Filipenses 4 - Diósïri Karakata P´urheepecha Jimbo

¹ Ka ísï jimbo, jucheti erachi xénhchakatecha, cha chúngume je Achani jakajkuni, jíksïni kánekua xénhchasïnga ka erokaxa sóndkuksïni xéntani, jimbokajtsï cha jucheti tsípekueska ka k'éramakorhekua.

Miataxakakini

² Ka Ebodiani ka Síntikeni komarhiaxaka eskaksï Achani jimbo májkueni p'ikuarhenheaka.

³ Ka t'úngeni engarini nómeni jurajkujka, komarhixakakini eskari indeni pámpirichani jarhuatauaka sáni, jimbokajtsïni inde kánekua jarhuataska ambakiti aiangperakuani aiangpentani, márkuchi jámaspka Klemente jinguni ka máteru jucheti jarhojpiricha jinguni, ka indeksï tsípiti karakatarhu karanharhikuka jarhastia.

Miataxakaksïni

⁴ Méntkisï Acha jimbo tsípeparini jáma je, ¡Arhixakaksïni! Tsípe je.

⁵ Eska iámendu mítenhaka eska cha kaxumbitiska ka p'amojkpirini. Acha ixuterku jarhastia.

⁶ Ásï ambe ma jimbo uandanhia je; jínijtsïsi Achani kurhakuaka kómu arhiparini, ka diósmaiamukua arhiparini ambe engajtsï cha uétarhenchani jauaka.

⁷ Ka Diósïksïni sési p'ikuarherataati, enga sánderu k'éri ambeka, ka enga k'uiripu parhakpenirhu anapu no újka kurhanguni; ka inde sési jásï p'ikuarhanhekua Jesukristu jinguni pérauati, ka chári p'ikuarhenhekuechani ka eratsekuechani kuájchakuani járhani.

⁸ Ka ia, erachicha, imantsïsï eratseni jauaka, iámu ambe enga jurhimbekuaka, ka janhanharperateni ka ambakiti ambeni, ka sési jasï ambeni. Ka iámendu ambe enga kaxumbekueka, ka iámendu ambe enga sési kurhakateka, ka iámendu ambe enga xani jukaparhakueka, ka k'eri ambe arhikueni.

⁹ Iámendu ambe u je, eskaksïni na jurhendaka, ka arhistacheni ka exerani, ka Diósï karhuatpiri cha jinguni jauati.

Diosmeiamukua

¹⁰ Ji Achani jinguni kánekua sési p'ikuarherasïnga, engajtsïni cha ménderu sáni kurhangorheni jaka, ka jíndeni jimbojtsï uadanhiani. Nóchkajtsïni mirikurhitixapka, jinijtsïnisï no úni jápka jarhuatani.

¹¹ No uétarhenchakua jimbosïni ísï uandani jaka, jurhengorheskia néna nitamakorheni ambe engajkuni jatsiaka.

¹² Ekani kánekua jatsiaka o ekani uétarhinchani jauaka. Mítekuskia néna nitamakorheni, ka míteskia néna uérakuni indeni ambe, sési t'irerini jamani o no t'irerini jamani, júkari jamberi jatsini o uarhini jarhani uétarhenchani.

¹³ Ka Krístu jimbosïni újka iámu ambe jimbo uihapekorhentani.

¹⁴ K'órujtsï sési úska engajtsïni jarhuataka iásï engani nósesi nitamanchani jaka.

¹⁵ Filipu anapuecha, chájtsï sési míani jaka jiáni engani uénapka ambakiti aiangperakuani uandantani, Masedonia uénaspka ka nóma tángorhekuajtsï jima anapuecha jarhuataspti, chájkujtsïnisï jarhuatapka.

¹⁶ Ka engani Tesalonika jápka, mémechani uentaskajtsïni járhojperata axacheni.

¹⁷ Ka nójtuni jarhojperata kurhajkorhexaka, jinisïni uéjka eskajtsï andakua káneramenhaka juchantsïni jimbo.

¹⁸ Játsiska ambe engani uétarenchajka, ka jamberi jukari játsiska, imani jarhojperarta engajtsïni cha Epafroditu jinguni axacheka, sési jájkundiri p'untsurhukua, kéjtsïtakua enga Diósï jaiapanhentajka.

¹⁹ Ka jucheti Diósïni kurhakuxaka eskaksïni kóndentaaka ambe engajtsï cha uetarhenchani jaka, na enga xani Jesukritu jatsikorheka.

²⁰ ¡Ka juchari Diósï Táte, kéri ambe arhinhe iásï ka méntkisï!. Jo kéri arhinhe.

Uandanuntskua

²¹ Uandajperata ma axakuaxaka iámendu Jesukristueri erakukatechani. Ka erachicha engaksï ixu jaka ji jínguni, imajtuksïni uandajperata axachexati.

²² Iámendu jakajkutichajtuksïni uandajperata axachexati, ka sánderu ima engaksï Sesario ánchekorhejka.

²³ Ka eska Acha Jesukristueri kóntperata cha jinguni jauaka.