Hebreos 4 - Diósïri Karakata P´urheepecha Jimbo

¹ Ju je Diósïni chénharhini, jimboka uandarixaka eskaksï máru imeri mintsikorhekuarhu no inchaaka, jimboka jámaaka cha ma ísï pakarakuni ka no niárani.

² Májkueni eskaksï ima, juchajtuchi jimbanhe aiangperakua ma aiangunhaska, enga úka, imechani no marhuakuasti jimbokaksï no jakajkukua jimbo májkuentatixapka imecha jinguni engaksï kurhapkia.

³ Juchachi incharixakaia engachi jakajkutika, enga Diósï uandaka: “Jimbosïni ikiatini uandaka eskaksï mintsikorhekuarhu no inchapiringa.” Enga úka, Diósï parhakpenini úni jámani imeri ánchekorhetani méntku k'amaraspti;

⁴ jimboka karakatarhu mápuru jataska eska iúmu tsimani jurhia úni jámani: “Enga na iámu ambe k'amarapkia, iumu tsimani jurhia úni jámani, Diósï mintsikorhespti.”

⁵ Ka eska na uandapkia: “Nóksï inchaati jucheti mintsikorhekuarhu.”

⁶ Ísï jimbo, sési jánhaskatini eskaksï máru inchaaka, ka eskaksï no inchaska, urhetku aiangperakua p'iticha jimbokaksï no kurhandiraska.

⁷ Ka Diósï máteru jurhia míndasti, enga iásïka, Dabini xáni ióni jimbo imani karakakata jimbo uandarasti enga arhijka: “Ekajtsï iásï Diósïni kurhajchakorheni jaka ambe enga uandani jaka, mintsitani ásï chúpera je.”

⁸ Jimboka, ekaksïni Josue jiáretapiringa eskajtsï mintsikorhepiringa, Diósï tátsekua máteru jurhiatekueri ambe nóteru uandapirindia.

⁹ Jimbo, sési kurhangukorhesti eska jakajkuticheri jimbo, k'éri mintsikorhekua janoxaka.

¹⁰ Jimboka ne enga ísï mintsikorhejka eska Diósï, iámu imeri ánchekorheteri mintsikorhesïndi ka Diósïjtu mintsikorhesïndi.

¹¹ Ju je jángorhentani xásï mintsikorhekuarhu inchani, eska ísï jámani nónema imechani chúngumauaka engaksï no jakajkupka.

¹² Diósïri uandakua sési jimbo tsípitisti ka sési ambe úsïndi, ka sánderu uinhamu akuarhpesïndi eska náki uéjki tiámu atajpetarakua enga tsimoru uarhomujka. Jima jamberi inchakutspesïndi engaksï kurhangukua espiritu jinguni arhukurhijka, ka kutukuecharhu jamberi ka únirhu teruakuni jamberi, ka p'ikuarhenhekuechani ka eratsekuechani miiuntspeantaasïndi.

¹³ Ima iámendu ambe exeni jarhasïndi ka nónema úsïndi jirikorhekuni; ima iámendu ambe xéntasïndi, ima engachi iámu ambe jurhimbitku aianguntaaka.

Jesusi Táta p'amojkpiristi.

¹⁴ Engachi xáni k'éri tátani jatsikorheka, Jesusini, Diósï Uájpani, enga auandarhu inchaka, ju je kánekuamendu jakajkuni jarhani.

¹⁵ Jimbokajtsïni juchari k'éri táta sési kurhangucheaka engachi no úni jarhajka p'íngukorheni, jimboka imajtu májkueni ts'éjkunhaska; enga úpka, ima nómeni k'ámanharhintasti.

¹⁶ Ísï jimbo, ju je Diósï kóntpiriri k'éri uaxantskuarhu nósani chéparini andarhentani, eskachi kóntperata íntsïnhaaka ka eskajtsïni jarhuataaka na engachi jatini uétarhenchaaka.