Hechos 12 - Diósïri Karakata P´urheepecha Jimbo

Pédru ónhanhasti

¹ Imani jurhiatekuechani jimbo, irecha Erodesï máru jakajkutichani jupiaspti kuikirhiani.

² Ka Santiaguni, Juánueri erachi jémbani uandikutarkorhespti.

³ Judiouechani exearini eskaksï íni ambe kánekua jaiapanhentaspka, Pédruntu Páskueri k'uínchekuarhu jupirkorhespti.

⁴ Ka k'ataperakuarhu incharaspti, ka témbeni k'uímu p'urhejkutichani kuáritaaraxapti, jimboka k'uínchekua Páskueri nimatirku Pédruni iretani xarhatakuntani uékaxapka.

⁵ Pédrunchkaksï k'ataperakuarhu jatsispti, k'óruksï jakajkuticha no jurajkuntaxapti Pédruni kómarhijpekuni.

Pédru k'ataperakuarhu pétanhasti

⁶ Enga Erodesi Pédruni petakuekani jámempkia, Pédruni chúrekua k'uíxapti ka tsimani purhejkutichaksï mándani akandani jakuspti, ka tsimapuru tiámu tepekata jimbo jójkukata jarhaspti, ka ístuksï tsimani p'urhejkuticha k'ataperakuarhu anhamukuspti kuáni.

⁷ Ka jimajku Acheri ánjeli ma xarharaspti ka k'ataperakuarhu kánekua t'íkjantskaraspti. Ánjeli Pédruni p'áxukuspti ka enga tsínharhitapka arhispti: –“Jauara kókuani.” Ka tiámuechani chkéjkurhantaaspti.

⁸ Ka ánjeli arhispti: “Xukuparhantsï ka kuarhachichani jónduantsï.” Ka Pédru sóntku ísï úspti, ka ánjeli arhisptiteru: “Xukuparhantsï ka chúxapurini.”

⁹ Ka Pédru ánjelini chúngumaspti uéntani, méntku no úsïrempti jánhaskani eska ísïspka ambe enga ánjeli úni jápka, sánderu sáni tsánharhikueni jánhaskaxapti.

¹⁰ Ka p'urhejkutichani máru uanonhaskaaspti ka máteruechantu, k'ataperakuarhuksï andamukueraspti enga tiámu jimbo míkorhempka, ka jima jandiojku jatini mítakorhespti. Ka iretarhu inchaakuntaspti, ka ma ambokuta xanharaspti ka ánjeli jima kéndikukuspti.

¹¹ Pédru ambonhaskantaspti ka uandaspti: “Iásï kurhanguska eskarini Acha ánjelini jémbani axacheska engani Erodesïni úka uéjkuni ka uérakuni ambe engaksï judiuecha erokorheni jápka.”

¹² Ka enga úpka sési jánhaskantani Mariauo niraspti, Juánu Márkusïri amambo; jima enga uánekua tángorhenhantatini jápka uandamukukorhenhani.

¹³ Ka Pédru uámutaspti ka jántspiri ma kurhakorhespti enga Rode arhinhempka,

¹⁴ enga ima Pédruni míchakupka, xáni tsípeni k'uanhajpatsespti aiangpentani eska Pédru jamukutini jarhaspka ka no jamberi mítakuspti.

¹⁵ Ka arhintasptiksï: –¡Nájtumendu ísï, jánhaskandi jaka! Ka ima inchandimentaspti uandani eska jindespka. Ka imaksï arhintaspti: –Ánjeli jémbeti.

¹⁶ Ka Pédru uámutaxaptiteru. Mítatinksï exespti ka ískuksï pakareraspti.

¹⁷ Ka Pédru níjkurhakuaspti eskaksï pínasku japiringa, ka tátsekua aianguantaaspti na enga Acha k'ataperakuarhu petapka. Ka uandasptiteru: –Íni ambe Santiaguni ka erachichani aianguantsï je. Ka tátsekua uéntaspti ka máteru nani isï niraspti.

¹⁸ Enga na erandepkia, p'urhejkutichaksï mámaru ambe arhijperantaxapti Pédru nénaxamu nípi.

¹⁹ Jiájkani Erodesi jirinhatarkorhentaspti ka engaksï no úpka xéntani, p'urhejkutichani uándikutarkorheaspti. Tátsekua Erodesï Judea uératini Sesarea kétsemaspti ka jima pakaraspti.

Na enga Erodesï uarhika

²⁰ Erodesï Tíro ka Sidoni anapuechani kánekua ikiakuaxapti, jimesï anapuechaksï k'óru Blástusïni andajtsïteraaspti. Ima ireche Erodesïri ambe patsarispti, ka arhisptichkaksï eskaksï sési pájperapiringa jimbokaksï ima t'irekua, irecheri echericharhu tánakorhesïrempka.

²¹ Imani jurhiatekua enga Erodesï p'itajkorheapka, irecheni xukuparhantaspti ka imeri k'éri uaxantskuarhu uératini uandontskorhekuaxapti.

²² Jiájkaniksï uénaspti uínhachakuni: “¡No k'uiripusï ma uandani jati, Diósïsï uandani jati!”

²³ Ka Diósïri ánjeli ma Erodesïni jimajku uándikuspti, jimboka no Diósïni no k'éri ambe arhispka; ka karhasï ántskata uarhispti.

²⁴ Ka Acheri uandakua mítekorhepaxapti ka uánenhaxapti.

²⁵ Bernabeksï Sáulu jinguni, Jerusaleni uératini kuanhatsentaspti engaksï imecheri ánchekorhetani k'amarapka, ka Juánu Márkusïnksï pájtaspti.