Gálatas 6 - Diósïri Karakata P´urheepecha Jimbo

Nénajtsïsï jámaa mándani arhini

¹ Erachicha eka nema k'amanharhintaaka, cha engajtsï espiritu jimbo uinhapetini jaka, espiritu jimbo jarhuata je kaxumbekua jinguni, míakorheparini jimbokari úaka t'újtu terunguni.

² Jarhoatpera je engajtsï nósesi nitamakorheni jauaka, ísïjtsï Krístueri juramukuani marhoakuni jauaka.

³ Ekachka nema nómbemeparini k'éramakorheaka, tandosï úkorhexati.

⁴ Jiájkani mándani arhini xékorhe je násï jámki ka jandiojku k'érku exekorhe no máteruechani japarini;

⁵ jimboka táchani ísï jatsiska míakorheni ambe enga úaka.

⁶ Ne enga ambakiti aiangperakuani p'ikaia, jatsikorhekuani imeri jurhentpiri jinguni marhuate.

⁷ Ásï tandonhaskorhe je, Diósïni nónema úsïndi únharhitani jarhani. Ambe enga júkskanhajka, imani ambe p'ikunhantasïndi.

⁸ Eka nema nósesi jásï eratsekua júkskaaka, uarhikua ambejkusï akuntaati. Ka ne enga Espiritu Sántuni mintsikaparini júkskaaka, Espirituni jimbo méntkisï anapu tsípekuani andaati.

⁹ Ju je no kuatantani sési ambe úni; jimbokachi ma jurhiani sési ambe p'ikuntaaka engaksï méntkisï sési ambe úaka.

¹⁰ Jiájkani na engachi xáni úaka ju je iáminduechani sési káani, ka sánderia erachi jakajkutichani.

Uandanuntskua

¹¹ ¡Exe je! Na engaksïni xáni k'érati jimbo karacheni jaka jucheti jájki jimbo.

¹² Ima engaksï uéjka eskajtsï pasïrini p'ikujtsïtaaka, jiniksïsï uéjti sési pakaratspeni, jimbokaksï Krístueri cháparhatakua jimbo, nóteru uéksïnga eskaksï atanhani kánhaaka.

¹³ Níksï ima enga pasïri p'ikujtsïtaka jamberi újki juramukuani kurhandirakuni enga jima arhijka. Jiniksïsï uéjti eskajtsï cha p'ikujtsïtaaka, ka indeni jimboksï k'éramakorheni engaksïni uinhapetarhu mínda jatsikuka.

¹⁴ Ji k'óruni nómbe ma jimbo k'éramakorhesïnga, juchari Acha Jesukristueri cháparhatakua jimbojkusïni k'éramakorhejka. Jimboka Krístueri chaparhatakua jimbo, jucheti jimbo parhakpeni anapu ambe uarhistia ka jíjtuni uarhirixaka parhakpeni anapu ambe jimbo.

¹⁵ Nómbe ma jimbo marhoasïndi mínda jukani o no jukani, imasï marhuajti enga ma jimbanhetaaka.

¹⁶ Ne engaksï ísï sési úparini irekaka, sési pájperaakuaksï p'iue ka kóndenheksï iámendu Diósïrichani jinguni.

¹⁷ Iásï uératini ásterurini néma ájchatani jaue; jimbokani Jesusini kámaxaka, ka inde xarharsïndi eskani Krístu jinguniska.

¹⁸ Erachicha, eska juchari Acha Jesukristu cha jinguni jauaka. Ka ísïue.