Hechos 22 - Diósïri Karakata P´urheepecha Jimbo

¹ Erachicha ka tatecha, kurha je ambe engani uandakorheni jámka.

² Enga ebreo jimbo uandapka sánderu nóteru mintsiranhaspti. Ka ima uandaspti:

³ Ji judioueska, Társu Silisia anapu, ka íni iretarhu jurhengua p'iraska, Gamalieririni juchari tátecheri juramukuani k'amak'amasï jurhendasti; ka Diósïri ambeni uinhamu inchajtsïmantasïrempka ísï eskajtsï cha na jaka iásï.

⁴ Ji jakajkutichani k'amajkukuekaaska, achetichani ka uarhitichani jójkuaska ka k'ataperakuarhu incharaaska.

⁵ Ka k'éri táta ka achamasïcheri tángorhekua úatijtsïni uandachentani. Indejtsïni jamberi karakata ma jinguni Damasku axaspti judiuechani jimbo, iámendu jakajkutichani jupiani ka Jerusaleni juáni jójkutiani eskaksï k'amanharhiranhantapiringa.

⁶ Ka engani xanhari jimbo nirani jápka, Damasku nirani jámani, teruxutini ísï, auandarhu uérati t'íntskua márini mátirku t'irhetaspti,

⁷ ka kuarhatsespka ka kurhaspka nemarini arhini: –Sáulu, Sáulu, ¿Andirinisï jirinhantaajki?

⁸ Ka ji arhispka: ¿Néskiri, Acha? Ka imarini arhispti: “Jíska Jesusi Nasareti anapu, ima engari t'u jirinhantani jaka.”

⁹ Ka ima engaksï jíndeni jinguni jámani jápka t'íntskuanksï exesti, k'óruksï no kurhaspti ambe engarini arhini jápka.

¹⁰ Ka ji arhispka: “¿Acha ambesïni ua?” Ka Acharini arhispti: “Jauara kókuani ka Damasku ni; jimari arhinhaaka iámendu ambe engari xáni úranhaaka.”

¹¹ Ka jimbokani ji imani t'íntskua jimbo pátenharhispka, jucheti pámpirichajtsïni jupijtapaspti Damasku inchaatani.

¹² Ka acheti ma enga Ananiasï arhinhempka, acheti p'amojpiti enga juramukuani janhanharhimpka, ka engaksï jima anapu judiuecha kánekua janhanharhimpka,

¹³ jurhasptirini exeni, ka engarini uandajpapka arhisptirini: “Erachi Sáulu éskantsï.” Ka ji jimajkuni éskantaspka ka imani achetini exespka.

¹⁴ Ka imarini arhispti: “Juchari tátecheri Diósïkini míndasti eskari míteaka ambe enga ima úekani jaka, eskari Kaxumbitini míteaka ka eskari imani kurhajchakorheaka,

¹⁵ jimbokari t'u aiangpentaaka iámendu ambe engari xéka ka kurhani.

¹⁶ Kókuani, ¿Amberi erokaxaki? Jauara ka itsï atajtsï ka imeri jakangurhikua jimbo chéti k'amanharhintskuechani kénditaa ka pímbinhaxentani.”

¹⁷ Tátsekuani Jerusaleni k'uanhatsentaspka ka jánhaskaspka engani k'éri tiósïo uandamukukorheni jápka;

¹⁸ Ka Achani exespka engarini arhini jápka: “Sóntku, Jerusaleni uéakuntsï kókuani, jimbokaksï no jiókorheaka ambe engari jucheti ambe uandantaaka.”

¹⁹ Ka ji arhispka: “Acha, imaksï mítesti eskani ji k'umanchekua tángorhentskuecharhu inchapuspka ka eskani ónhaaspka ka k'uikirhiaspka imani engaksïni t'úngeni jakajkujka;

²⁰ ka jiájkani engaksï Estebanuni uándikupka, ima enga chéti ambe jámani jápka uandantani, ji jima jarhaspka ka sési xéspka engaksï atani jápka ka takusï ambe patsakuaxapka imechani engaksï Estebanuni uándikuni jápka.”

²¹ Ka arhisptirini: “Ni, jimbokakini ji iauani ísï axaaka no judiuecha jinguni.”

Páblu p'urhejkuti jinguni pánhasti

²² Íni ambeterkuksï kurhaspti ka uinhachasptiksï: ¡K'amajku je! ¡Uándikukuesti!

²³ Nósesiksï uinhachaxapti ka xukuparhakuaksï karunhentasïrempti ka t'upuriksï k'uanichesïrempti.

²⁴ K'éri p'urhejkuti juramuspti eskaksï k'ataperakuarhu incharantapiringa ka eskaksï k'uikirhepiringa uandantatarani andi jimboksïsï xáni uinhachakuempki.

²⁵ Engaksï jójkuni jápka, Páblu p'urhejkuti urhejtsïkurini enga jima jápka arhispti: –¿Andi sési jarhaski Róma anapuni ma atani enga nótki k'amanharhiranhantani janhaaka?

²⁶ Ísï kurharini purhejkuti urhejtsïkuri k'uanhajpatsespti ka k'éri p'urhejkutini arhispti: ¿Nénarisï jámaa? Inde acheti Róma anapuesti.

²⁷ Ka k'éri p'urhejkuti Pábluni andarheraspti ka kurhamarhespti: –Arhirini: ¿Róma anapueskiri? Ka Páblu: –Jo, arhintaspti.

²⁸ K'éri purhejkuti uandaspti: –Ji kánekua tumina jimbo Róma anapuentaska. Ka Páblu arhispti. –Ka ji Róma andajpenuska.

²⁹ Ka ima engaksï k'uikirhepiringa kéjpandikusptiksï. Ka k'éri p'urhejkuti chéxapti mítetini eska Róma anapuespka imani enga jójkutarkorhepka.

Páblu k'éri tángorhekua judiuecherirhu jarhasti

³⁰ Pauandekua p'urhejkuti sési mítekuekaxapti andiksïsï judiuecha Pábluni ambe arhiparhatani japi, ka k'ataperakuarhu petantaspti ka juramuspti eskaksï k'érati tátecha ka k'éri tángorhekuajtu tángorhentapiringa; ka Pábluni imechani pérakuaspti.