Hechos 23 - Diósïri Karakata P´urheepecha Jimbo

¹ Páblu k'éri tángorhekuarhu nósani chéparini uandaspti: Erachicha, ji íni jurhiatekua jamberi Diósïni míaparini jámaska.

² K'óru kéri táta Ananiasï arhiaspti imeri jarhojpirichani eskaksï uárhemukupiringa.

³ Jiájkani Páblu arhispti: –¡Ísku ísï uandari, Diósïkini atantaati! ¿Andirisï uaxakajki juramukuani jimbo jíndeni útacheni, ka nóri janhanharhini juramukuani engarini ísï atarkorheka?

⁴ K'óruksï ima engaksï Pábluni jimajku jakupka mókukuntasptiksï: –¿Tekaasïndi Diósïri k'éri tátani mókukuntani?

⁵ Ka Páblu arhiantaaspti: –Erachicha, no mítespka eska k'éri tátespka; nóchka karakata jarhaski andi: “Ásï jama iretarhu anapu juramutini arhinhchani.”

⁶ Páblu exearini eskaksï máru saduseuespka ka eskaksï máru fariseuespka, k'éri tángorhekuarhu uinhamu uandaspti: –Erachicha, ji fariseueska, fariseuecha jinguniska; jimbokani uarhiricheri tsíntskuani erokorhexaka jimbosïni k'amanharhiranhantani jaka.

⁷ Ísï uandarini, fariseuechaksï saduseuecha jinguni mámaru ambe arhijperantaspti ka tángorhekuarhu arhukorhenhaspti.

⁸ Jimbokaksï saduseuecha uandasïnga eskaksï uarhiricha no tsíntasïnga, ka eska ánjeli ka eska espiritu no jarhaska; ka fariseuechaksï k'óru jakajkusïndi.

⁹ Jiájkani uinhamu uinhachanhaxapti. Máruksï engaksï fariseuecha jingunipka jauaraspti ka no jiókorhenksï uandaspti: –“Jucha íni achetini nómbe ma nósesi ambe exekuxaka. ¿Iásï enga Espiritu o ánjeli ma uandajpakia andi?”

¹⁰ Jimboka sánderu nósesi jánhaskorhepaxapkia, k'éri p'urhejti chéxapti eskaksï Pábluni antsingurhintapiringa atani, jiájkani p'urhejkutichani máru juramukuaspti eskaksï kétsepiringa, ka eskaksï Pábluni euajkuantaapiringa ka eskaksï p'urhejkuticheri k'umanchekuarhu incharapiringa.

¹¹ Pauandekua enga chúrepkia, Acha, Pábluni xarhakuspti ka arhispti: “¡Tekaantsï! Ísï eskarini Jerusaleni jucheti ambe na uandantaka, Rómajturi májkueni aiangpentaaka.”

¹² Pauandekua judiuechaksï úskuspti ka pakatperasptiksï eska ikimenhapiringa ima enga t'irepiringa ka itsïmani engaksï Pábluni nótki uándikuni japiringa.

¹³ Jukari tsimani ekuatse achetichespti engaksï ísï uandakorhetini jápka.

¹⁴ I achetichaksï niraspti k'éri tátani ka achamasïchani arhiani: Jucha uandarixaka eska ikimenhaaka ima enga ambe ma arhaska engachi Pábluni nótki uándikuni jauaka.

¹⁵ Cha k'éri tángorhekua jinguni arhi je k'éri p'urhejkutini eskaksïni Pábluni késkucheaka arhimetaparini eskajtsï ambe kurhamarheni uékaxakateru; ka jucha jinguntku jauaka ka ataakachi enga ima nótki xanhari uéntani jauaka.

¹⁶ Ka Páblueri piremba uájpa, mítespti ambe engaksï úskuni jápka. Ka p'urhejkuticheri k'umanchekuarhu niraspti ka inchaspti Pábluni aianguntani.

¹⁷ Páblu p'urhejkuticheri urhejtsïkurini ma uandajpaspti ka arhispti: “Pa íni tumbini k'éri p'urhejkuti jinguni, inde ambe ma uékasïndi aianguni.”

¹⁸ Ka p'urhejkuti, k'éri p'urhejkuti jinguni páspti arhiparini: “Páblu ima enga k'atakata jaka ioarhisptirini, ka kómarhistirini eskakini juáchepiringa tumbini jimbokakini ambe aiangunkuekaxaka.”

¹⁹ K'éri p'urhejkuti jupijkuspti ka támu pérani ka kurhamarhespti: ¿Amberinisï aiangukuekani jaki?

²⁰ Ka ima uandaspti. –Judiouechaksï pakatperasti arhinksïni eskari pauani Pábluni k'éri tángorhekuarhu késkuaka, imeri ambeksï k'amak'amasï arhimetani kurhamarheni.

²¹ T'u ásï jáma k'óru kurhajchaani jarhani, jimbokaksï jukari tsimani ekuatse acheticha jakutsekutini jauaka, engaksï pakatperatini jaka eska ikimenhaaka ima enga t'ireaka ka itsïmani engaksï Pábluni nótki uándikuni jauaka; jingutkuchkaksï jarhastia erokorheni eskari kurhajchauaka.

²² Jiájkani k'éri p'urhejkuti tumbini axantaspti arhiparini: “Ásï nemani aianguntsï íni ambe engarini jíndeni aianguka.”

²³ Tátsekua tsimani p'urhejkuti urhejtsïkurichani uandajpaaspti ka arhiaspti: “Jinguntku jatsia je témbeni ekuatse purhejkutichani, tanimu ekuatse témbeni tekechu jatarichani ka témbeni ekuatse pitokicha jinguni engaksï chúrekua Sesarea niuaka.

²⁴ Ka Pábluntu tekechuni ma jinguntku jatsiku je; ka juramuti Féliksïni jinguni tsípiti peraa je.”

²⁵ Ka karakata ma karaspti enga arhimpka:

²⁶ “Kláudio Lísiasï, k'éri juramuti Féliksïni uandajpaxaka.”

²⁷ Ínksï achetini judiuecha jupikatixapti ka uándikuxamemptiksïa engani mítepka eska Róma anapueska, ji p'urhejkutichani jinguni niraspka ka euajkuantaaspka.

²⁸ Jimbokani mítekuekaxapka ambe jimboksïsï k'amanharhirantani japi, ka judiuecheri k'éri tángorhentskuarhu páspka.

²⁹ Ka jima mítespka eskaksï indecheri juramukua ambe jimboksïsï k'amanharhirantani jápka, ka eska no uándikukuespka o eska ónhanhapiringa.

³⁰ Ka engani aiangunhapka eskaksï íni achetini jakutsekupiringa, jimboksïnisï axacheka ka arhiaska imani engaksï k'amarhirantani jápka eskaksïni íni achetiri ambe t'úngeni arhikorheaka.

³¹ P'urhejkutichaksï eskaksï na juramumenhapka, Páblunksï chúrekua Antipatrida páspti;

³² ka pauandekua tekechu jatarichanksï juramukuaspti eskaksï ima jinguni nipiringa ka máteru purhejkutichaksï k'uanhatsentaspti.

³³ Engaksï Sesarea niárapka juramutinksï karakata íntskuntaspti ka Páblunksï ima jinguni péraspti.

³⁴ Enga ima arhintapka, kurhamarhespti nani enga anapuepka; enga mítepka eska Silisia anapuespka arhispti:

³⁵ Kurhajchakorheakakini jiájkani engaksï janoaka ima engaksïni k'amarhirantani jaka. Ka juramuspti eskaksï Erodesïri k'umanchekuarhu kuáni japiringa.