Hechos 16 - Diósïri Karakata P´urheepecha Jimbo

Timoteo Pábluni ka Sílasini pámbeasti

¹ Tátsekua Páblu Dérbe ka Lístra niáraspti. Ka jima jarhaspti jurhengorheri ma enga Timoteo arhinhempka, amamba judiuespti ka jakajkutispti ka tátjemba gríeguespti.

² Erachichaksï Lístra anapuecha ka Ikonio anapuecha imeri ambeksï sési uandasïrempti.

³ Ka Páblu uékaspti eska ima pámbeapiringa, k'óru úrheta ts'iuekuarhu pasïri p'ikujtsïkutarkorhespti, judiuechani jimbo engaksï jimesï irekapka, jimbokaksï iámenduecha mítetixapka eska tátjemba gríeguespka.

⁴ Imani iretecherhu engaksï parhikuempka, aiangpesïremptiksï ambe engaksï Diósïri uandaricha ka achamasïcha, Jerusaleni pakatperapka eska únhapiringa.

⁵ Tángorhekuechaksï sánderu sési jakajkuxapti, ka mándani pauani sánderu uánenhaxapti.

⁶ Frígiaksï parhikuspti ka Galasia isï, jimboka Espiritu Sántu no jiáretaaspka eskaksï Ásia uandakuani arhijtsïkpepiringa.

⁷ Engaksï Misia niárani jápkia, Bitinia isïksï niraxamemptia, k'óru Jesusiri Espiritu no jiáretaaspti.

⁸ Ka Mísiaksï parhikuspti ka jima uératinksï Troási kétsemaspti.

⁹ Chúrekua ma jimbo, Páblu jánhaskaspti acheti Masedonia anapuni ma enga anhandetini Pábluni kómarhini: “Masedonia ísï jamu, jarhuatajtsïni.”

¹⁰ Páblu ísï jánhaskatini, Masedoniachi nipaska, jimbokajtsïni Diósï uandajpaska eskachi nipiringa arhijtsïkuani.

Filipusï uandakua arhijtsïkperanhasti

¹¹ Troásichi jataska k'éri icharhutani ka Samotrasiaksï niraspka, ka pauandekuachi Neápolisï niraspka;

¹² ka jima uératinchi Filiposï parhikuska, k'éri iretarhu, uapatsekuarhu ma enga Masedonia jaka. Ka jimachi jarhaspka namuni jurhia.

¹³ Sábadu ma jimbochi iretarhu andamukueraspka, iurhekuarhu uanamukutini, jima engani jucha eranhaskani jápka eska uandamukukorhenhasïrempka. Uaxakaspkachi ka p'iáraspkachi uarhitichani arhijtsïkuani engaksï tángorhentani jápka.

¹⁴ Uarhiti ma enga jima jápka, Lídia arhinhasïrempti, takusï ambakiti atarantsti ma, Tiatira anapu ma enga Diósïni k'éri ambe arhimpka, imajtsïni kurhajchaxapti, Acha p'ikuarhenhetaspti eska ima Pábluni kurhangukupiringa ambe enga xáni uandapiringa.

¹⁵ Engaksï ima, chéni jémbo anapuechani jinguni itsï atajtsïkunhapka, kómarhisptijtsïni: –Engajtsïni cha ísï exeni jaka eskani ji Achani mintsikasïnga juchenksïni p'ímarhesïnga pakarani. Ka uinhapetarhujtsïni páspti.

¹⁶ Ma xanhari engani jucha nirani jápka jima enga uandamukukorhenhajka, uátsï májtsïni kúmaspti, enga nósesi jásï espiritu jimbo xérkorhpeni jámempka, enga xérkorhpetini imani enga jántspekuempka kánekua tumina andaraani jápka.

¹⁷ Imajtsïni chúxapaxapti, Pábluni ka juchantsïni uinhachaparini: –¡Íksï acheticha k'éri Diósïri jántspiristi! Engaksïni p'ímutantskueri xanharini aianguntani jaka.

¹⁸ Sáni ióni, májkueni jámaspti. Páblu niáchatinia, p'irhipakorhespti ka espirituni arhispti: –Jesukristuni jimbokini juramuchexaka eskari uátsïni uérhentaaka. Ka ima jimajku uérhentapaspti.

¹⁹ Ima acheti enga uátsï játspekuempka, exerini eska nóteru úpiringia tumina andani, Pábluni ka Sílasinksï jupiaspti, ka kópekuarhuksï juramutichani pákuaspti antsikuaparini.

²⁰ Útatspirichani jingunksï péraaspti ka arhiasptiksï: –Íksï acheticha iretarhu manatpexati; ka judiouestiksï,

²¹ ka p'indekuechanksï máru jurhentpeasïndi ka juchachi no úaka indeni p'indekuani chúxapani jimbokachi Róma anapueska.

²² Ka uánekuaksï uinhachakuaspti, ka útatspirichaksï juramuspti eskaksï xukuparhakua karukukuapiringa, ka eskaksï k'uikirheapiringa.

²³ Engaksï sáni ióni k'uikirheapkia, ónhaasptiksï, ka juramukusptiksï k'ataperakuarhu anapu kuárini eska jinguntku japiringa exeani.

²⁴ Ka ima enga juramumenhapka, pájpakandu incharaaspti ka k'éri chkári ma jatsindukuaspti.

²⁵ Terujkani chúriksï, Páblu Sílasi jinguni uandamukorhexapti ka Diósïnksï pirekuxapti, ka máteru ónhakatechaksï kurhajchaaxapti.

²⁶ Ka mátirku uinhamu jenchespti, engaksï k'ataperakuarhu anapu pitsekuecha manakorhepka. Ka iápuru mítakorhespti ka iámenduecheri tiámu tepekata chkétakorhespti.

²⁷ Ka tsínharhispti k'ataperakuarhu anapu kuári, ka enga exepka eska k'ataperakuarhu mítakorhetixapka, atajpetarakua tiámuerini p'íarhasti ka uándikukorhexamemptia, ísï eranhasparini eskaksï ónhakatecha sïpakorhespkia.

²⁸ K'óru Páblu uinhachakuspti: –¡Ásï atakorhe, iámenduechachi ixu jarhaska!

²⁹ Jiájkani kuári erajkutarakua ma kurhajkorhespti, ka manaraparini uiriapaspti inchani ka Pábluni ka Sílasini tinguixurhitini andandukueraaspti.

³⁰ Enga petantaapka arhiaspti: –Tatecha, ¿Ambesïni ua engani jimbo úaka p'ímutantskorheni?

³¹ Ka imaksï arhintaspti: –Acha Jesukristuni mintsika, ka p'ímutantskorheakari t'u chéni anapuecha jinguni.

³² Ka Acheri uandakuanksï imecho anapuechani jinguni aianguantaaspti.

³³ Ka imani chúrekua, k'ataperakuarhu anapu kuári ima jinguni páaspti, ka jupamakuaspti jima engaksï atakata jápka, ka jimajku ima iámendu imecho anapuechanksï itsï atajtsïkunhaspti.

³⁴ Tátsekua chéni jémbo páaspti ka t'ireraaspti ka ima kánekua tsípespti Diósïni jakajkutini imecho anapuechani jinguni.

³⁵ Enga erandepkia, útatspirichaksï kuárichani máru axakuaspti, eskaksï nipiringa arhini: –Jurajkua indeni achetichani.

³⁶ Ka kuári Pábluni íni ambe aianguntaspti: –Útatspirichajtsïni uandakua axachesti eskaksïni jurajkuaka; ísï jimbo uéra je ka ni jeia.

³⁷ K'óru Páblu arhispti: –Juramusti eskachi k'uikirhenhapiringa k'uiripuni japarini, ka nójtsïni arhisti ambe jimboeski. Nauejki engani juchajtu Róma anapueka, ónhastijtsïni; ¿Ka iásïjtsïni sïpatekuarhu axantskuekaxaki? ¡No ísïuati! Juuejtsïni petakorheni.

³⁸ Kuárichaksï útatspitichani íni ambe aianguantaaspti, útatspirichaksï kurharini eskaksï imajtu Róma anapuespka kánekuaksï chéspti.

³⁹ Jiájkani nirasptiksï ka kómarhiasptiksï eskaksï iretarhu uéakuntapiringa.

⁴⁰ K'ataperakuarhuksï uéntatini Lídiauo niraspti, ka erachichanksï exeantaaspti, ka imaksï uinhaperantaani uándaxekuaspti ka níntasptiksï.