Hechos 10 - Diósïri Karakata P´urheepecha Jimbo

Pédru Kornelio jinguni

¹ Sesarea acheti ma irekaxapti enga Kornelio arhinhempka, enga p'urhejkuticheri Italia anapu arhikatecheri urhejtsïkuripka.

² Ima chéni jémbo anapuecha jingunksï kánekua jarhojpeni jarhasïrempti, ka Diósïnksï janhanharhiparini irekaspti. Ka judiuechani jarhuataasïrempti ka Diósïni méntkisï kómarhikuarheni jarhasïrempti.

³ Ka ima, ma jurhiatekua téjkamatiru ísï jánhaskaspti na enga Diósïri ánjeli ma inchakupka ka arhini: “¡Kornelio!”

⁴ Ka ima ísku pakareraspti erateni ka chétku arhispti: “¿Ambe Acha?” Ka ánjeli arhispti: “Diósï kurhastia ambe engari uandamukukorheka ka chéti jarhojperata exestia, ka kánekua tsípexati.

⁵ Axaa kókuani máru achetichani Jópe, eskaksï niuaka Simonini p'irani, imani engajtuksï Pédru arhijka.

⁶ Ima Simonio jarhasti, imo enga sïkuiri ambakerani ánchekorhejka enga k'éri japundarhu uanakutini irekaka.”

⁷ Enga ánjeli uandaxekupka, kéndikuspti ka Kornelio tsimani imeri jántspirichani ióarhiaspti, ka p'urhejkuti jakajkutini ma enga ima mintsinharhimpka,

⁸ aianguantaspti ambe enga úkorhenchapka ka Jópe axaaspti.

⁹ Ka pauandekua teruxutini ísïspti engaksï ima iretarhu niárani jápkia, Pédru taiatsïtakatarhu karharaspti uandamukukorheni.

¹⁰ Ka uinhamendu karhimaspti ka ambe akuekaxapti; ka engaksï úmakuntani jápka jimajku uénaspti jánhaskani:

¹¹ Auandani mítakorhetini exespti ka takusïni jásï ma kétsexapti enga t'ápuru jórhupka,

¹² ka jimaksï jarhaspti iámendu jarhati manakorhericha, engaksï t'ámu jantsiri jukaaka ka engaksï antsikukorhejka ka káraticha.

¹³ Ka jimajku nema uinhachakuspti: “Pédru, uandikua ka auantsï.”

¹⁴ Jiájkani Pédru mókuspti: “Nómbe Acha, ji nómeni arhaska ambe enga juramukua no jiámukpejka.”

¹⁵ Ka jimajku ménderu uandakua arhintaspti: “Ambe enga Diósï sési jájkuka, ásï arhi eska ikichakueni jáxeska.”

¹⁶ Tanimu xanhari májkueni úkorhespti; ka takusï auandarhu p'íkunhantaspti.

¹⁷ Ka Pédru méntku no jánhaskeraspti ambesï arhikuekeni enga ísï jánhaskapka, ka acheticha enga Kornelio axaapka, kurhangorhetinksï nani enga Simoni irekapka, chéni jémboksï andamukueraspti.

¹⁸ Ka uámutatspesptiksï ka kurhangorhesptiksï jimaxamu jajkuarheni japi acheti ma enga Simoni arhinhajka, ka engaksï Pédru arhijka.

¹⁹ Ka enga Pédru eratsentani jápka ambe enga jánhaskapka, Espiritu arhispti: “Tanimu achetichaksïni jirinhantaxati.

²⁰ Kétse kókuani, ka ásï tsimanitsimanearha ka ni imechani jinguni, jimbokani ji axaaska”.

²¹ Pédru kétsespti ka achetichani enga Kornelio axaapka arhiaspti: –¿Jíndentsïnisï jinhantajki? ¿Ambesï k'uani?

²² Ka imaksï arhispti: –Pímbinhasï ánjeli ma Kornelioni arhisti eskari niuaka cheni jémbo, ima p'urhejkuticheri urhejtsïkuristi, kaxumbesti ka Diósïni janhanharhiparini irekasti ka judiuechaksï sési ambe uandakuntasïndi, erokaxatikini ka kurhajchanikini uékasïndi ambe engari t'u arhiaka.

²³ Jiájkani Pédru incharaaspti ka jima jájkuarhetaaspti. Ka pauandekua jauaratintku imecha jinguni niraspti ka máru Jópe anapu erachichaksï pámbeaspti.

²⁴ Pauandekuaksï Sesarea inchaakuspti ka Kornelio chéni jémbo anapuechani jinguni ka pámpiri jémbecha jinguni enga ima sánderu uékauempka erokaaxapti.

²⁵ Enga Pédru ínchapka, Kornelio erokatintku uandajpasti ka tinguixurhikutini k'éri ambe arhispti.

²⁶ K'óru Pédru jauataspti arhiparini: –Anhaxurhintsï, jíjtuni k'uiripueska.

²⁷ Ka uandajperatinksï, ima jinguni inchaspti ka jima exeaspti uánekuechani engaksï jima tángorhentatini jápka.

²⁸ Ka arhiaspti: –Chájtsï míteska eska juramukua, judioni ma no jiáretasïnga uérakua anapu ma jinguni jarhani, k'órurini jíndeni Diósï exerasti eskani ji nónemani arhiaka eska ikichakueni jáxeska o eska no pímbinhaxeska.

²⁹ Ísï jimbosïni uékaka jurhani engani ioarhinhaka. Ka iásï uékapiringa míteni, ¿Andijtsïnisï ioarhi?

³⁰ Ka Kornelio uandaspti: –T'ámu jurhiatekuestia engani juchenio téjkamatiru uandamukorheni jápka, ka achetini ma exeska urhepandini jacheni t'uput'upusï xukuparhatini,

³¹ ka arhisptirini: Korenelio, Diósï chéti undamukukorhetani kurhastia, ka chéti jarhojperatani exestia.

³² Jópe axajpe ka p'itajkorhe Simonini engajtuksï Pédru arhijka enga Simonio, ima enga sïkuiri ambakerajka enga k'éri japundarhu uanamukutini irekaka, imecho jájkorhexati.

³³ Ísï jimbosïni sóntku axajpeka eskaksïni nipiringa jirinhantani, ka sésiri úska ixu jarhania. Iásïchkani jucha ixu jarhaska Diósïni japarini ka kurhajchaksïni uékaxaka ambe engakini Acha juramucheka.

Na enga Pédru Koreliouo uandaka

³⁴ Jiájkani Pédru uénaspti uandani: –Iásï jánhaskaskia eskachi Diósïni jimbo iámenduecha májkueni járhaska,

³⁵ ka eska nani uéjki Diósï sési exeasïnga imechani engaksï janhanharhijka, ka engaksï sési ambe újka.

³⁶ Diósï axakuaspti Israeli uájpechani, ambakiti aiangperakuani sési pájperakueri Jesukristuni jimbo, enga iámenduecheri Acheka.

³⁷ Chájtsï mítetixaka ambe enga úkorhepka Judea ísï, Galilea uénani ísï tátsekua enga Juánu itsï atajtsïkperakueri ambe arhijtsïkpepka:

³⁸ Na enga Diósï Espiritu Sántueri uinhapekuani íntskupka Jesukristu Nasareti anapuni, ka na enga ima jámempka sési ambe úparini, ka ambakerantaaparini imechani enga nóambakiti nósesi kántauempka, jimboka Diósï Jesusi jinguni jarhaspka.

³⁹ Jucha exekorheska iámendu ambe enga Jesusi Judea ka Jerusaleni úka, imani engaksï cháparhataparini uándikuka.

⁴⁰ K'óru Diósï tanimu jurhiatekua jimbo tsítantasti, ka xarhatachentasptijtsïni,

⁴¹ no iámenduechani xarhakuantaaspti, juchantsïntku engachi exekorheka ka engajtsïni Diósï erakutini jápkia, jucha engachi ima jinguni t'ireka ka itsïmani enga ima tsíntapka.

⁴² Ka juramuchestijtsïni eskachi aiangpentapiringa eska Diósïni imanisï uarhiricheri ka tsípiticheri arhinharhikpirini pérakuaka.

⁴³ Íri ambeksï iámendu Diósïri uandaricha uandantapti, eskaksï iámendu ima engaksï imani jakajkuaka, eskaksï imeri jakangurhikua jimbo k'amanharhintskuechani púamenhantaaka.

No judiuechaksï Espiritu Sántuni p'irasti

⁴⁴ Enga Pédru íni ambe uandani jápkateru, Espiritu Sántu iámenduechani andajtsïkueraspti engaksï kurhani jápka.

⁴⁵ Ka ima engaksï juramukuani janhanharhijka, engaksï Pédru jinguni nípka ískuksï pakareraspti engaksï no judiuecha jámberi nitatarhepka Espiritu Sántuni p'irani,

⁴⁶ jimbokaksï kurhajchaaspka máteru uandakuechani jimbo uandani ka Diósïnksï k'éri ambe arhini.

⁴⁷ Jiájkani Pédru arhiaspti: –¿Andi nema no jiáretaua íchani eskaksï íjtu itsï atajtsïkunhaaka engaksï Espiritu Sántuni p'ikaia ísï eskachi jucha?

⁴⁸ Ka juramuspti eskaksï Jesukristueri jakangurhikua jimbo itsï atajtsïkunhapiringa. Jiájkanksï Pédruni kómarhispti eska namu jurhia imechani jingunderu pakarapiringa.