Hebreos 12 - Diósïri Karakata P´urheepecha Jimbo

Nósesi nitamakuarhu uinhapentskua

¹ Jimbo, engachi xáni uáni jatsikorheaka imechani, engaksï jakajkukua xarhatani jaka, ju je k'ámanharhintskuechani ka nósesi jásï ambe uauarhekorhentani, ka ju je uinhapekua jinguni kúmani ambe engajtsïni ts'éjperakua janocheska,

² Jesusini sési erateparini, imani enga jakajkutpeni uénajka ka enga jakajkutpejka, ima enga uékaka eska krúsirhu cháparhatanhapiringa náuejki xáni k'uratsekua ambepka ka enga iásï Diósïri juramukuarhu tirerkandani uaxakatini jaka.

³ Chájtu imani eranhakua p'itaku je, enga k'amanharhintstichani jimbo ísï kánhaka, ka no jámani je chkétakorheni.

⁴ Nótkijtsï méni kuájpekorhexaka enga k'uanika iurhiri jamberi tsîtani xáni k'amanharhitskuani no jiókorheni.

⁵ Mirikurhiskajtsïa imani engaksïni: Jucheti uátsïti arhika: “Jucheti uátsi, ásï no jiókorhe, Acheri jurhimberperata, ka ásï chkétakorhe engakini xukaska.

⁶ Jimboka Acha imanisï jurhimberajka néni enga xénhchajka, ka iámendu imechani enga imeri sapini míngorheajka, ataasïndi.”

⁷ Nósesijtsï nitamakorhexaka jimbokaksïni uéksïnga jurhimberantani. Imeri sapinksïni kámasïndi, ¿Andi náki sapi no jurhimberanhasïnki?

⁸ Ka ekachi ambe no jurhimberanhaska, eska iámenduecha na jurhimberanhajka, arhikuekasïndi eskachi máteru uájpeska ka nóchi ima uájpeni.

⁹ Ka támu, jatsikorheaspkachi juchari tátechani engajtsï anhanhatakua íntskuka, engajtsïni jurhimberempka, ka juchachi janhanharhiasïrempka. ¿Andi no sánderu sésiski Espirituecheri Táte auandarhu anapuni iámu kurhandirakuni, ka ísï jámani, sési irekani?

¹⁰ ¡Nándijtsïni ima imeri jurhengua jimbojku jurhimberempki ka enga namoni jurhiajku marhuapiringa! Ka imajtsïni juchari sési jimbosï jurhimberani jati ka eskachi juchajtu intsïmbenhaaka imeri kaxumbekua

¹¹ Ísïsti eska nóma jurhimberperakua sési p'ikuarherakorheska, sánderu sáni p'amesïndi; enga úka, tátsekua xarhakuantaasïndi sési jakua, engaksï nómbema úkorhenchaaka, imechani engaksï jurhenaaka jurhimberperakua p'irani.

¹² Jimbo, tarhatantsï je jájkichani engaksï andatserani jákaia, ka jauataa je jurhintskuechani engaksï xúrini jaka

¹³ ka jurhimberantskantsï je xanharichani engaksï nósesi jándepka, eska ambakentaaka ima enga no újka xanharani, ka no sánderu kánerani p'amenchakua.

¹⁴ Jángorhentsï je iámenduecha jinguni sési jarhani, ka kaxumbeni, jimboka eka no ísïuaka nónema úati Diósïni exeni.

¹⁵ Exeni ja je eska nónema no jiáretanhaaka eska Diósï kóndeaka; ka eska ísï jámani, nónema sïrangua k'ameri jukaaka ka nójtu máteru nemani pájtamani.

¹⁶ Eska nónema Esaueni jámaaka: Ísku jándi úkorheni, enga máxanhari t'irekua jimbojku imeri urhetikuani atarantaka.

¹⁷ Míteskajtsïa enga tátsekua uékani jápkia eska újchakuranhapiringa; ka nóteru jiókorhenhania, ka no úspti mójtsïtpentani, náuejki uérani jápka.

¹⁸ Chájtsï no imani ambe andarheraska enga p'ikuarherakorheka: Chpíri, pájpakandekua, kánekua pájpakandekua, akuitse janikua,

¹⁹ sïuangua kúskani, ka xáni uinhachamenhani engaksï jamberi uandakorhepka eskaksï xántku uandaxemenhapiringia.

²⁰ Jimbokaksï no úsïrempka kurhandirakuni imani enga arhimpka: “Ne enga juatarhu atastaaka, ne uéjkini, náuejki manakorheri méni, tsakapkurhantsï je imani.”

²¹ Nósesi jánhaskorhespti jimbosï Moisesi jamberi uandapti: “Manaraxaka xáni chéni.”

²² Ka jimini ménderueni, chájtsï andarheraska Sióni juatani, enga Diósïri tsípitiri k'éri ireteka, auandarhu anapu Jerusalenini ka exeaskajtsï uánekua ánjelichani engaksï tángorhentatini jaka Diósïni k'éri ambe arhini,

²³ ka imechani exeani, uájpa urhetichani, ka Diósïni enga iápuru ísï arhinharhikpirika ka kaxumbiticheri espirituni engaksï niántakia,

²⁴ ka Jesusini, enga jimbanhe pakatperakueri maiampetspitika ka iurhirini engachi jimbo iámu p'imbinhajkunhantaaka enga Abeliri iurhiri jinguni sánderu ambakitika.

²⁵ Ásï jáma je no kurhakuni imani engaksïni uandajpani jaka; nándiksï imajtu no úia andi uérakuani engaksï no jiókorheka eska parhakpeni anapu arhijkutaauaka; juchachi sánderu no úaka ekachi no kurhaska imani egajtsïni auandarhu uératini uandajpani jaka.

²⁶ Jiájkani imeri uandakua eratsetarpentaspti. Ka iásïjtsïni arisï aiachexati: “Ménderu uéntaaka jencherani ka nóteru echerirhuterkia; auandantuni jencheraaka.”

²⁷ Enga arhijka “Ménderu,” arhini. Arhikuekaxati eska manatanhaaka ima ambe enga úkateka, jimboka úkateska, ka eska ísï jámani méntkisï jauaka ima ambe enga no úkateka.

²⁸ Jimbochisï jucha engachi p'ikaia irechekua enga no újka manatanhani, no euanhantaaka kóntperata, ka indeni jimbochi Diósïni aiakuntaaka ambe enga ima jaiapanhentaaka, kánekua k'éri ambe arhiparini ka kánekuamendu janhanharhiparini,

²⁹ jimboka juchari Diósï chpíriska enga apejpentka.