Efesios 4 - Diósïri Karakata P´urheepecha Jimbo

Májku k'éri jarhani

¹ Ji engani Acha jimbo ónhakata jaka, kómarhixakachkaksïni eskajtsï ísï irekorheaka eskaksïni Diósï na uandajpaka:

² Kétsekua uératspe je, ka sési uandajpe je, ka tekaantspentsï je, ka xénhchperaparini jarhoatpera je,

³ ka jángorhentsï je Espiritu jinguni májku k'éri jarhani, ka ísï jámantsï úaka sési arhijperani jarhani.

⁴ Májkusï anhanhatakua jati, ka Espiritu májkuesti, ka Dióksïksïni májku p'ímutantskuanisï ióarhiti eskajtsï mintsikani jauaka.

⁵ Májkusï Acheti, ka jakajkukua májkuesti, ka májkuesti itsï atajtsïkua;

⁶ májkusï Diósïti enga iámenduecheri Táteka: Enga iámenduechani juramukuajka ka iámenduecha jinguni jarhasti.

⁷ Krístujtsïni táchani kóndesïndi eskachi úaka mámaru jásï ambe marhuatspeni.

⁸ Jimbosï karakatarhu arhijti: “Jiájkani enga karhanchepka uánekua ónhakatechani pájtaaspti, ka k'uiripuni ambakiti ambe kóndesti.”

⁹ ¿Ka ambesï arhikuekajki enga arhijka “Karhanchentasti”? Jinisï arhikuekani jati eska urheta kénhespka.

¹⁰ Ima enga kénheka, imesti enga sánderu iótakuarhu karhancheka iámumendu ambe séserani.

¹¹ Krístuchkasï máru uandakua pári kóntpeati ka Diósïri uandarichani ka imechani engaksï ambakiti aiangperakuani uandantani jámapiringa, ka engaksï jakajkutichani eranguauaka, ka jurhentpirichani.

¹² Íni ambe kóntpesti eska Diósïri ireta jinguntku jauaka marhuani ka Krístueri anhanhatakuani uinhaperantani,

¹³ eskachi iámenduecha májkueni jakajkuni jauaka, ka jiájkani engachi Diósï Uájpani míteaka míakua jukaaka, ísï eska Krístu na míakua jukarika.

¹⁴ Nóteruchi sapini jámaakia, engaksï ambe uéjki jurhentperakua jimbo móptakumenhajka ka engaksï tandojchaaparini nósesi ambe úrajka.

¹⁵ Chájtsï jinisï sánderu ísï jámaaka eska néka xénhchperaparini irekani, ka sánhani arhintsï sánderu kaxumbeni jarhani. Krístu jakajkutichani jinguni éjpueni jarhasti ka jakajkutichaksï anhanhatakueni,

¹⁶ ka anhanhatakua, kutukuecha jinguni májku k'éristi. Mándani ambe marhuasïndi ka ísï anhanhatakua, xénhchperakua jimbo k'éni ka uinhapeni jarhasïndi.

Tsípekua enga Diósïrika

¹⁷ Sési jimboksïni Acha jimbo arhixaka, eskajtsï nóretu ísï irekaakia eskaksï no jakajkuticha engaksï no eratseparini irekorhejka,

¹⁸ imecheri kurhangutskua pájpakandu jarhasti jimbokaksï tsípekuani iauani jakuska enga Diósï íntspejka, jimbokaksï no p'ikuarhenhesïnga.

¹⁹ Nóteruksï k'uratsekua jukasïndia, ka úmarhestiksïa xáni ísku jándi úkorheni, ka nóteru úni p'íngukorheni iámendu nósesi ambe niátani.

²⁰ K'órujtsï cha Krístueri ambe no indeni ambesï jurhendanhaka,

²¹ chájtsï sési jimbo, Krístueri ambe aiangunhantaska ka jurhengorheskajtsï irekani eska Jesusini na uéjka.

²² Nóteru májkueni jámani eskajtsï na jámani jarhempka, jurajkuni urhetku anapu irekuani enga nósesi ambe tsitimpka.

²³ Chájtsï Espiritu jimbo jurhendanhaska ménderueni eratseni ka ménderueni p'ikuarhenheni,

²⁴ ka jimbanhentantsï ísï eska Diósï na k'uerajpejka, ka kaxumbeni ka pímbinhaxentani ísï eska Diósï na uéjka.

Ásteru nósesi ambe u je

²⁵ Ísï jimbo, ásteru chkuándiratspe je, méntkisï jurhimbitku uanda je, nóchkachi iámenduecha márkueski andi.

²⁶ Ekajtsï ikiauaka, ásï jáma je k'amanharhintani; ásï chúskuta je ikiani,

²⁷ ásï jurajkutakorhe je eskaksïni nóambakiti terunguntaaka.

²⁸ Ásteru sïpetspe ima enga sïpajkurheka, ánchekorhechka sési ambe úparini, eska jatsikorheaka ambe enga no jatsikorherichani intsïmpeauaka.

²⁹ Ásï ísku ambe uémuskorhe je, sánderu sáni imani ambe uanda je enga jarhuatauaka ka marhuakuani imani engaksï kurhauaka.

³⁰ Ásï Diósïri Espiritu Sántuni kómu p'ikuasta je, jimboka ima, ima míndeska engajtsï jimbo mítenhantaaka jiájkani engajtsï p'íjpanhantaaka.

³¹ Ásteru kurhuri jásku jáma je, ásteru uinhache je, ka ásteru nemani arhimarhe je o útakuni, ásteru nósesi ambe u je.

³² Sánderu sáni kaxumbe je, ka púantsperantsï je ísï eskaksïni Diósï Krístuni jimbo na púachentaka.