San Juan 11 - Diósïri Karakata P´urheepecha Jimbo

Lásarueri tsíntskua

¹ P'amenchati ma jarhaspti enga Lásaru arhinhempka, Betania anapuespti, jima engajtuksï Maria ka Marta anapuepka.

² Ima Maria, enga Lásarueri pípa jémbepka, imasï Achani p'untsumekua atandukupti ka imajtusï jauiri jimbo kutsundukuntapti.

³ Ka imaksï Lásarueri pípa jémbecha Jesusini arini uandakua axakuspti: –Acha, chéti p'íchpiri enga t'u xáni xénhchajka p'amenchaxati.

⁴ Enga Jesusi aiangunhapka, uandaspti: –Ima indeni p'amenchakua jimbo no uarhiati, ka sánderu sáni, marhuauati eska Diósïri uinhapekua xarharaaka, ka eska ísï jámani Diósï uájpa k'éri xénhaaka.

⁵ Jesusi Mártani ka jingunekua jémbani ka Lásaruni kánekua xénhchaasïrempti.

⁶ Na uéjki mítepka eska Lásaru uarhixapkia jima pakaraspti máteru tsimani jurhia.

⁷ Tátsekua arhiaspti jurhengorheri jémbechani: –Ju je ménderu Judea.

⁸ Ka jurhengorheri jémbechaksï arhispti: –Jurhentpiri, nájkichka iásï no ióni andi engaksïni judiouecha tsakapkuerani uékani jápka, ¿Andirisï ménderu uéjki jini nirani?

⁹ Jesusi arhiaspti: –¿Andi no ma jurhiatekua erajkukorhesïnki? Jimboka ma nómbema úkorhenchasïnga enga jurhiakua jámaaka, jimboka íni parhakpeni anapu t'ímarhandekua erajkutarasïnga;

¹⁰ k'óru enga nema chúrekua jámka, ambe ma úkorhenchasïndi jimboka íni parhakpeni anapu t'ímarhandekua no ima jinguni jarhaska.

¹¹ Tátsekua uandasptiteru: –Juchari p'íchpiri Lásaru k'uíxati, ka niuaka tsínharhitani.

¹² Jurhengorheri jémbechaksï arhispti: –Tata, eka k'uíni jaka, jimajkani arhikuekasïndi eska ambakentaakia.

¹³ Jesusi arhiakuekaxamempti eska Lásaru uarhispkia, ka jurhengorheri jémbechaksï ísï kurhanguspti eska k'uíkuanisï arhini jápka.

¹⁴ Jiájkani k'óru Jesusi k'amak'amasï arhiaspti: –Lásaru uarhistia.

¹⁵ Ka tsípexaka engani no jima jápka, jimboka chári jimbo sánderu sésiska, eskajtsï ísï jámani jakajkuaka. Jútkiru je exenia.

¹⁶ Ka ima Tomasi engaksï Dídimusï arhimpka, arhixapti máteru jurhengorherichani: –Ju je juchajtu Jesusi jinguni uarhini.

Jesusi tsíntskuesti ka tsípekuesti

¹⁷ Niáratini mítespti eska t'ámu jurhiauespkia enga Lásaru jatsinhantapka.

¹⁸ Betania Jerusaleni no iauani jarharetinispti, tanimu (3) kilometru isï;

¹⁹ ka uánekuaksï judiouecha niraspti Mártani ka Mariani p'urhembeni, kurhambeantaani enga erachi jémba uarhipka.

²⁰ Enga Marta mítepka eska Jesusi niáraxapkia, niraspti kúmani; ka Maria jéngorhespti.

²¹ Marta Jesusini arhispti: –Acha, ekari ixu japiringa jucheti erachi no uarhipirindi.

²² Kóruni míteska eskakini Diósï kurhajchaaka eskari xáni ambe kurhakuska.

²³ Jesusi arhispti: –Chéti erachi tsíntaati.

²⁴ Marta arhispti: –Jo, míteskia eska jiájkani tsíntaaka engaksï uarhiricha tsíntaaka, jiájkani engaksï jurhiakuecha k'amarhuaka.

²⁵ Jesusi jima arhispti: –Ji tsíntskueska ka tsípekueska, ne engarini mintsikaaka, náuejki uarhini, tsipekua jatsiati;

²⁶ ka ne enga nótki uarhijka ka mintsikanirini, nómeni uarhiaati. ¿Jakajkusïndi isï?

²⁷ Marta arhispti: –Jo, Acha, jakajkusïnga eskari t'úsï Krístueka, Diósï Uájpa, ima enga jupiringa.

Jesusi Lásaruni uekusti

²⁸ Enga na ísï uandapkia, Marta niraspti Mariani p'irani, imeri jingunekua jémbani, ka arhindikuspti: Jurhentpiri ixu jarhasti ka uandajpaxatikini.

²⁹ Ísï kurharini, Maria jauarapaspti ka nirani Jesusini uandaxekuni.

³⁰ Jesusi nótki inchaakusïrempti iretarhu; jima jarhaspti útasï enga Marta kúpka.

³¹ Engaksï Mariani erangupka eska k'uaniramaska, judiouecha engaksï jima jápka pámbetani chúngumasptiksï, jimbokaksï ísï eratsespka eska ima uandatsekorheni niraxamempka jima enga uarhiri jatsinhantapka.

³² Enga Maria andarherapka Jesusini, tinguixurhikuspti uandaparini: –Acha, jucheti erachi no uarhipirindi engari t'u ixu japiringa.

³³ Enga Jesusi exepka eskaksï Maria ka judiouecha engaksï ima jinguni niárapka uéraxapka, kánekua p'ikuarhenhespti ka p'amojkuani,

³⁴ ka kurhamarheaspti: –¿Nanijtsï jatsintaski? Ka imaksï arhispti: –Acha, jútkiru exenia.

³⁵ Ka Jesusi ueraspti.

³⁶ Ka judiouechaksï uandaspti: –¡Xe na enga xáni kánekua xénhchempka!

³⁷ Enga úpka, máruksï uandasïrempti: –I enga pátenharhini éskataraka, ¿Andisï nómbema u eska Lásaru no uarhipiringa?

Lásaru tsíntasti

³⁸ Jesusi útasï kánekua p'ikuarheraparini andamukueraspti jima enga jatsintskata jápka, enga tsakapu jimbo míkakata jápka.

³⁹ Ka uandaspti: –Kéndita je tsakapuni. Marta, Lásarueri pípa jémba uandaspti: –Acha, nósesi jájkundixatiia jimboka t'ámu jurhiakueskia enga uarhika.

⁴⁰ Jesusi arhispti: –Nájkikini arhia andi eskari exeaka Diósïri k'érikuani ekarini mintsikaska.

⁴¹ Tsakapunksï kénditaspti, ka Jesusi erancheparini uandaspti: –Táte, diósmaiamukini arhixaka engarini kurhaka.

⁴² Mítetixaka eskarini méntku isï kurhasïnga, enga úka, íchani jimbosïni uandani jaka engaksï ixu jaka, eskaksï jakajkuaka eskarini t'u axaska.

⁴³ Enga na k'amarapka ísï uandani, uinhachaspti: –¡Lásaru, uéndikuntsï!

⁴⁴ Ka uarhiri uéndikuntaspti, irhirhitakata ka takusï ónharhitakata. Jesusi arhiaspti: –Kuerantsï je ka jurajku níntani.

Arhijperasptiksï néna Jesusini jupirkorheni

⁴⁵ Ísï exerinksï, uánekua judiouecha engaksï Mariani pámbetani jápka jakajkukuspti.

⁴⁶ Ka máruksï fariseouechani niraspti aianguani ambe engaksï exepka enga Jesusi úpka.

⁴⁷ Ka fariseouechaksï ka táta urhejtsïkurichaksï k'éri tángorhekua jatsipti, ka uandasptiksï: –¿Nénachisï jámaia? Ima acheti uánekua ambe xarhataxatiia.

⁴⁸ Engachi ísku exeni jauaka, iámenduechaksï úndaatia jakajkukuni, ka rómecheri juramuticha jamberijtsïni juuatia juchari tiósta pímbinhasïni ka juchari iretani xerechentani.

⁴⁹ Ka Kaifasi, enga ima uéxurhini tátecheri juramutini jápka, arhiaspti: –Chájtsï nómbema míteska,

⁵⁰ níjtujtsï jánhaskajki eska sánderu sésiska eska ma achetijku uarhiaka iámu ireteri jimbo, ka no eska iámendu ireta k'amantskanhaaka.

⁵¹ Ka Kaifasi no ísku jatinisï ísï uandapti, ísï uandaspti jimboka ima uéxurhini ima juramukuaxapka tátechani, Diósïni jimbosï uandapti eska Jesusi iámu iretani jimbosï uarhipiringa;

⁵² ka no ima iretani jimbojku uarhipirindi, imani jimbojtu uarhipirindi eskaksï májkuentaaka iámendu Diósï uájpecha engaksï etsandurikata jámani jápka.

⁵³ Jimboksïsï jiájkani arhijperapti eskaksï Jesusini atapiringa uándikuni.

⁵⁴ Jimbosï Jesusi judiouechani nóteru xarhakuauemptia, ka kéndikukuaspti ka jimesï niraspti enga nónema irekaka, iretarhu ma enga Efraini arhinhajka. Jurhegorheri jémbechani jinguni jima jarhaspti.

⁵⁵ Judiouecheri páskueri k'uínchekua andamutaxaptia, ka uánekuaksï urhepaspti Jerusaleni karhamani pímbinhaxentskueri p'indekua úni.

⁵⁶ Jesusinksï jirinhantaxapti ka tiósïoksï kurhamarhperasïrempti: –¿Cha na uandasïnki? ¿Arhitki juuaia k'uíncheni, o nómbe?

⁵⁷ Fariseouecha, ka táta urhejtsïkurichaksï arhijpetixapti eska ne enga Jesusini exepiringa, eska uandantapiringa ka eskaksï ísï jámani úpiringa jupirkorheni.