Hebreos 10 - Diósïri Karakata P´urheepecha Jimbo

Ióntki anapu juramukua no marhuasïndi

¹ Moisesiri juramukua k'umandajkuespti imani juramukueri enga jupiringa, no ísïsptimendu, nómeni úati iámu séserantaani imechani engaksï andaparhakuentajka imani jimbojku enga mándani uéxurhini aiatspenhantajka.

² Jimboka eka úpiringa, ¿Andi nóksï jámapirini nóteru aiatspentania ima engaksï pimbinhaxentapiringia?

³ Enga úka, sánderuksï mándani uéxurhini miántasïndi ambe engaksï xáni k'amanharhintstika,

⁴ jimboka uákasïri ka chibueri iurhiri no úsïnga k'amanharhintskuechani p'ikurhpeantaani.

⁵ Jimbosï Krístu enga andajpenuni jámempka Diósïni arhipti: “Nori uéksïnga aiatspentskua ambe níjtu kéjtsïtakua ambe, k'óruni anhanhatakua ma íntskuska.

⁶ Nóri jaiapanhentasïnga eskaksïni ambe ma aiachentaaka níjturi uéjki eskaksïni kéjtsïtacheaka mintsikaparini eskari k'amanharhintskua p'ikurheantauaka.

⁷ Jimajkani uandaska: ‘Diósï, ixu jarhaska, eska na karakata jaka jucheti ambe, imani ambe úni Diósï, enga t'u eratsetini jaka.’ ”

⁸ Krístu arisï uénaspti uandani: Aiatsperantskua ambe, ka manakorheri kéjtsïtakata ambe, ka k'amanharhintskueri aiatsperantskua amberi t'u no jaiapenhentasïnga, nájkiruka juramukuarhu ísï arhijka.

⁹ Ka útasï uandaspti: “Jurhaxaka imani ambe úni engarini t'u juramucheaka.” Xérentsï urheta anapu juramukuani ka jimbanhe ma péntsï.

¹⁰ Ka kaxumbentasïngachi jimboka Krístu ma xanharku ka enga méntkisï marhuauaka aiakuntaska imeri anhanhatakuani, eska Diósï na eratsetini jápka.

¹¹ Ka tátechaksï pauanipauani anhandentasïndi uandatsekorheni ka méntku úndani májkueni jásï ambe aiatspentani, enga nómeni újka k'amanharhintskua p'ikurhpentani.

¹² Ka Jesusi k'óru k'amanharhintskuechani jimbo ma xanharku aiakorhentasti, ka Diósïni t'irerkandani jakusti ka nóteru méni kénditanhaatia,

¹³ ka jima jauati erokorheni engaksï jamberi imeri ikiatspiricha jatandunhantaaka.

¹⁴ Jimboka ma xanhari jimbojku aiatspentatini iámu séserantaaska kaxumberantskatechani.

¹⁵ Espiritu Sántujtujtsïni inderi ambe aianguntasïndi enga uandajka:

¹⁶ “Arini ambesïni pakatperaaka ísï tátsekua enga na úkorheakia, Acha uandasïndi: Jucheti juramukuechani mintsitarhu pérakuauaka ka sési pakajtsïtauaka

¹⁷ ka uandastiteru: Ka k'amanharhintskuechani ka ísku ambe niátakua mirikurhikuauakia.”

¹⁸ Ka enga púatsperanhantajkia, nóteru uétarhesïndi eska kéjtsïtakua ambe kánhaaka nóna k'amanharhintskua p'ikurhperanhantani.

P'imarhperata eska no jámaaka jurarkperanhani

¹⁹ Tatecha ka nanecha engaksïni jucha xáni xénhchajka, iásï k'óruchi sési mítetixaka eskachi Jesusiri iurhiri jimbo úakia sánderu no chéparini inchani pímbinhandekuarhu,

²⁰ imani jimbanhe ka tsípiti xanhari jatani, enga Krístu uénaka úrani arhunhekuarhu ísï, enga imeri anhanhatakueka,

²¹ ka k'éri ma tátanchi jatsikorheska enga tióstani urherukuni jaka,

²² ju je mintsita jinguni andarhentani, k'ámak'amasï jakajkuparini, mintsitechani pímbinhajkuantaatini, eska nómbema nemani pakanhekutini jauaka ka ambakiti ítsï jimbo jikuantatini.

²³ Ju je sési anhaxurhikorhetini mintsikani jarhani, jimboka ima nómeni jurajkpesïnga enga aiatspitika.

²⁴ Ju je exejperani jarhani eskachi jurhengorheaka jarhojperani ka sési ambe úni,

²⁵ ka nójtu jurarkuni tángorhentani jarhani, eskaksï máru na nóteru tángorhentka, sánderu sáni, ju je tsíperperantani, sánderia iásï engachi exeni jaka eska jurhiata janonguaxakaia.

²⁶ Jimboka ekachi k'amanharhintaska miákorheparini ka mítetini imani ambe enga isïka, imani k'amanharhintskua jimbo nóteru ambe ma úatia aiatspentani,

²⁷ imanderukusï erokorheni jauatia enga arhinharhikperanhaaka ka chpíriri kurhunhperakua sóntkusï no kurhandirechani auantauati.

²⁸ Eka nema no kurhandirakuska Moisesiri juramukuani, nósani p'amojkunhasïndi uándikunhani, engaksï tsimani o tanimu uandakuntaska.

²⁹ Nójtsï eranhaskasïnki eskaksï sánderu ikimenhaaka ne enga Diósï uájpani t'auandurhintaka, ka engaksï Krístueri iurhirini ikichaka, imani iurhirini enga sántuerantaka, ka enga Espírituni jamberi útakuka, nándijtsïni ima kóndejki.

³⁰ Jimbokachi míteska imani enga uandaka: “Ji mítetarauaka; Ka uandastijtu: Iretani Acha arhinharhikuati.”

³¹ ¡Kánekua nósesisti eskari Diósïni ísï andarhentaaka!

³² Míantsï je engajtsï jima nimatiru p'ípkia imani enga isïka, uétarhespti eskajtsï p'ikuarherapiringa néna enga úkua jukajka uinhamu uarhipeni,

³³ ménichani jimbokachi uánekua japarini nósesi arhinhasïnga ka atanhani; ka ménichani imechani jarhuataani jámani engaksï májkueni nósesi kánhani janhapka.

³⁴ Jimbokajtsï chájtu p'ikuarheraska néneski ónhakata jarhani; ka tsípekua jinguntsï uékaska eskaksïni chári ambe euakorhepiringa, jimbokajtsï mítetixapka eskajtsï sánderu ambakiti jatsikorhekua kámaxaka.

³⁵ Ásï jáma je iásï nóteru mintsikani jarhani, jimbokajtsï kánekua maiamunhantaaka.

³⁶ Uétarhesïndi eskajtsï Diósïni ánchperata úkuni jámani tekantaaka engajtsï nósesi ambe úkorhenchani jauaka ísï jámantsï intsïnhaaka engajtsï aiamenhatini jaka.

³⁷ Jimboka karakata arhisïnga: “Sóntkusontkusï, juuatia ima enga juuaka. Nóteru ióndaatia.

³⁸ Jucheti kaxumbiti mintsikua jimbo irekani jauati; k'óru eka chéska, jucheti álma imeri jimbo nóteru tsípeni jauati.”

³⁹ Enga úka, juchachi no chémskaska engachi jurajkutakorheaka eskachi tsîncheaka, jimbochisï jakajkutika ka ísï jámanchi juchari álmani p'íjpantaaka.