Hechos 26 - Diósïri Karakata P´urheepecha Jimbo

Páblu irecha Agripa jinguni

¹ Irecha Agripa Pábluni arhispti: “Úakaria uandakorheni.” Jiájkani Páblu iójkurhantaspti ka uénaspti uandakorheni:

² Kánekua tsípexaka irecha Agripa, engani iásï t'úngeni japarini uandakorheaka iámendu ambe engajtsïni judiuecha arhiparhatani jaka.

³ Ka sánderia jimbokari t'u míteska iámendu p'indekuechani ka judiuecheri ambe. Ísï jimboksïnisï kurhacheni jaka eskarini tekaachentaaka kurhajchani.

⁴ Iámendu judiuechaksï mítesti eskani jiájkantki engani ji tumbi sapichuepka, ji juchari iretarhu Jerusaleni irekaspka.

⁵ Indejtsïni ióntkitki uératini mítesti, ka engaksï uéjka úatiksï uandantani eska ji fariseueni irekaspka, ísï eska ima kúngorhekua na k'amak'amasï juchari jakajkukuani arhistatspejka.

⁶ Iásï engajtsïni ixu k'amarhirantani jaka, imani jimboesti jimbokani mintsikaxaka aiatsperakuani enga Diósï juchari tátechani aiakuaka,

⁷ engaksï témbeni tsimani iretecha erokorheni jaka.

⁸ ¿Andijtsïsï cha no jakajkujki eska Diósï uarhirichani tsítantaasïnga?

⁹ Ji ísï eratsexapka eskani nenauejki jásï jimbo jatsipiringa Jesusi Nasaretiri jakajkutichani k'amajkuani.

¹⁰ Ka Jerusaleni ísï úspka, k'érati tátecheri juramukua jimbo, ji uánekua jakajkutichani ónhatarkorheaspka ka jíjtuni jamberi sési exesïrempka engaksï uarhikua jimbo k'amanharhitanhantani jarhempka.

¹¹ Mémechani uéntani k'umanchekua tángorhentskuecharhu niraspka, ka jángorhentasïrempka eskaksï nóteru jakajkupiringa, ka xáni kurhenheani máteru iretecharhu jamberi jirinhantaasïrempka.

¹² Íni ambe jimbosïni Damasku nira jápka k'érati tátecheri juramukua jimbo;

¹³ ka sési jimbo, tata irecha, teruxutini xanhari jimbo exespka t'íntskua ma enga auandarhu uératini júpka, ka sánderu t'íxexapti eska tata jurhiata, ka jucheti pámpirichani jinguntsïni t'íntskachespti.

¹⁴ Ka iámenduechachi kuarhatsespka ka ji kurhaska nemarini ebreo jimbo arhini: Sáulu, Sáulu, ¿Andirinisï jirinhantajki? “Jandiojku jatindi atakorhexaka.”

¹⁵ Ka ji arhispka: “¿Néskiri, Acha?” Ka Acharini arhispti. “Ji Jesusiska ima engari t'u jirinhantani jámani jaka.

¹⁶ K'óru anhaxurhintsï; xarhacheskakini eskari jucheti jántspiriuaka ka eskari jucheti ambe uandantaaka engari exeka ka ambe engaterukini exeraaka.

¹⁷ Jíkini chéti iretarhu ka no judiuecheri iretarhu axaxaka, ka kuájchakuakakini,

¹⁸ eskari éskatarauakia; ka eskaksï pájpakandekuarhu uératini t'íntskuarhu niántaaka, ka eskaksï Satanasiri juramukuani jurajkuauaka ka Diósïnksï andarhentani; ka eskaksï k'amanharhintskuechani puápenhantaaka, ka eskaksï imani mínda p'iuaka erakukatecha jinguni engajtsïni jíndeni jakajkujka.”

¹⁹ “Ísï jimbo irecha Agripa, ji kurhandiraska engani auandarhu uératini jánhastanhaka,

²⁰ jimbosïni Damasku anapuechani uénaka aianguantaani ka tátsekua Jerusaleni anapuechani, ka iápuru Judea ísï ka ístu no judiuechani arhistakuaska eskaksï móantaaka ka eskaksï Diósïni andarhentaaka ka eskaksï jángua jimbo xarhataaka eskaksï móantaskia.

²¹ Íni ambe jimbojtsïnisï judiuecha, k'éri tiósïo jupikapti ka uándikuxamentijtsïnia.

²² Ka jimbokarini Diósï kuájchakuxaka jimbosïni iásï jamberi anhatsekorheka k'érati ka sapirhatichani aianguantaani ambe angamenduksï Diósïri uandaricha uandaka ka enga Moisesi uandaka eska úkorhepiringa:

²³ Eska Krístu uarhipiringa ka eska ima uénapiringa tsíntani ka ísï judiuechani ka no judiuechani erajkutaapiringa.”

²⁴ Enga Páblu íni ambe uandakorheni jápka, Féstu ichajpaataspti: “Páblu tandonhaskaskaria, iámuri xerejtsïxakaia xáni arhintani.”

²⁵ Ka Páblu uandaspti: Nómbe tata Féstu, jinisïni imani ambe uandani jaka enga ísïka, no tandonhaskaxaka.

²⁶ Irecha Agripa íni ambe sési mítetixati, jimbosïni imani japarini no chéjka uandani, ji arhijka eska iámendu ambe míteka, jimboka iápuru ísï mítekorheska.

²⁷ ¿Irecha Agripa cha Diósïri uandarichani jakajkukuasïnki? Ji mítetixaka eskajtsï jakajkusïnga.

²⁸ Ka Agripa Pábluni arhintaspti: “Sanorini chéti uandakuechani jimbo Krístu jinguniraxapkia.”

²⁹ Ka Páblu uandasptiteru: Eskamendu Diósï sóntku o ióni jimbo uékaaka ka isïjtsï jámani eskani ji, ka no t'újku, iámenduecha, engajtsïni iásï kurhajchani jaka, k'óru no ísï tiámu jimbo jótakata.

³⁰ Jiájkani irecha Agripa ka juramuti Féstu ka Bérenise ka iámendu engaksï márku uaxakatini jápka jauarasptiksï,

³¹ ka engaksï uéntani jápka arhijperapantaxaptiksï: Inde acheti nómbe ma ústi engaksï jimbo uandikuaka óksï ónhani.

³² Ka Agripa Féstu arhispti: “I acheti úpirindi jurajkunhani enga no ísï kurhajkorhepiringa eska Sésari útakupiringa.”