San Juan 1 - Diósïri Karakata P´urheepecha Jimbo

Uénatarakua

¹ Uénantki jámani jarhasptia Uandakua, ka Uandakua Diósï jinguni jarhaspti, ka Uandakua Diósïspti.

² Ima, uénani jámani Diósï jinguni jarhaspti.

³ Iámu ambe ima jimbo kueraanhasti; nómbema no ima kueraasti.

⁴ Tsípekua ima jinguni jarhaspti, ka tsípekua parhakpeni anapuecheri eramarhandekuesti.

⁵ Ima eramarhandekua pájpakandu t'íntskarasïndi ka pájpakandekua no ústi andani.

⁶ Jurhaspti acheti ma, enga Diósï axaka, enga Juánu arhinhajka.

⁷ Inde eramarhandekueri ambe jurhasti xarhatani, uandantani eska jupiringa, ka eska iámendu jakajkunhapiringa imani jimbo enga ima uandempka.

⁸ Juánu no eramarhandekuespti, ima eramarhandekueri ambesï juti xarhatani ka uandantani.

⁹ Ambakiti eramarhandekua enga iámu parhakpeni anapuechani erajkutajka, íni parhakpeni andajperaxamempti.

¹⁰ Ima enga Uandakueka parhakpeni jarhaspti, ka náuejki enga parhakpenini ima kueraaka, parhakpeni anapuechaksï no mítentasti.

¹¹ Imeri iretarhu jurhasti ka ima engaksï imerika nóksï jiókorhesti.

¹² K'óru, imechani engaksï jiókorheka ka engaksï jakakuka, íntsaasti sésekua eskaksï úaka Diósï uájpeni.

¹³ Ka Diósï uájpestiksï, no jimbokaksï ísï andajpenuka, ka níjtu jimboka k'uiripu erakuaska, sánderu sáni, jimboka Diósï kuerauaska.

¹⁴ Ima enga Uandakueka parhakpeni anapu úkorhesti ka jucha jinguni irekaspti. Ka imeri t'íntskuachi xériskia, enga tátjemba íntskuka, jimboka imajkusï Diósï Uájpeka, engamendu k'amak'amasï sésika eska néka ka enga xénhchpirika.

¹⁵ Juánu uandantaspti Jesusiri ambe, uandaparini: “Ínisïni arhimpka engani uandapka eska ima engarini chúxapuni jaka sánderu k'éri ambeska jíndeni jinguni, jimboka ima jíndeni jinguni t'uínispkia.”

¹⁶ Jimboka ima xáni jatsïkorheska, auandarhu anapu jatsikorhekuechantsïni kóndeasti;

¹⁷ jimboka Moisesi íntspeska juramukuani, k'óru, xénhchperakua ka ima ambe enga ísïka Jesukristu xárhatasti.

¹⁸ Nónema exesti Diósïni, nómeni; Uájpajtsïnisï mítetarati, enga Tátjemba jinguni májkuentatini jaka, Ima mítetarpesti.

Juánu Itsï atajtsïkpiri Jesukristueri ambe uandantasti

¹⁹ Engaksï judiouecheri urherukuticha, tátechani ka lebitechani Jerusaleni uératini axaapka, eskaksï nipiringa Juánuni kurhamarheni ima néspki,

²⁰ Juánu k'amak'amasï uandakorhentaspti. –No jísïni Krístueka.

²¹ Ménderuksï uéntaspti kurhamarheni: –¿Ka andi jimajkani t'u néski? ¿Eliasï Diósïri uandariskiri? Juánu uandaspti: –No imeska. –Jimajkani, ¿Diósïri uandariskiri engachi erokani jaka? Ima uandaspti: –Nómbe.

²² Ka arhisptiksï ménderu: –¿Néskichkari? Jucha jatsiska aianguani imani engajtsïni axaka. ¿Ambejtsïni sáni ua aianguni chéti ambe?

²³ Juánu arhiaspti: –Jíska engani jimesï uinhachajka enga nónema irekaka: Achani jurhimbentskakuntsï je, ísï eska Isaiasï Diósïri uandari na uandajka.

²⁴ Ima engaksï fariseouecha axaapka Juánuni uandaxekuni,

²⁵ kurhamarhesptiksï: –Engachkari no Krístueka, níjturi Eliasïni, ka níjturi Diósïri uandarini, ¿Andirisï itsï atajtsïkpejki?

²⁶ Juánu arhiaspti: –Ji itsï jimbo itsï atajtsïkpexaka; k'óru cha jinguni jámaxati ma engajtsï cha no míteka

²⁷ engarini chúxapuni jaka, enga jíndeni jinguni t'uínipkia, engani ji no jamberini nitatarheka kuarhachichani kuerandukuani.

²⁸ Iámu i ambe Betania úkorhespti, Jordani iurhekuarhu parhikutini, jima enga Juánu itsï atajtsïkpeni jápka.

Jesusi, Diósïri Karichi

²⁹ Pauandekuarhu, Juánu exespti Jesusini eska andarheraxapka, ka uandaspti: “¡Exe je, indesï Diósïri Karichiti, enga k'amanharhintskuechani euarhpeantajka!

³⁰ Indenisïni arhimpka engani uandapka: ‘Ima sánderu k'éri ambesti jíndeni jinguni engarini chúxapuni jaka, jimboka ima t'uínispkia jíndeni jinguni.

³¹ Jíjtuni no mítespka néspki; k'óruni itsï atajtsïkpepuska, eska ísï jámani Israeli ireta míteaka.’ ”

³² Juánu itsï atajtsïkpiri uandasptijtu: “Exeska Espiritu Sántuni kétseni jarhani jipunhini jásï ma, ka indeni andajtsïkuerani.

³³ Ji nótkini mítesïrempka néspki; ka ima engarini axaka itsï jimbo itsï atajtsïkpeni, arhistirini: ‘Néni engari exejka eska Espiritu andajtsïkueraska imasï Espiritu Sántuni jimbo itsï atajtsïkpejti.’

³⁴ Ji exeskia ka uandantaxaka eska Diósï uájpeska.”

³⁵ Pauandekua, Juánu ménderu jima jarhaspti, máteru tsimani jinguni, engaksï márku jámempka.

³⁶ Enga eranguerapka Jesusini jimesï nitamani, Juánu uandaspti: –¡Exe je, inde Diósïri Karichisti!

³⁷ Imaksï tsimani engaksï Juánu jinguni jámani jápka, kurhajchasptiksï ka chúxapasptiksï Jesusini.

³⁸ Jesusi eraparhasti, ka enga exepka eskaksï chúxapaxapka kurhamarheaspti: –¿Ambejtsï jirinhantasïnki? Imaksï arhispti: –Jurhentpiri, ¿Naniri irekaski?

³⁹ Jesusi arhiaspti: –Ju je exeni. Nirasptiksï, ka exesptiksï nani enga irekapka, ka jimaksï pakaraspti imani jinguni, jimboka xatinispkia.

⁴⁰ Ima ma isï Andresïspti, enga Juánuni kurhajchapka, Simoni Pédrueri erachi jémba.

⁴¹ Andresï imeri erachi jémbani urheta xéntaspti, Simonini, ka arhispti: –Xéntaskachia Mesiasini, (enga Krístu, arhikuekajka.)

⁴² Tátsekua Andresï jima páspti enga Jesusi jápka; ka enga Jesusi exepka, arhispti: –T'úri Simoniska, Juánu uájpa, ka iásïri Séfasi arhinhaakia (enga Pédru arhikuekajka, ka Pédru tsakapu arhikuekasïndi).

Jesusi Felipeni ka Natanelini uandajpaaspti

⁴³ Pauandekuarhu, Jesusi eratsespti Galilea isï nirani. Felipeni jima xéntaspti ka arhini: –Chúxapurini.

⁴⁴ Ima Felipe, Betsaida anapuespti, jima engajtu Andresï ka Pédru anapuepka.

⁴⁵ Felipe, Natanaelini niraspti jirinhantani, ka arhispti: –Xéntaskachi imani enga Moisesi juramukuarhu arhijka, imani engaksï Diósïri uandarichajtu karaka. Jesusini, Jose uájpani, Nasareti anapu.

⁴⁶ Natanaeli uandaspti: –¿Andi ua Nasareti nema sáni ambakiti ambeni uérani? Felipe arhispti: –Ju exekorheni.

⁴⁷ Enga Jesusi exepka eska Natanaeli andarheraxapka, uandaspti: –Ambakitimendu Israeli uájpa ma jurhaxati.

⁴⁸ Natanaeli kurhamarhespti: –¿Nénarini jámani mítespkia? Jesusi arhispti: –T'uínkini xéspkia engakini Felipe nótki jamberi uandajpani jápka, engari jígusïrhu jandukutini jápka.

⁴⁹ Nataneli arhispti: –Jurhentpiri, ¡T'úri Diósï Uájpeska, t'úri Israeliri Irecheska!

⁵⁰ Jesusi arhispti: –¿Andi imani jimbojkurini jakajkuchexaki engakini arhika eskakini jígusïrhu jandukutini exespka? Sánderuri k'éri ambeterurisï exeaka.

⁵¹ Jesusi uandasptijtu: –Sési jimboksïnisï arhini jaka, eskajtsï iásï uératini cha auandani mítakorhetini exeaka, ka Diósïri ánjelichantsï exeauaka engaksï kétseni ka karhanchentani jauaka Acha Uájpani andarhentani.