Hechos 5 - Diósïri Karakata P´urheepecha Jimbo

Ananiasïksï Safira jinguni k'amanharhintasti

¹ Ka acheti ma enga Ananiasï arhinhempka ka imeri uarhiti Safira arhinhasïrempti, echeriksï ma atarantaspti,

² ka tumina engaksï maiamunhapka, p'ikurhukusptiksï. Ka enga xáni pákarani jápka Jesusiri uandakua párichanksï pákuaspti.

³ Ka Pédru arhispti: –Ananiasï, ¿Andirisï jurajkutakorhe eskakini nóambakiti mintsitani manatachepiringa, ka ísïri Espiritu Sántuni chkuándirakuni engari tuminani engari echeri jimbo maiamunhaka sáni arhutakorheka?

⁴ ¿Andi echeri no chétispki? Ka engari atarantaka, ¿Tumina no chétiski? ¿Andirisï mintsitarhu íni ambe pérakorhe? ¡Nóri k'uiripunisï chkuándirakuka, Diósïndisï chkuándirakuka!

⁵ Ananiasï íni uandakuechani kurharini uarhipaspti. Ka ima engaksï xáni íni ambe kurhapka uárhixaptiksï xáni chéni.

⁶ Ka tumbichaksï jauaraspti, takusïksï irhiirhitaspti ka pántasptiksï jatsintani.

⁷ No ióndaspti Ananiasïri uarhiti inchantani no mítetini ambe enga úkorhepka.

⁸ Ka Pédru arhispti: –Arhirini, ¿Sési jimbojtsï cha xáni jimbo atarantaski echerini eskajtsïni na arhika? Ka ima uarhiti mókukuntaspti: –Jo, xáni jimbo.

⁹ Ka Pédru arhispti: –¿Andijtsïsï cha pákatpera Acheri Espirituni ts'éjku? Exea, janunguaxatiksïa inde engaksï chéti achetini pántaka jatsintani ka iásïksïni t'úngeni pántaatia.

¹⁰ Safirajtu jimajku uárhispti Pédruni japarini. Engaksï tumbicha niántapka t'uini uarhirixaptia, ka uámba jingunksï pántaspti játsintani.

¹¹ Iámendu engaksï tángorhentatini jápka, ka ístuksï ima engaksï íni ambe kurhajchpepka uárhisïremptiksï xáni chéni.

Uánekua míndecha ka milagruecha

¹² Ka Jesusiri uandakua párichaksï iretarhu uánekua Diósïri míndechani ka milagruechani úasïrempti. Ka iámenduechaksï Salomuniri jájchukurini májku mintsita jinguni tángorhentatini jarhasïrempti.

¹³ Ka máteruechaksï no tékaasïrempti imecha jingunini nájkiruka iretarhu imecheri ambe sési ambe uandanhempka.

¹⁴ Ka sánderuksï uánexapti acheticha ka ístu uarhiticha engaksï Achani mintsikempka.

¹⁵ Xáni ísï engaksï p'amenchatichani jámberi xánharu pétauauempka k'uirakuarhu péraani, ka enga Pédru jimesï nitamapiringa eska parhijchakuapiringa náuejki k'umandajku.

¹⁶ Ka Jerusaleni ísku anapuechaksï jamberi nirasïrempti p'amenchatichani páani, ka imechani engaksï espiritu nósesi járhaticha jupiantauempka, iámenduksï ambakeranhantasïrempti.

Jesusiri uandakua párichanksï uékaspti jupiani

¹⁷ K'éri táta ka saduseuecha engaksï ima jinguni jápka, Jesusiri uandakua párichanksï epurheaxapti,

¹⁸ ka jupiasptiksï ka k'ataperakuarhuksï incharaaspti.

¹⁹ K'óru chúrekua Acheri ánjeli ma k'ataperakuarhu mítakuaspti, ka enga na petantaapka arhiaspti:

²⁰ “Ni je tiósïo ka tsípikueri aiangperakuechani uandantsï je.”

²¹ Imaksï íni ambe kurhaarini, k'éri tiósïoksï tsípku inchaspti ka p'íarasptiksï jurhentpeni. Ka niárasptiksï k'éri táta ka ima engaksï ima jingunipka, ka k'éri tángorhekuanksï ka ístu iámendu achamasï Israeli anapuechanksï uandajpantaaspti, ka Jesusiri uandakua párichanksï k'ataperakuarhu petarkorheaspti.

²² P'urhejkutichaksï k'ataperakuarhu niáratini nóksï xéantaaspti, ka k'uanhajpatsesptiksï uandantani

²³ uandaparinksï: –K'ataperakuarhu uapanhakorhetixati ka p'urhejkutichaksï anhamukusti, ka engachi mítaka nónemanchi xéntaska.

²⁴ Ísï kurharinksï k'éri táta ka tiósïo anapu p'urhejkuticheri urhejtsïkuri ka tátecheri urhejtsïkuricha, kurhamarhekorhesïremptiksï: ¿Nénaxamuteru jánhaskorhepaa?

²⁵ Ka jiájkani niáraspti ma enga arhiapka: –Imani engajtsï cha ónhatarkorheaka, tiósïoksï jarhasti jurhentpeni.

²⁶ Jiájkani p'urhejkuticheri urhejtsïkuri imeri p'urhejkutichani jingunksï niraspti p'iuantaani sési arhiaparini, jimbokaksï iretani chérhesïrempka, jimbokaksï jámapiringa tsakapkueraani.

²⁷ Engaksï k'éri tángorhekuarhu péntaapkia, k'éri táta kurhamarheaspti

²⁸ arhiaparini: –¿Nóksïni sési jásï jimbo arhispkia eskajtsï no jámapiringa indeni jakangurhikua jimbo jurhentpeni? Iámu Jerusaleni íni ambejtsï jurhentpeskia, ka juchantsïntsïni arhiparhataxaka eskani inde achetini jucha uándikuska.

²⁹ Ka Pédruksï Jesusiri uandakua párichani jinguni mókukorhespti: –K'uanisïndi Diósïni urheta kurhajchani, eska k'uiripuni kurhajchani.

³⁰ Juchari tua anapuecheri Diósï Jesusini tsítantasti, imani engajtsï cha cháparhataka,

³¹ Diósï t'irejkandani pérasti juramutini ka p'imutantspirini, ka eskaksï imani jimbo Israeli anapuecha Diósïni andarhentaaka ka k'amanharhintskuechanksï púamenhantani.

³² Jucha íni ambe exekorheska, ka Espiritu Sántujtu ísï, enga Diósï íntsaaka imechani engaksï kurhandirakujka.

³³ Imaksï ikiaspti íni ambe ísï kurharini, ka uékasïremptiksï uándikuani.

³⁴ Jiájkani k'éri tángorhekuarhu, fariseo ma jauaraspti enga Gamalieli arhinhempka, juramukua jurhentpiri ma, enga iretarhu kánekua janhanharhikatepka. Ima sóndi Jesusiri uandakua párichani petarkorheaspti,

³⁵ ka uandaspti: –Israeli anapu tatecha, jinguntku je néna engajtsï uékani jaka káani íni achetichani.

³⁶ Míantsï je na enga Teudasï anhatsekorhepka uandani eska ima k'éri ambespka. Ka indenksï sáno ma irepeta acheticha chúxapaspti. Imanksï uándikusti ka iámendu engaksï chúxapempka etsapakorhesptiksï ka ískuksï k'amandespti.

³⁷ Ka xásï Júdasï Galilea anapu anhatsekorhespti, imani jurhiatekua enga miiujperanhantapka, ka uánekuechani chúxatakorhepaaspti ka imantuksï uándikusti, ka ima engaksï chúxapempka etsapakorhesptiksï.

³⁸ Ka iásïksïsïni arhixaka: Ásï inchakukua je íni achetichani, jurajkua je, jimboka eka i k'uiripueri úkua ambeka, ísku k'amandeati,

³⁹ k'óru enga i ambe Diósïrika, nójtsï úaka k'amajkuni. Ka ísku úndani jauakajtsï Diósï jinguni úrhutani.

⁴⁰ Ka imaksï ísï sési eranguntaspti. Ka uandajpantaasptiksï Jesusiri uandakua párichani ka engaksï na k'uikirheapka, juramukuasptiksï eskaksï nóteru jámapiringa Jesusiri jakangurhikuani uandaparini, ka tátsekuaksï jurajkuaspti.

⁴¹ Imaksï uéntaspti k'éri tángorhekuani japarini, kánekuaksï tsípeparini, jimboka Diósï nitatarhetaaspka eskaksï ísï nósesi kánhapiringa eska Jesusi.

⁴² Ka mándani pauanksï no kuantantasïrempti k'éri tiósïo ka k'umanchekuecharhu Jesukritueri ambe jurhentpeni ka arhijtsïkpeni.