Hechos 24 - Diósïri Karakata P´urheepecha Jimbo

Páblu Féliksïni japarini uandapekorhesti

¹ 22 Tátsekua iúmu jurhiatekua jimbo, k'éri táta Ananiasï máru achamasïchani jinguni ka acheti ma engaksï Tértulu arhimpka, márkuksï niraspti, ima uandapetspirispti ka juramutinksï arhispti ambe jimboksïsï Pábluni k'amanharhirantani japi.

² Enga Páblu uandajpanhapka, Tértulu uénaspti Féliksïni arhini: “T'úngeni jimbochi kánekua sési jarhaska, ka ambe engajtsï cha juramujka kánekuachi marhuanchasïnga,

³ iápuru ísï ka méntkisïchi míani jarhasïnga, k'éri juramuti Féliksï, kánekua diósïmaiamu je.

⁴ Nóksïni ójkutakuekaxaka, chájtsï jurhenaska kurhachpeni ka kómarhixakakini ekajtsïni sóndi kurhajchaaka.

⁵ Jucha íni achetini xéntantaska eska ma parhakpeni judiuechani inchakutaasïnga, ka nasareti anapuechani inde urhejtsïkuasïndi.

⁶ Ka k'éri tiósïo jamberi nósesi ambe úkuekaspti, k'óruni jucha jupikaspka.

⁸ Engari kurhamarhekorheaka úakari sési míteni iámendu íni ambe enga jucha arhinharhikuni jaka.”

⁹ Ka judiuechaksï Tértulu jingunispti, uandaxaptiksï eska ima ambe ísïspka.

¹⁰ Jiájkani juramuti Pábluni uandaraspti ka Páblu mókukorhespti: Ji mítetixaka eskari sáni ióntkitki uératinia íni iretarhu k'amanharhitpentaxaka; jimbosïni nósani chéparini mókukorheaka.

¹¹ Chájtsï úaka jánhaskakorheni: Nótki jamberi témbeni tsimani jurhiakuesti, ji Jerusaleni karhamaspka Diósïni k'éri ambe arhini.

¹² Nóna jatintsïni k'éri tiósïo ka k'umanchekua tángorhentskuecharhu ka iretarhujtsïni exesti nema jingunchi ambe arhijperani jarhani o ji k'uiripuni manatani jarhani.

¹³ Ka nójtujtsïni úati xarhatacheni ambe engajtsïni arhinharhikuni jaka.

¹⁴ K'órukini aiangukorhentaxaka eska néka i jimbanhe jakajkukua engaksï inde arhijka eska arhujtata méska, ji juchari tátecheri Diósïni k'éri ambe arhisïnga, ka jajkajkusïnga iámendu ambe enga xáni juramukuarhu karakata jaka ka engaksï Diósïri uandaricha karantaka.

¹⁵ Ka ji Diósïni májkueni mintsikaxaka eskaksï inde na mintsikani jaka, eskaksï kaxumbiticha ka nóambarhati k'uiripuecha tsíntaaka.

¹⁶ Ísï jimbosïni jíjtuni jángorhentajka méntkisï sési jarhani Diósïni japarini ka k'uiripuni japarini.

¹⁷ Sáni ióni jimbo junguaska tumina sáni juákuani jucheni anapuechani ka parhandikua ambe kéjtsïtani.

¹⁸ Engani pímbinhaxentapkia, ji k'éri tiósïo kéjtsïtaxapka ka jimajtsïni xéntaspti, ka ji jandiojkusïni jámani jápka.

¹⁹ Imaksï máru judio Ásia anapuespti. –Imajtsïnisï jupirindi ixu t'úngeni japarini arhinharhikukorheni engani ambe ji kánguani jaka;

²⁰ óchka inde engaksï ixu jaka uande, ambenhasïni nósesi u jiájkani engani k'éri tángorhekuarhu pánhapka,

²¹ o imaxamu jimboe engani ji k'éri tángorhekuarhu terujkani jakuatini uinhamu uandapka: “Chájtsïni iásï uarhiricheri tsíntskua ambe jimbo k'amanharhirantaxaka.”

²² Féliksï enga jimbanhe jakajkukueri ambe sési mítetini jápka, erokataraaspti arhiaparini: “Enga k'éri p'urhejkuti Lísiasï kétseakia jiájkanksïni arhiakia ambe engani eratseka.”

²³ Ka p'urhejkuticheri urhejtsïkurini juramukuspti eska Páblu xéni japiringa, ka eska jurajkupiringa ambe enga Páblu úekani japiringa ka eska jurajkuapiringa engaksï pámpiri jémbecha p'urhembepiringa.

²⁴ Tátsekua namuni jurhiatekua jimbo, Féliksï, temba Drusila jinguni niáraspti, ima uarhiti judiouespti; ka Pábluni p'itajkorhespti ka kurhajchaxapti Krístu Jesusiri jakajkukuani.

²⁵ Ka enga Páblu sési irekueri ambe aianguntapka, ka néna úni p'íngukorheni ka imani jurhiatekueri enga k'amanharhitperanhantaaka, Féliksï chétku inchajpaataspti uandani: “Níia; ne engani jatini úaka jíkini p'itajkorheaka.”

²⁶ Ka Féliksï erokorhexapti eska Páblu tumina íntskupiringa; jimbosï sóntku jatini p'itajkorheni jarhempti ka ima jinguni uandaxeni jarhani.

²⁷ Tsimani uéxurhini jimbo, Féliksï, Porsio Féstuni juramukua mójkutaspti, ka judiuechani nóna sési pakarakuani Pábluni ónhatini jatsispti.