Hechos 21 - Diósïri Karakata P´urheepecha Jimbo

Páblu Jerusaleni nirasti

¹ Engachi uandanukorhetapka, icharhuta jimbochi Kósï jurhirakuspka; ka pauandekuachi Ródasï niáraspka ka jima uératinichi Patara niáraspka.

² Jimachi xéntaspka icharhutani ma enga Fenisia nipiringa; jataspkachi ka niraspkachi.

³ Chípre ómekuanchi eraaspka ka uanondamaspkachi, ka Síria ísïchi niraxapka; ka Tírochi niáraspka jimboka icharhuta jima ambe késkupiringa.

⁴ Jimachi jakajkutichani xéantaatini iúmu tsimani jurhiatekuachi jima pakaraspka. Imaksï Espiritueri uandakua jimbo Páblunksï arhixapti eska Jerusaleni no karhamapiringa.

⁵ Iúmu tsimani jurhiatekua jimbo, uéraspkachi ka iámendu achetichaksï uarhiti jémbecha jinguni ka uájpecha jinguni uéramani jambejtsïni pámbespti. Japundarhu uanamukutinichi tinguixurhispka ka Diósïnichi kómarhispka;

⁶ iámenduechanchi uandanuaspka ka icharhutarhuchi karhantaspka; ka iámenduechaksï chéni jémbo k'uanhatsentaspti.

⁷ Engani jucha parhikupka, Tíro uératinichi Tolemaida niraspka; erachichanchi p'urhempeaspka ka ma jurhiatekuachi imecha jinguni pakaraspka.

⁸ Pauandekuachi uéraspka ka Sesareachi niraspka; Felipeochi inchaspka, imo enga ambakiti aiangperakuani uandantani jámempka, enga iúmu tsimani Jesusiri uandakua páricheri jarhojpiripka, ka chéni jémbochi pakaraspka.

⁹ Ima t'ámu uátsï manetichani kángorheasïrempti engaksï Diósïri uandaripka.

¹⁰ Jimachi pakaraspka sáni ióni; enga jamberi Agabo, Diósïri uandari ma Judea uératini kétsemupka;

¹¹ andarherasptijtsïni ka Páblueri jóngorhekua p'íkutini jónduspti ka jójkuspti ka uandaspti: “Espiritu Sántu uandaxati: Jerusaleni judiuechaksï achetini enga íni jóngorhekuani kámpka ísïksï jójkuati. Ka no judiouechanksï intsïnharhitaati.”

¹² Íni ambechi kurharini jima anapuecha jingunchi Pábluni kómarhispka eska Jerusaleni no karhamapiringa.

¹³ Jiájkani Páblu uandaspti: “¿Andijtsïsï uerajki ka mintsita atachentsïni? Jerusaleni Acha Jesusini jimbo, uarhini jamberiaru, ka no ísku jójkunhantku.”

¹⁴ Ka jimbokajtsïni no úekaspka kurhajchani, nóteru ambemachi arhispka ka arhijperaskachi: “Úkorhe eska Acha na uéjka.”

¹⁵ Ima jurhiatekuechani nitamatini jucha uéraxamempkia nirani, ka Jerusalenchi karhamaspka.

¹⁶ Jucha jingunksï niraxapti máru Sesarea anapu jakajkuticha, ka Mnasoniojtsïni páspti, jima engachi pakarapiringa, ima Chípre anapuespti ka sáni ióni jakajkutisptia,

¹⁷ Jerusalenchi niáraspka ka erachichajtsïni kánekua tsípekua jinguni erokaspti.

¹⁸ Pauandekuarhuchi Páblu jinguni Santiaguo niraspka; ka iámendu achamasï arhijtsïkpirichaksï tángorhentaspti.

¹⁹ Engachi uandajpaaka, Páblu sési aianguantaaspti iámendu ambe enga imeri ánchekorheta jimbo Diósï no judiuechani úkuapka.

²⁰ Imaksï Pábluni kurharini Diósïni k'éri ambe arhisïrempti. Jiájkanksï arhispti: Erachi xékorheskiria na engaksï xáni uáni judioecha Jesusini jakajkukia, ka iámenduksï úandasïndi eska k'uinisïnga juramukuani k'urhandirakuni.

²¹ Ka kurhajchpestiksï eskarinha t'u iámendu judiuechani engaksï no judiuecha jinguni irekaka jurhendaasïnga eskaksï Moisesiri juramukuani nóteru kurhajchaakia, arhiaparini eskaksï uájpechani no sïkuiri p'ikujtsïkukuauaka ka eskaksï p'indekuechani mirikurhiauaka.

²² ¿Nénachisï jámaia? Jimboka uánekua tángorhenhantaaka eka mítenhaska eskari ixu jarhaska.

²³ Úakari ambe engaksïni arhiaka: Jucha jingunksï t'ámu Diósïni aiakorhetixati.

²⁴ “Imecha jinguni ni tiósïo pímbinhaxentani; ka maiampekua eskaksï sési andajtsïraaka kuinakorheni; ísïksï iámenduecha jánhaskaati eska nómbe ma ísïska engaksï xáni ima kurhachpeka; ka sánderuksï ísï exeati eskari t'újtu juramukuani kurhandirakusïnga.

²⁵ Ka no judiuecha jinguni engaksï Jesusini jakajkukia, jucha arini ambe karakuaaskia: Eskaksï no auaka ambe engaksï diósï eratakatecha uandikumenhjka ka eskaksï iurhiri no auaka ka eskaksï pirajchakukata ambe no auaka ka eskaksï no ísku jándi úkorheaka.”

²⁶ Jiájkani Páblu pauandekua achetichani páspti ka imecha jinguni pímbinhaxentaspti, ka tátsekua k'éri tiósïo inchaspti uandakorheni káni enga imeri pímbinhaxentskua k'amarhupiringa, ka káni enga mándani arhini imecheri kéjtsïtakua pánhapiringa.

²⁷ Enga iúmu tsimani jurhitekuani jámempkia, Ásia anapu judiuechaksï Pábluni k'éri tiósïo xéntaspti, ka iretanksï manataspti ka jupikasptiksï.

²⁸ Ka uénasptiksï uinhachani: “¡Israeli anapuecha jarhuatajtsïni je! I achetisï iápuru ísï jurhentpeni jati eskaksï juramukuani nóteru kurhajchaaka, ka íni tiósteri nósesi ambe uandani jarhasïndi, xu pímbinhanduni no janhanharhisïndi ka gríeguechani jamberi íni k'éri tiósïo incharaasti.”

²⁹ Ísïksï uandaxapti jimbokaksï urhetku iretarhu Pábluni Trófimu Éfesu anapu jinguni exespka, engaksï eranhaskani jápka eska Páblu k'éri tiósïo incharaspka.

³⁰ Iámu ireta méntku ísï jamaspti ka iápuru ísï uéranhaspti. Páblunksï jupikaspti ka k'éri tiósïoksï antsikupaspti petantani; ka jimajkuksï kapamutantaspti míkantani.

³¹ Ka uandikuxamemptiksïa engaksï máru nípka k'éri p'urhejkutini aianguntani: “Jerusaleni anapuechaksï méntku ísï jamaxati.”

³² Jiájkani ima sóntku niraspti máteru p'urhejkutichani jinguni ka máteru p'urhejkuti urhejtsïkuricha jinguni ka jirejiresï andarheraaspti; ka eroarinksï Páblunksï jurajkuspti.

³³ Jiájkani k'éri p'urhejkuti Pábluni andarheraspti ka jupikaspti ka juramuspti eskaksï tiámu tepeka jimbo jótapiringa; ka uénaspti kurhangorheni néspki ka ambesï úpi.

³⁴ Ka máruksï ma ambe uandasïrempti ka máteruksï máteru ambe. Ka jimboka ima no úempka jánhaskani andisï xáni ísï jánhani jápi, juramuspti eskaksï k'ataperakuarhu incharapiringa.

³⁵ Engaksï karhantani jámempkia, p'urhejkutichaksï Pábluni tarhatapaspti jimboka nósesi jánhaxanhapka;

³⁶ Iámu k'uiripu chúxapaxapti uinhachaparini: “¡Uandiku je, uandiku je!”

³⁷ Engaksï p'urhejkuticheri k'umanchekuarhu icharani jápkia, Páblu k'éri p'urhejkutini arhispti: “¿Jurajkuarini eskakini ma ambe arhiaka?” Ka ima arhintaspti: ¿Andi t'u gríegu uandasïnki?

³⁸ ¿No t'úsï Ejiptu anapue enga arini jurhiatekuechani k'uiripuni jauataka ka jima enga nónena irekaka t'ámu míli uandikipitichani páaka?

³⁹ Ka Páblu uandaspti: “Ji judioueska, Társu anapu, k'éri ireta enga Silisia jaka. Kómarhixakakini eskarini jurajkuaka iretani uandaxekuni.”

⁴⁰ Ka ima jurajkuspti. Páblu iótakuarhu uératini níjkurhaspti eska ísku janhapiringa. Ka enga pínasku janhapka ebreo jimbo uénaspti arhiani.