Hechos 11 - Diósïri Karakata P´urheepecha Jimbo

Pédru aiangpentasti ambe enga xáni ima úka

¹ Jesusiri uandakua páricha ka erachicha engaksï Judea jápka, mítesptiksï eskaksï no judiuechajtu Diósïri uandakuani p'iraspkia.

² Jimboksïsï mínda jukaricha Pédru jinguni, mámaru ambe arhirperani jápti jiájkani enga Pédru Jerusaleni karhamantapka,

³ arhijperaxaptiksï: –¿Andirisï no mínda jukarichani inchaakukua? ¿Andirisï imecha jinguni t'irejki?

⁴ Ka Pédru aianguantaaspti eskamendu na úkorhepapka:

⁵ –Ji Jópe uandamukukorhexapka, ka jánhaskaspka: K'éri takusïni jásï ma exespka enga t'ápuru jórhupka enga auandarhu uératini kétseni jápka jíndeni andarherani.

⁶ Engani sési exeka, jimaksï jarhaspti iámendu járhati manakorhericha, engaksï t'ámu jantsiri jukaaka ka engaksï antsikukorhejka ka káraticha.

⁷ Ka kurhaaspka uandakuani ma engarini arhini jápka: Pédru jauara, uandikua ka auantsï.

⁸ Ka ji arhispka: Acha, nómbe, jimbokani ikichakua ambe nóna méni ts'émuska.

⁹ Ka ménderurini uandakua auandarhu uératini arhispti: Ambe enga Diósï sési jájkuka, t'u ásï arhi eska ikichakueska.

¹⁰ I ambe tanimu xanhari uéntaspti ísï úkorheni, ka tátsekua iámendu ambe karhanchetanhantaspti.

¹¹ Ka jimajkuksï niáraspti tanimu acheticha imani k'umanchekuarhu engani ji jájkuarheni jápka, engaksï Sesarea uératini axanhapka jíndeni jirinhantani.

¹² Ka Espiriturini arhispti eskani no jámapiringa tsimanitsimanearhani, eskani nipiringa imechani jinguni. Ka pámbesptijtsïni íksï kuímu erachicha, ka achetio máchi inchaspka,

¹³ engajtsïni aianguntapka na enga chéni jémbo ánjelini ma exepka enga anhandetini jápka ka arhini: Axaa máru Jópe, eskaksï niuaka Simonini p'irani, imani engajtuksï Pédru arhijka;

¹⁴ imakini arhiaati uandakuechani engari jimbo chénio anapuecha jinguni p'ímutantskateuaka.

¹⁵ Ka engani uénapka uandani, Espiritu Sántu imechani andajtsïkueraaspti, ísï eskajtsïni urhetku juchantsïni na andajtsïkuerapka.

¹⁶ Ka jiájkani míjpaspka enga Acha uandapka: Juánu sési jimbo itsï jimbojku itsï atajtsïkpesti, k'óru chájtsï Espiritu Sántuni jimbo itsï atajtsïkunhaaka.

¹⁷ Enga Diósï imechantu nitarhetaaka eskajtuksï ima Espiritu Sántuni p'iuaka májkueni eska jucha engachi Acha Jesukristuni jakajkuka, ji ambexamendueskini, ji no úpiringa Diósïni ójkutani jarhani.

¹⁸ Ísï kurhanhatini pínamanhaspti ka Diósïnksï k'éri ambe arhispti: –¡Sési jimbochka Diósï no judiuechankusï sésekua íntsaasti eskaksï móataaka, ka eskajtuksï méntkisï anapu ambakiti tsípekua jatsiaka!

Antiokia tángorhenhantasti

¹⁹ Ka ima engaksï etsakurhitini jámani jápka jiájkani engaksï Estebanuni atapka, máruksï Fenisia niraspti ka máteruksï Chípre ka máteruksï Antiokia isï niraspti, ka judiuechantkuksï uandakuani aianguantasïrempti.

²⁰ Ka imechani jingunksï jámaxapti máru Chípre ka Sirene anapuecha, engaksï Antiokia niáratini gríeguechani Acha Jesusiri ambakiti aiangperakuani aianguantaapka.

²¹ Ka Acheri uinhapekua imecha jinguni jarhaspti, ka uánekuaksï jakajkuspti ka Achanksï andarhentaspti.

²² Tángorhekua enga Jerusaleni jápka mítespti íni ambe ka Bernabenksï Antiokia axaspti.

²³ Enga Bernabe niárapka, ka exerini Diósïri kóntperakuani, kánekua tsípespti ka iámenduechani p'ímarheaspti eskaksï mintsita jinguni Acha jinguni japiringa.

²⁴ Ima acheti jarhojpiri mésti enga Espiritu Sántuni uinirhekorhetini jámempka ka Diósïni kánekua mintsikasïrempti. Ka uánekuaksï Acha jingunintaspti.

²⁵ Tátsekua Berbabe Társu niraspti Sáuluni jirinhantani ka enga exentapka Antiokia páspti.

²⁶ Ka jimaksï tángorhentaspti ma uéxurhini, ka uánekuechanksï jurhendaaspti. Ka Antiokiaksï uénaspti imani engaksï Jesusini mintsikempka: “Kristianuecha” arhiani.

²⁷ Ima jurhiatekuechani jimbo, Diósïri uandarichaksï máru Jerusaleni uératini Antiokia kétsemaspti.

²⁸ Ka jauaraspti ma uandani enga Agabo arhinhempka, jánhastpexapti Espiritu jimbo eska ma parhakpeni k'éri k'arhingua japiringa; ka ísï úkorhespti jiájkani enga Kláudio irechepka.

²⁹ Ka Antiokia anapu jakajkutichaksï, pakatperaspti eskaksï mándani arhini ambe engaksï sáni úpiringa, Judea anapu erachichani axakuapiringa;

³⁰ ka Bernabe ka Sáulu jiniguksï Jerusaleni anapu jakajkuticheri urhejtsïkurichani ambe axakuaspti.