Hechos 17 - Diósïri Karakata P´urheepecha Jimbo

Tesalonika sarhasarhamenhaspti

¹ Anfipolisi ka Apoloniaksï parhikuspti ka Tesalonikaksï niáraspti, jima engaksï judiuecha k'umanchekua tángorhentskua ma játsipka.

² Páblu, eska na p'indepka, tanimu sábadu p'urhembeaspti ka imechani jingunksï mámaru ambe arhijperaspti karakatani arhintaparini,

³ jánhastaaparini ka xéraaparini eska Krístu jatsipiringa uarhini ka tsíntani ka arhiasïrempti: “Ima Krístu, Jesusisti engaksïni ji aianguntani jaka.”

⁴ Máruksï jakajkuspti ka Páblu ka Sílasi jingunintasptiksï, ka uánekuajtuksï gríeguecha engaksï Diósïni k'éri ambe arhimpka ka ístuksï uánekua nana urhejtsïkuricha jakajkuspti.

⁵ K'óruksï judiuecha kánekua epurheaxapti, ka nóambarhati k'uripuechanksï páaspti engaksï xanharu jámempka, ka uánekuaksï tánantaaspti ka iretanksï manataspti. Ka Jasonioksï niáraspti jirinhantaani jimbokaksï ireta jinguni pákukuekaaxapka.

⁶ Engaksï no xéantaapka, Jasoninksï ka máteru erachichanksï antsikuaparini iretarhu anapu juramuticha jinguni páaspti, uinhachaparinksï: “I engaksï ma parhakpeni nósesi jánhastpejka, ixujtuksï janostia,

⁷ ka Jasoni chéni jémbo jatsiaspti. Ka indeksï Sésariri juramukuani no janhanharhisïndi ka uandasïndiksï eska máteru irecha jarhaska, Jesusinha.”

⁸ Íni ambe kurhanhatini, ireta ka juramutichaksï méntku ísï jámaspti;

⁹ K'óru engaksï Jasonini jimbo ka máteruechani jimbo maiamunhapka, jurajkuasptiksï.

Bérea arhijtsïkperanhasti

¹⁰ Imani chúrekua erachichaksï Pábluni ka Sílasini Bérea axaaspti. Imaksï jini niáratini judiuecheri k'umanchekua tángorhentskuarhu niraspti.

¹¹ Jima anapuechaksï sánderu ambarhati k'uripuespti eskaksï Tesalonika anapuecha, ka uandakuanksï mintsita jinguni p'irasïrempti. Mándani pauanksï jángorhentasïrempti karakatecharhu jirinhantani ambe engaksï xáni aiangunhantempka.

¹² Uánekuaksï jakajkuspti, ka gríeguechajtuksï máru ka uarhiti k'éri ambecha ka uánekua achetichajtuksï jakajkuspti.

¹³ Engaksï Tesalonika anapu judiuecha mítepka eska Páblu Béreajtu Diósïri uandakuani arhijtsïkpespka, imajtuksï jini niraspti ka manatpesptiksï.

¹⁴ Jimajkuksï erachicha Pábluni sóntku japundarhu isï pétaantantaspti; ka Sílasiksï Timoteo jinguni jima pakaraspti.

¹⁵ Ima engaksï Pábluni páni jápka Atenasi jamberiksï peraaspti; ka uandakua máksï Timoteoni ka Sílasini pákuantaaspti eskaksïnha Páblu jinguni sóntku nipiringa.

Páblu Atenasi jarhasti

¹⁶ Enga Páblu eroani jápka, kánekua p'ikuarhenhexapti Atenasi diósï eratakuechani ísï exearini.

¹⁷ Ka judiuecha jinguni ka imecha jinguni engaksï Diósïni k'éri ambe arhimpka mámaru ambeksï arhijperantaxapti; ístu mándani pauani uandaxekuani jarhasïrempti imechani engaksï kópekuarhu jarhempka.

¹⁸ Epikuriosïcha ka estoikusïcha jinguni mámaru ambe arhijperaxapti, ima engaksï k'érati eratsetini mítekateka. Máruksï uandasïrempti: “¿I ambexamusï xáni uémuskorheni jaki?” Ka máteruksï uandasïrempti: “¿Enajki no xu anapu diósïcheri ambe arhijtsïkpejki?” Jimboka Jesusiri ambe ka tsíntskueri ambe aiangpentasïrempka.

¹⁹ Ka jupikasptiksï ka iretarhu, tángorhekuarhuksï péraspti arhiparini: ¿Jucha ua míteni nákiski inde jimbanhe jurhentperakua engari uandani jaka?

²⁰ Jimbokaksïni imani kurhajchaska engani jucha no jánhaskajka, ka mítekuekaxakachi ambesï arhikuekajki.

²¹ Iámendu Atenasi anapuechaksï ka uérakua anapuecha engaksï jima irekorheni jápka, iámendu ambeksï jurajkuntasïrempti jimbanhe ambejkuksï kurhanhchani ka uandanhchantani.

²² Jiájkani Páblu anhaxurhitini k'uiripuni uirhipandakorhetini uandaspti: Atenasi anapuecha: Xéxaka eskajtsï cha kánekua jakajkusïnga,

²³ jimboka chári tióstecharhu ka chári eratakuechani exearini, xéntaska kéjtsïtakuarhu karakata jarhani: “Imani Diósïni enga no mítenhaka”. Imani engajtsï cha no míteparini k'éri ambe arhijka, imeri ambesïni ji uandantajka.

²⁴ Diósï enga parhakpenini kueraaka ka ambe enga xáni jima jaka, enga auandarhu ka echerindu Acheka, no jima irekasti tióstecharhu enga k'uiripu úka,

²⁵ ka nónemeri jarhojperakua uétarhinchasïndi. Imasï tsípekua íntspejti, ka imasï jirejtatarpejti ka iámendu ambe íntspeni.

²⁶ Ima, ma k'uiripu jingutku sïrukuani kueraaspti, eskaksï irekapiringa ma parhakpeni xáni ióni eska na eratsetini jápkia, ka nani engaksï jamberi irekapiringa.

²⁷ Eskaksï táchani ísï Diósïni jirinhatapiringa, nándikaksï p'áp'ajkurhaparini jirinhantapiringa ka xéntanksï; sési jimbo imajtsïni no iauani jachesti,

²⁸ jimbokachi imani jimbo irekaxaka ka imani jimbochi manakorhesïnga ka jamani jarhanchi, ísï eskaksï cha máru na uandaka: Jimbokachi juchajtu sïrukua jémbeska.

²⁹ Engachi Diósïri sïrukueka, nóchi jámapiringa eratseni eska Diósï eratakua tiripitirini jáxeska o taiakateri o ambe uéjkiri enga újkunhajka.

³⁰ Diósïchka tekaatspentaspti jiájkani enga no jánhaskanhempka, iásï k'óruia iámenduechani aianguantaaxati eskaksï iámendu ka iápuru ísï anapuecha móantaakia,

³¹ jimboka ima, jurhiatekua ma pératixaka enga imeri míndakata jimbo, parhakpeni anapuechani arhinharhikuauaka jimboka imeri míndakatani tsítantatini xérpeska.

³² Tsíntskueri ambeksï kurharini, máruksï teresmarhuspti ka máteruksï arhispti: –Jucha uekapiringa eskajtsïni máteru jimbo íni ambe uandaxechepiringa.

³³ Ka Páblu jima uératini kéndikukuaspti.

³⁴ Máruksï Páblu jingunintaspti ka jakajkusptiksï. Dionisio enga kópekuarhu anapu tángorhekuarhu anapuepka ka uarhiti ma enga Damarisi arhinhempka imajtuksï jakajkuspti ka máteruechajtuksï ísï.