Hebreos 3 - Diósïri Karakata P´urheepecha Jimbo

Jesusi Moisés jinguni sánderu k'éri ambesti

¹ Ísï jimbo, tatecha ka nanecha engajtsï kaxumbitika, engajtsï auandarhu anapu ambe jingunikia, kurhajcha je Krístuni, imani enga juchari jakajkukueri uandakua párika ka táta k'érini;

² enga Diósïni, imani enga erakuka, nómeni jurajkujka, májkueni eska Moisesijtu na nómeni jurajkuntaka iámendu imeri k'umanchekuarhu anapuechani marhuakuani.

³ Ka Jesusi sánderu k'éri xénhasti eska Moisesi, májkueni eska na sánderu k'éri xénhajka ima enga k'umanchekuani újka eska k'umanchekua.

⁴ Jimboka jarhaska nema enga k'umanchekuani úka; ka iámu ambe Diósï ústi.

⁵ Diósïri k'umenchekuarhu Moisesi kurhandiraspti, jántspiriparini, ka uandantapasïrempti ambe enga xáni Diósï uandempka.

⁶ Ka Krístu chénjembo urherukusïndi eska uájpa ma enga imeri márkuechani nómeni jurajkuajka; ka engajtsïni juchantsïni nómeni jurajkujka, ekachi nómeni jurajkuni jauaka mintsikani ka ekachi méntkisï tsípekua jinguni mintsikani jauaka.

Ásï jáma je jurajkpeni

⁷ Eska Espiritu Sántu na uandajka: “Ekari iásï Diósïni kurhajchaska,

⁸ ásï chupera je mintsita eska jiájkani engajtsï no kurhandirakupka eska jiájkani engajtsï Diósïni ts'éjkupka jima enga nónema irekaka,

⁹ jima engajtsïni chári ióntki anapuecha ts'éjkupka náuejkijtsïni tsimani ekuatse uéxurhini exepkia ji ambesïni úni jápi.

¹⁰ Jimbosïni jiájkani anapuechani ikiakuapka, ka uandaspka: ‘Méntkisïksï mintsitarhu tsînchetini jámaxati; nóksï uékasïndi jucheti xanharichani míteani.’

¹¹ Jimbosïni ikiatintku uandaka eskaksï ísï jámani jucheti mintsikorhekuarhu no inchaaka.”

¹² Tatecha ka nanecha, xéparini je: Ásï nema xáni nósesi jásï mintsita káme, enga jamberi Diósï tsípitini jarhareaka;

¹³ sánderu sáni, chúskuta je p'imarhperani, eska nónema jámaaka k'ámanharhintskua jimbo mintsita chuperani.

¹⁴ Jimbokachi Krístuni jinguni márkueskia, ekachi sési anhaxurhikorhetini jauaka mintsikani májkueni eskachi uénani jámantki na mintsikani jápka.

¹⁵ Enga arhijka: “Ekajtsï Diósïni iásï kurhajchaska, mintsitani ásï chupera je, eskaksï ima engaksï Diósïni no kurhandirakuka.”

¹⁶ ¿Ka néksïsï no kurhandiraku Diósïni náuejkiksï kurhajchapkia? ¿Andi nóksï imeski enga Moisesi Ejiptu euajpeantapka?

¹⁷ ¿Néchanisï Diósï tsimani ekuatse uéxurhini ikiakuapki? ¿Andi no imechanisï ikiakuapi engaksï k'ámanharhintapka, imechani engaksï jima andatseraka uarhini enga nónema irekaka?

¹⁸ Ka ¿Andi no imechanisï arhia eskaksï mintsikorhekuarhu no inchaaka ima engaksï no kurhandiraka?

¹⁹ Ka ísï jámanichi exexaka eskaksï no úska inchani jimbokaksï no jakajkuska.