Hebreos 7 - Diósïri Karakata P´urheepecha Jimbo

Jesusi, májkueni tátesti eska Melkisedeki

¹ Ka Melkisedeki, enga Salemi ireta irechepka ka Diósï auandarhu anapueri táteni, ima enga Abranini nípka kúntani, ka újchakurani, jiájkani enga junguani jápkia irechechani andaarini.

² Ka Abrani, imani íntskuspti andakateri sáni enga maiamperantskueka ka enga imeri jakangurhikua jamberi “Kaxumbekueri irecha” arhikuekajka ka engajtu, Salemi anapu irechani, enga “Sési jakueri irecha” arhikuekajka,

³ no kámsïndi tátjembani, níjtu amambani, níjtu némani kángorhejki, no mítenhasti káni andajpenuski, ni káni uarhiski ka ísï eska Diósï Uájpa, méntkisï tátexati.

⁴ Exe je eska xáni k'éri ambepka enga juchari ióntki anapu Abrani imani íntskupka andakateri sáni enga maiamperantskueka, ka imani ambe íntskuni enga sánderu jukaparhakuepka.

⁵ Ísïsti eskaksï Lebi uájpecha, engaksï tátekua p'irajka, juramukua jimbo arhikata jarhasti eskaksï imeri márkuecheri andakata maiamperantskua p'iuaka, náuejkiksï imajtu Abraniri sïrukueni;

⁶ Ka Melkisedeki, náuejki no Lebiri sïrukuepka, ima p'iraspti Abraniri andakata sáni enga maiamperantskueka, ka újchakuraspti imani enga Diósïri aiatsperakuechani káani jápka.

⁷ Ka nónema uandaati eska k'érisï újchakurajka sapichuni.

⁸ Ka ixu, andakata sáni enga maiamperantskueka, parhakpeni anapusï p'irajti; enga úka, uandanhasïndi eska Melkisedeki tsípiti jámaxaka.

⁹ Ka ísï jámani Lebijtu, Melkisedekini andakateri maiamuspti enga Abranini íntskupka, náuejki ima p'irajka andakata maiamperantskueri,

¹⁰ jimboka tátjemba t'uíni Lebi jinguni jámaxapkia, jiájkani enga Melkisedeki kúntani nípka.

¹¹ Enga úpiringa tátekua Lebichani jimbo k'amak'amasï espiritu p'inhani, ¿Ambeteruchi úrapirinia máteru tátani enga imajtu Melkisedekini jásïpiringa? ¿Ka enga no “Aaronini jáxepiringa”?

¹² Jimboka eka, tátekua ménderuenintaska, juramukuajtu ménderuenintaati.

¹³ Jimboka ima engachi uandatseni jaka, máteru ireta anapueska, jima anapuesti enga nónema marhuarika tiósïo kéjtsïtakuarhu.

¹⁴ Ka sési xarharaxati eska juchari Acha, Juda anapuespka, ka Moisesi imani iretani nósani uandasti enga tátekua ambe uandani jápka.

¹⁵ Iámendu inde ambe sánderu sési jánhaskorhesti, enga ísï xarharaka máteru táta, Melkisedekini jásï ma,

¹⁶ enga no parhakpeni anapu jimbo táta únhaka, enga ima irekua xarhataka enga nónema újka xerentani.

¹⁷ Jamberi imeri ambe arisï uandakata jarhasti: “T'úri méntkisï táteska, májkueni jásï ma eska Melkisedeki.”

¹⁸ Ísï jámani juramukua urheti, xerekorhentasti, jimboka no uinhapekua jukaska ka jimboka no marhuaska,

¹⁹ jimboka juramukua nómbema k'amak'amasï séserantaska, jimboka uénatarakuajkuespka, eskachi ísï jámani sánderu ambakiti ambe mintsikapiringa, engachi jimbo Diósïni andarherajka.

²⁰ Ka no ískuespti; uandakua jukaparharatarakua jimboespti, ka máteruechaksï ískuespti,

²¹ ka inde uandakua jukaparharatarakua ima ísï uandaspti: “Acha uandastia ka no mómuntaati: ‘T'úri méntkisï táteska.’ ”

²² Jimbosï Jesusi pakaratspti ambakiti méni jati, enga úaka Diósï jinguni márkuenhantani.

²³ Ka támuksï ima tátecha uánespti, jimbokaksï no ióni jámsïrempka.

²⁴ Ka inde k'óru méntkisï anapu tátekua kámsïndi, jimboka méntikisïska.

²⁵ Jimbojtusï újti p'ímutantaani imechani engaksï imeri jimbo Diósïni andarherakorhentajka, jimboka méntkisï tsípiti jarhasïnga ka úsïndi uandapetspeni.

²⁶ Xásï k'éri táta máchisï uétarhenchani jápka: Kaxumbiti ma, enga nómbema nósesi niátaka, ka enga nómbema nósesi jásï jukaraaka, ka enga no pírekorheajka k'ámanharhintstichani, enga auandarhu sánderu karhakua péranhaka,

²⁷ enga no uétarhenchajka eska mándani pauani urheta ambe ma aiatspentaaka imeri k'amanharhintskua jimbo, ka jimajku ireteri k'amanharhintskua jimbo kéjtsïtani, ísï eskaksï máteru táta k'ératicha ka iámendu indeni ambe, ma jimbojku ísï úti, enga aiakorheka.

²⁸ Jimboka juramukua, k'érati táteni imani péraasïnga engaksï no uinhapekorheka: Enga úka, uandakua enga jukaparhaka, ka enga juramukua jinguni tátsekueka, uájpani táta ústi, imani enga k'amak'amasï sésika ka enga méntkisïuaka.