ –¿Andi no sánderu sésipirini eska inde p'untsumekua ataranhantapiringa, enga sáno ma uéxurhini ánchekorhekata jukaparhaka, ka no jatsikorherichani íntsani?

⁶ Júdasï ísï uandaspti k'óru, no jimboka xáni no jatsikorherichani p'amojkuapiringa, sánderu sáni ísï uandaspti jimboka sïpajkurhespka, ka sïparhukusïrempti jimboka tumina jatakua ima kámani jarhasïrempka.

⁷ Jesusi arhispti: –Isku exe, inderini p'untsumekuani patsachexapti jucheti jántskuarhu uékani úrani.

⁸ Jimbokajtsï no jatsikorherichani méntkisï exeani jauaka, ka jíndenijtsïni no méntku ixu jatsiaka.

Lásaruntuksï uékaxapti atani uándikuni

⁹ Uánekuaksï judiouecha Betania niraspti engaksï mítepka eska Jesusi jini jámaxapka, ka nóksï Jesusintkusï eranhaskani jápti jini exeni, Lásaruntuksï jini uéksïrempti exeni, imani enga Jesusi tsítantapka.

¹⁰ Ísï jimbo, tátecheri urhejtsïkurichaksï uandaspti eskaksï Lásaruntu atapiringa uándikuni.

¹¹ Jimbokaksï Lásarueri tsíntskua jimbo uánekua judiouecha nóteru andaparhakuerasïrempkia ka Jesusinksï jakajkukusïrempti.

Jesusi Jerusaleni niárasti

¹² Uánekua niáranhaspti Jerusaleni páskueri k'uínchenhani, ka pauandekuarhu enga na mítekorhepka eska Jesusi iretarhu niárapiringa,

¹³ pímu jupikatini ninhaspti kúmanhani, ka uinhachanhasïrempti: –¡Kuájchakujtsïni! ¡Inde újchakurakatesti enga Acheri jakangurhikua jimbo jurhani jaka, enga israelicheri Irecheka!

¹⁴ Ka Jesusi ch'anchaki sapichuni ma xéntaspti ka jataspti, eska karakatarhu na arhijka:

¹⁵ “Sioni ireta, ásï che; xe chéti Irecha jurhaxatiia ch'anchaki sapichuni ma jatapuni”

¹⁶ Uénani jámanksï jurhengorhericha indeni ambe no kurhangusïrempti, tátsekua k'ória, enga Jesusi na k'érikuarhu péranhapkia, jiájkanksï míantasptia eska imanisï arhimpka, ka eska iámendu ambe engaksï xáni úkupka, karakata jarhaspkia.

¹⁷ Ima engaksï xáni exepka enga Jesusi Lásaruni ióarhintapka tsítantani, uandantasïremptiksï.

¹⁸ Jimbojtusï uéranhapti Jesusini kúmanhani, jimbokaksï kurhajchpespka eska imasï ísï ambe xarhatapka.

¹⁹ Ka fariseouechaksï k'óru arhijperaxapti: –Xéxakijtsïa eskachi ísï nómbema andaaka. Exe je ¡Iámenduechaksïsï chúxapajtia!

Grieguechaksï máru Jesusini jirinhantaxapti

²⁰ Máruksï griéguecha Jerusaleni karhamaspti k'uínchekuarhu Diósïni k'éri ambe arhini.

²¹ Imaksï Felipeni andarheraspti, Betsaida Galilea anapuni, ka kómuarhisptiksï: –Tata, uéksïngaksï Jesusini uandaxekuni.

²² Felipe, Andresïni niraspti aianguni; ka tátsekuaksï márku, Jesusini aianguntaspti.

²³ Jesusi arhiaspti: –Janostia jurhiata enga Acha Uájpa k'érikuarhu péranhaaka.

²⁴ Sési jimboksïni arhixaka, eska eka ma erhakua tríju no echerindu andatseraska ka tsïuantani, ísku pakaraati; ka eka tsïuantaska, uánekua jukantaati.

²⁵ Nema enga tsípekuani jukari xénhchakorhejka, sánderu sóntku uarhisïndi; ka nema enga íni parhakpenirhu imeri tsípekuani no xáni xénhchajka, méntku isï anapu tsípekua jatsiati.

²⁶ Engarini nema uéjka marhuacheni, chúxapuerini, ka nani engani ji jauaka, jucheti jarhojpiri jima jauati. Ekarini nema marhuacheaka, Táte, k'éri arhiati.

Jesusi uandantasti eska uarhiakia

²⁷ “Kánekua nósesi p'ikuarhenhexaka. Ka ¿Ambesïni uandaia? ‘¡Táte, iásïrini kuájpentsï!’ ¡Ka ambesïni úni juki andi jiájkani!

²⁸ Táte, chéti jakangurhikua k'érikuarhu péra.” Jimajku auandarhu kurhanchekorhespti: “K'érikuarhu péraskia ka ménderuni k'érikuarhu péraaka.”

²⁹ Enga xáni jima janhapka ka engaksï kurhapka uandasïremptiksï eska piritaspka. Máteruksï uandasïrempti: –Ánjeli másï uandajpati.

³⁰ Jesusi arhiaspti: Inde enga kurhanchekorheka no jíndeni jimbosï juti, sánderu sáni chári jimbosï juti.

³¹ Iásïstia engaksï parhakeni anapuecha arhinharhikunhaaka; iásï parhakpeni anapu juramuti petajpanhantaatia.

³² Ka jiájkani engani ji echerindu uératini tarhatanhaaka, iámu jíndeni jinguni antsitpeaka.

³³ Inde uandakua jimbo jánhastpexapti néna enga uarhipiringa.

³⁴ Ka imaksï arhispti: “Jucha juramukua karakata jimbo míteska eska Erakukata nómeni uarhisïnga. ¿Néna jimborisï arhijki eska uétarhesïnga eska Acha Uájpa tarhatanhaaka? ¿Néski ima Acha Uájpa?”

³⁵ Jesusi arhiaspti: “Sónderku, nóteru iónia, eramarhandekua cha jinguni jámaxati. Xánhara je iásï engajtsï útasï eramarhandekuani jatsika, eskaksïni no pájpakandekua andanguaka; ne enga pájpakandu xanharajka, no mítesti nanisï nirajki.

³⁶ Engajtsï útasï eramarhandekuani jatsika jakajkuku je, ka eramarhandekuajtsï uájpeuaka.” Enga na ísï uandapka, Jesusi jarhareaspti ka jirikorhekuani.

Nóksï úsïrempti jakajkukuni

³⁷ Ka nóksï jakajkukusïrempti, náuejki xáni k'érati ambe xarhatakuapka;

³⁸ ka ísï jámani úkorhexapti eska Diósïri uandari Isaiasï na uandarini jápka: Acha, ¿Ne ka néjtsïni juchari aiangperakuani jakajkucheski? Ka ¿Ne ka ne Acheri uinhapekua exeranhaski?

³⁹ Ka nóksï úsïrempti jakajkuni, jimbokajtu Isaiasï uandaspka:

⁴⁰ Pátenharhitaasti, mintsita chuperakuasti; eskaksï no úaka exeni, ka eskaksï no úaka mintsita jinguni kurhanguni, ka nóksï jimbanhentani, ka ji ambakerantaani.

⁴¹ Isaiasï ísï uandaspti jimboka exekuspka t'íntskua ka jimbosï imeri ambe uandapti.

⁴² Ka náuejkiksï máru juramutipka, uánekuaksï jakajkukuspti, k'óruksï fariseuechani chérheani no uandantasïrempti jimbokaksï jámapiringa tángorhentskuarhu petanhantani.

⁴³ Ka jimbokaksï sánderu xénhchaspka eskaksï parhakpeni k'éri ambe arhinhaaka, eska Diósï k'éri arhiani.

Ne engarini mintsikajka, imanisï mintsïkajti engarini axaka

⁴⁴ Jesusi uinhachaspti uandani: “Ne engarini mintsikajka, nórini jíndenisï mintsïkajti, imanisï mintsïkajti engarini axaka;

⁴⁵ ka ne engarini jíndeni exejka, imanisï exejti engarini axaka.

⁴⁶ Ji eramarhendekueska, parhakpeni jurhaska eskaksï iámendu ima engajtsïni míntsïkaska nóteru pájpakandu jámaakia.

⁴⁷ Enga nema jucheti uandakuechani kurhauaaka ka no úraani, ji nómbema arhisïnga, jimbokani no arhianharhikpenisïni juka, p'ímutpenisïni juka.

⁴⁸ Nema engarini no jiókorhejka ka nójtu jiókorheni jucheti uandakuechani, jatsikorhestia ne enga arhinharhikuaka: Jucheti uandakua arhinharhikuati parhakpeni k'amarhuni jámani

⁴⁹ jimbokani no jucheti jimbosïni uandaka, Táterinisï axati, ka imarini arhisti ambesïni arhijpea ka uandani,

⁵⁰ ka ji míteska eska imeri juramukua méntkisï anapu tsípekueska. Ísï jimbo, ambe engani ji uandajka ísï uandasïnga eskarini jucheti Táte na arhirini jaka.”