Hechos 3 - Diósïri Karakata P´urheepecha Jimbo

Néna enga rengejta ambakeranhantaka

¹ Ma xanhariksï tanimu atakuarhu ísï, Pédru Juánu jinguniksï k'éri tiósïo karhamaxapti uandamukukorheni.

² Ka jima járhaspti acheti ma enga rengejtempka jimboka ísï andajpenuspka, ka mándani pauanksï k'éri tiósïo jamukutini pásïrempti, jima enga kasïpiti arhinhajka, ka eska ima jima tumina kurhakuaapiringa imechani engaksï tiósïo inchempka.

³ Enga acheti xépka Pédruni ka Juánuni engaksï tiósïo inchani jápka, kómu arhiaspti eskaksï tumina sáni íntskupiringa.

⁴ Ka Pédru arhispti Juánu jingunksï éskuarhu eratespti ka arhispti: –Eratejtsïni.

⁵ Ka ima ísku jarhasti erateani ka ísï eratsexapti eskaksï ambe intsïmbepiringa.

⁶ K'óru Pédru arhispti: –No sáni kámasïnga tumina, ambe engani ji kámani jaka, imankini íntskuaka: Jesukristu Nasareti anapueri jakangurhikua jimbo jauara ka xanhara.

⁷ Ka t'irejkandani jupijkuspti ka jauataspti ka ima jimajku uinhaptarhantaspti ka uinhapendurhantaspti;

⁸ ka jauajpatsespti ka imechani jinguni k'éri tiósïo inchaspti xanharaparini ka tsánguaraparini ka Diósïni k'éri ambe arhiparini.

⁹ Iámendu iretarhu anapuechaksï exespti enga xanharani jápka ka enga Diósïni k'éri ambe arhini jápka.

¹⁰ Ka mítentasptiksï eska imasï tiósïo uaxamukuempka enga kasïpiti arhinhajka, ka ísku pakareranhaspti ka chérakorhenhaspti imani ambe jimbo enga úkorhepka.

Pédru tiósïo uandasti

¹¹ Ka ima acheti enga ambakentapka, Pédruni ka Juánuni no jurajkuaspti, ka k'uiripu ísku pakareraspti ka uiriasptiksï jima enga Salomoniri jájchukurini arhinhajka.

¹² Ka Pédru ísï exearini arhiaspti: “Tatecha ka nanecha Israeli anapuecha, ¿Andijtsïsï ísku pakarerajki? ¿Andijtsïnisï ísku pakarajki exeni? Enajkini ambe jucha juchari uinhapekua o juchari p'amojperakua jimbo íni achetini ambakerantsï.

¹³ Abraniri Diósï ka Isakiri ka Jakobueri, ima engajtu juchari tua anapuecheri Diósïka, jántspiri jémba Jesusini k'éri ambe ústi; imani engajtsï cha intsïnharhitpeka ka Pilatuni jáparinijtsï no jiókorheni enga ima jurajkukuekani jápka.

¹⁴ Chájtsï no jiójkorheska imani enga Kaxumbitipka ka sési jásï k'uiripueni, ka uandikpitintsï ma jurajkutarkorheska.

¹⁵ Ka uándikuskajtsï imani k'érini enga tsípekua íntspejka, k'óru Diósï tsítantasti, jucha xékorheska.

¹⁶ I acheti engajtsï cha xéni jáka ka engajtsï mínharhikuka, ambakentasti Jesusiri jakangurhiakuani jakajkutini; chájtsï íni achetini míteska ka xékorhexakajtsï. Ambakentastia ima jakajkukua jimbo engajtsïni Jesusi íntskuka.”

¹⁷ “Tatecha ka nanecha, ji mítetixaka eskajtsï cha ka ima engaksïni chánksïni k'érichejka no mítetini nósesi úska.

¹⁸ K'óru Diósï úxati ambe enga imeri uandarichani jimbo aiatspetini jápka: Eska imeri Krístu uarhipiringa.

¹⁹ Ísï jimbo, Diósïni andarhentsï je ka k'amanharhintskuechantsï nóteru míamenhani jauakia [enga Acheri jurhiatekua niáraaka enga ima mintsitechani karhuantspeantauaka.]

²⁰ Ka Diósïksïni Jesukristuni axacheati eskajtsï na aiangukata jaka.

²¹ K'uanisïndi eska Jesukristu auandarhu jauaka ima jurhiatekua jamberi enga iámendu ambe sési pénhantaaka, ísï eska Diósï na uandaka ióntki imeri uandarichani jimbo enga erakuatini jápka.

²² Moisesi uandaspti: ‘Juchari Acha Diósïksïni chári erachini ma erakucheati, májkueni Diósïri uandarini ma eskani ji na Diósïri uandarika; ka imantsï kurhajchaaka ambe engaksïni xáni ima arhiaka.

²³ Ka ne enga imani Diósïri uandarini no kurhajchaska, iretarhu petaatanhaati.’

²⁴ Ka iámenduksï Diósïri uandaricha, Samueli uénani ka eskaksï imani chúxapajka, imajtuksï íni jurhiatecheri ambe uandantaspti.

²⁵ Chájtsï Diósïri aiatsperakua p'ikuaka enga Diósï chári tátechani aiakuaka, enga Abranini arhipka: ‘Chéti sïrukua jimboksï újchakuranhaati iámendu ireta parhakpeni anapuecha.’

²⁶ Enga Diósï Uájpani tsítantaka, chánksïni uénaspti axacheni eskajtsïni újcharanhapiringa, uékani eskajtsï cha mándani arhini móantapiringa ambe engajtsï xáni nósesi ambe úka.”