Hechos 18 - Diósïri Karakata P´urheepecha Jimbo

Páblu Korintu jarhasti

¹ Tátsekua Atenasi uératini Korintu niáraspti.

² Ka judio ma jingunksï xéjperantaspti enga Akila arhinhempka, Póntusï anapu ma, enga Italia uératini témba Prisila jinguni niáratintkuksï jápka, jimboka Kláudio juramuspka eskaksï iámendu judiuecha Róma uéakuntapiringa; ka Páblu imecha jinguni niraspti,

³ ka jimbokaksï tsimarheni uapajtsïtakua úrispka, imecha jinguni pakaraspti ánchekorheni.

⁴ Mándani sábadu k'umanchekua tángorhentskuarhu uandasïrempti, ka jángorhentasïrempti judiuechani ka gríeguechani jakajkutaraani.

⁵ Jiájkani engaksï Sílasi Timoteo jinguni Masedonia uératini niárapka, Páblu ambakiti aiangperakueri ambejku uandantaxapti, judiuechani aianguantaaxapti eska Jesusisï Krístueka.

⁶ Ka jimbokaksï ima no jiókorhesïrempka, Páblunksï útakuntaspti, ka Páblujtu uaratakorhentaspti xukuparhakua ka arhiaspti: –Chájtsïsï jirinhakorhexaka eskajtsï ikimenhaaka. Ji nómbema míteska. Iásï uératini no judiuecha jinguni niraxampka.

⁷ Jiájkani jima k'éndikuspti ka Jústouo inchaspti enga Diósïni k'éri ambe arhimpka, enga k'umanchekua tángorhekuarhu píjtakutini irekapka.

⁸ Kríspo, ima enga k'umanchekua tángorhekuarhu k'éripka, Achani mintsikaspti iámendu imo anapuecha jinguni; ka uánekuaksï Korintu anapuecha Pábluni kurharini jakajkuspti ka itsï atajtsïsptiksï.

⁹ Ka Acha Pábluni chúrekua jánhastaspti ka arhispti: “Ásï jama chéni, aiangpeni játeru;

¹⁰ jimbokani ji t'úngeni jinguni jarhaska ka nónemakini nósesi ambe úcheati, jimbokaksï íni iretarhu uánekua jíndeni jinguniska.”

¹¹ Ka ma uéxurhini ka terujkani jima pakaraspti Diósïri uandakuani jurhentpeni.

¹² Jiájkani enga Akaia Galioni juramuni jápka, judiuechaksï pakatperaspti ka Páblunksï jupikaspti, ka útatsperakuarhuksï páspti,

¹³ uandaparini eska Páblu jurhentpexaka Diósïni k'éri ambe arhini ísï eska juramukua no jiáretpejka.

¹⁴ Páblu uandaxamemptia enga Galioni judiuechani arhiapka: Eka uandikperakua ambepiringa o nósesi ambeni, jíksïni kurhajchapiringa eska na k'uanijka.

¹⁵ Ka jimboka i arhirpeta uandakuechani jimboeka ka jakangurhikuechani jimbo enga chári juramukuerika, chári jimboestia. Jíksïni no uékasïnga íni ambe inchaakucheni.

¹⁶ Ka útatsperakuarhu petantaaspti.

¹⁷ Jiájkanksï iámenduecha Sóstenesini jupikaspti, imani enga k'umanchekua tángorhekuarhu k'éripka, ka útatseperakuarhuksï ataspti ka Galioni ísku jarhaspti eska nómbe ma úkorheni.

¹⁸ Páblu útasï jima pakaraspti sáni namuni jurhiatekua; tátsekua erachichani uandanuantaaspti ka icharhuta jimbo Prisila ka Akila jinguni, Síria isï niraspti. Ka Sénkrea andajtsïraaspti kuinhakorheni jimboka Diósïni ambe aiakorhespka.

¹⁹ Engaksï Éfesu niárapka, jima Prisilani ka Akilani kéndikukuaspti. K'umanchekua tángorhentskuarhu inchaspti ka judioecha jingunksï mámaru ambe úndaspti arhijperani.

²⁰ Ka judiuechaksï kómarhispti eska imecha jingunderu pakarapiringa, k'óru Páblu no uékaspti,

²¹ ka uandanuantaaspti arhiaparini: Eka Diósï uekaaka k'uanhatsentaaka Ka Éfesu uératini icharhuta jimbo niraspti.

²² Ka Sesarea niáraspti, ka jakajkutichani karhamaspti sáni p'urhembiani ka tátsekua Antiokia kétsemaspti.

²³ Sáni namuni jurhia jima jatini, Galasia ka Frígia ísï iápuru jamaspti iámendu erachichani p'imarheaparini eskaksï Jesusini jakajkuni japiringa.

²⁴ Judio ma enga Apolusï arhinhempka, Alejandria anapu ma enga sési andajtsïtpempka ka enga karakatechani míteapka, Éfesu niáraspti.

²⁵ Ima Acheri ambe jurhendakatespti ka kánekua mintsita jinguni uandasïrempti, ka nájkiruka Juánu itsï atajtsïkpiriri ambejku mítepka, Jesusiri ambe k'amak'amasï sési jurhentpesïrempti.

²⁶ I acheti k'umanchekua tángorhentskuarhu ts'iuekua jinguni uandaspti. Ka engaksï Akila Prisila jinguni kurhapka, támuksï páspti ka Jesusiri xanharinksï k'amak'amasï aianguntaspti.

²⁷ Enga Apolusï Akaia parhikuekani jámempka, erachichaksï jarhuataspti ka jakajkutichanksï karakuaspti eskaksï erokani japiringa. Jima niáratini, ima kánekua marhuakuaspti imechani engaksï kóndenhantapka jakajkuni,

²⁸ jimboka judiuechani k'uiripuni japarini anhatsekuasïrempka, xarhataparini karakatechani jimbo eska Jesusisï Krístueka.