Hechos 13 - Diósïri Karakata P´urheepecha Jimbo

Bernabe ka Sáuluksï uénasti ánchekorheni

¹ Diósïri uandaricha ka jurhentpirichaksï Antiokia anapu tángorhekuarhu jámaxapti: Bernabespti ka Simeoni turhipiti, ka Lúsio Sirene anapu ka Manaeni, engaksï juramuti Erodesï jingunksï márku t'arhexepka, ka Sáulu.

² Engaksï ima Diósïni marhuakuni jápka ka k'arhindajarhanksï, Espiritu Sántu uandaspti: “Támujtsï pérache je Bernabeni ka Sáuluni jimbokani ambe míndatiaxaka eskaksï úaka.”

³ Ka engaksï karhinda jápka ka uandamukorhetini, p'ájtsïkuasptiksï ka tsînguasptiksï.

Chípre ómekuarhu arhijtsïkpenhasti

⁴ Imaksï Espiritu Sántu jimbo axakata Seleusiaksï kétsemaspti, ka k'éri ichakurhuta jimboksï Chípre ómekuarhu niáraspti.

⁵ Salaminaksï niáratini Diósïri aiangperakuanksï judiuecheri k'umanchekua tángorhentskuecharhu uandantasïrempti. Juánu Márkusïjtu imechani jinguni jámaxapti ka ima jarhuataasïrempti.

⁶ Engaksï ómekuarhu parhikupka, Páfosïksï niáraspti. Ka sïkuamenksï ma jima exentaspti, diósïri uandari eratakorheri judio ma enga Jesusi uájpa arhikorhempka,

⁷ enga juramuti Sergio Páulosï jinguni jámempka, acheti míakua jukari ma. Ima juramuti Bernabe ka Sáuluni p'ijtakorheaspti, jimboka Diósïri uandakuani kurhanhchaxapka.

⁸ Ka sïkuame Elimasï (Jesusi uájpa) jángorhekuntaxapti eska juramuti no jakajkupiringa.

⁹ Jiájkani Sáulu, engajtuksï Páblu arhimpka, Espiritu Sántuni uinirhikorhetini ka erateparini

¹⁰ arhispti: –¡T'u, chkuándira, ka nósesi ambe úri, nóambakiti uájpa, t'u engari no uéjka eska Diósï na uéjka!, ¿Acheri sési jásï xanharichandi na jatini jamberi nósesi jántskaraani jaua?

¹¹ Exekorhechkia Achani ambe engakini úcheni jámka. Pátenharhiri pakaraaka ka sáni ióniri tata jurhiatani nóteru exeaka. Ka ima jimajku pájpakanhaskaspti ka matsïmatsïnharhisïrempti p'ájkuskorheparini nemani enga jupijkupiringa.

¹² Jiájkani juramuti exerini ambe xáni úkorhepka, ísku pakareraspti Acheri arhijtsïkpekuani jimbo, ka jakajkuspti.

Páblu Pisidia arhijtsïkpesti

¹³ Páblu pámpiri jémbecha jinguni, Páfosï uératini Pérgaksï niáraspti enga Panfilia ísï jaka; k'óru Juánu Márkusï jarharheaspti ka Jerusaleni k'uanhatsentaspti.

¹⁴ Pábluksï Pérga uératini Antiokia niáraspti enga Pisidia isï jaka. Ka sábaduksï k'umanchekua tángorhentskuarhu inchaspti ka uaxakasptiksï.

¹⁵ Enga juramukua ka Diósïri uandaricheri karakata k'amaranhapka arhinhantani, k'umanchekua tángorhentskuarhu anapu urhejtsïkurichaksï uandakua axakuaspti: “Erachicha, engajtsï ambe arhijpenhchani jaka, méntku uanda jeia.”

¹⁶ Ka Páblu jauaraspti, ka níjkurhatspespti eska pínasku janhapiringa, ka uandaspti: Israeli anapuecha ka cha engajtsï Diósïni janhanharhijka, kurha je:

¹⁷ Diósï Israeli anapuecheri juchari tua anapuechani erakuaspti, ka uáneraaspti engaksï Ejiptu jatsïpepka, ka imeri uinhapxurhakua jimbo petaantantaaspti.

¹⁸ Ka sáno tsimani ekuatse uéxurhini kuájchakuaspti jimesï enga nónema irekaka,

¹⁹ ka enga iúmu tsimani Kanani anapu iretechani k'amajkuapka, imecheri echerichani Israeli anapuechani míndaaspti.

²⁰ Sáno ma irepeta ka tsimani ekuatse témbeni uéxurhini Diósï juramutichani axaaspti, jiájkani jamberi enga Samueli Diósïri uandarika.

²¹ Ka tátsekuaksï irechani ma kurhajkorhespti, ka Diósï Saulini axakuaspti tsimani ekuatse uéxurhini, Kísï uájpani enga Benjaminiri sïrukua jémbepka.

²² Enga imani kénditapka, Dabini irechetaraspti ka Diósï Dabiri ambe uandasptimendu: “Dabini exentaska, Jese uájpani, imani eska jucheti mintsita na uéjka, ka inde úati ambe enga ji uékaaka”.

²³ Ka Diósïri aiatsperakua jimbo, Dabiri sïrukua jémba Israeliri p'ímutantspirini, Jesusini kóntpesti.

²⁴ Enga Jesusi nótki janoempka, Juánu itsï atajtsïkua móantskueri iámendu ireta Israeli anapuechani arhijtsïkuasti.

²⁵ Ka enga Juánu imeri ánchekorhetani k'amarani jámempkia, uandasïrempti: “Ji no imeska engajtsï cha eranhaskani jaka, exe je, chúxapuxatirini ima engani ji no jamberi nitatarheka kuarhachichani kuerandukuani.”

²⁶ Erachicha, Abrani uájpecha, ka cha engajtsï Diósïni janhanharhijka, chájtsïsï íni uandakua p'ímutantskuerini axamenhaka.

²⁷ Jerusaleni anapuecha ka jima anapu juramutichaksï no mítetini k'amatasti úni Diósïri uandaricheri karakatechani enga mándani sábadu arhinhantajka.

²⁸ Ka ísku jatinksï Pilatuni arhispti eska uandikutarkorhepiringa.

²⁹ Ka engaksï úpka iámendu ambe enga imeri ambe xáni karakata jápka, krúsirhuksï késkuntaspti ka jatsintasptiksï.

³⁰ K'óru Diósï tsítantasti.

³¹ Jesusi sáni namuni jurhia imechani xarhakuantaaspti engaksï ima jinguni Galilea uératini Jerusaleni karhamantapka; ka iásïksï iretarhu imeri ambe uandantaxati.

³² Ka juchajtuksïni ambakiti aiangperakuani aianguntaxaka engaksï juchari tua anapuecha aiamenhapka,

³³ Diósïri aiatsperakuanchi jucha intsïnhaska, Jesusini tsítantatini, juchachi ima uájpeska; eska pirekuecharhu na arhijka: “T'úeskari jucheti Uátsïti; ka iásï ji chéti táteskia.”

³⁴ Ka tsítantasti ka nóteru tereatia, uandarixati: “Ísï eskani Dabini na kóndentaka, chánksïntuksïni májkueni kóndentaaka, ísïuati.”

³⁵ Ka jimbojtusï tamu karakata arhijti: “No jurajkuaka eska chéti Pímbinhaxeti tereaka.”

³⁶ Dabichka, jiájkani anapuechani marhuakuatinia eska Diósï na eratsetini jápka, uarhisti ka imeri tua anapuechani jinguni jántaspti ka teretsespti.

³⁷ Ka ima k'óru enga Diósï tsítantaka, ima k'óru no teretsesti.

³⁸ Erachicha, íni ambe mítetini ja je: Jimbokajtsï Jesusini jimbo k'amarhintskuecheri púatsperantskua aiangunhaxaka, ka sésimendujtsï kaxumberanhantaska engaksïni Moisesiri juramukua no úka kaxumberantani,

³⁹ ima enga Jesusini jakajkuaka, kaxumbentasïndi.

⁴⁰ Jinguntku ja je eskaksïni no chánksïni janocheaka ambe engaksï Diósïri uandaricha uandaka:

⁴¹ Exe je cha teresmarhpiticha, íni jurhiatekuechani ambe ma úxampka, ka nójtsï jakajkuaka nauejkiksïni aianguntani jarhani. Ískujtsï pakarera ka jimajkujtsï nóneuaka.

⁴² Ka engaksï judiuecheri k'umanchekua tángorhentskuarhu uéntapka, kómarhiasptiksï eskaksï máteru sábadu íni ambe uandaxekuapiringa.

⁴³ Enga tángorhekua k'amakurhipka, uánekuaksï judiuecha ka máteru engaksï judiouentapka engaksï Diósïni k'éri ambe arhimpka, Pábluni ka Bernabenksï chúxapaspti. Ka imaksï andajtsïteraasti eskaksï Diósïri kóntperakuani mintsikapiringa.

⁴⁴ Máteru sábadu jimbo sáno iámu ireta tángorhentasptiksï Diósïri uandakuani kurhani.

⁴⁵ Judiouechaksï xáni uáni exejpetini, epurheaxaptiksï ka ambe enga Páblu uandempka imaksï uinhachakusïrempti ka útantasïremptiksï.

⁴⁶ Jimajkanksï Páblu Bernabe jinguni ts'iuentaparini uandaspti: –Chájtsï urheta k'uaninchasïrempka eskajtsï Diósïri aiangperakuani aiangunhantapiringa; ka nóchkajtsï nitatarheska engajtsï no jiókorheka tsípekua méntkisï anapuni, jiájkani jucha no judiuechani aianguantaxaka.

⁴⁷ Jimbokajtsïni Acha ísï juramucheska: No judiuecheri erajkutarakuenkini axaska, eskari p'ímutantskuani ma parhakpeni páaka.

⁴⁸ No judiuechaksï íni ambe kurharini kánekuaksï tsípespti ka Acheri uandakuanksï k'éri ambe arhisïrempti, ka jakajkusptiksï iámendu ima engaksï tsípekua méntkisï anapuni míndakata jápka.

⁴⁹ Ka Acheri uandakua imani iretecharhu ísï mítekorhepaxapti.

⁵⁰ K'óruksï judiuecha, máru uarhitichani engaksï k'éri ambepka, ka engaksï tángorhentskuarhu jánhchempka inchajtsïtaaspti ka ístu iretarhu anapu achamasïchani eskaksï Pábluni ka Bernabeni jupiaapiringa ka tátsekuaksï petaatantaaspti.

⁵¹ Páblu Bernabe jingunksï imechani japarini t'upuriksï uauaduntaspti, ka Ikonioksï niraspti.

⁵² Jurhengorherichaksï kánekua tsípexapti ka Espiritu Sántunksï uinirhekotixapti.