Efesios 3 - Diósïri Karakata P´urheepecha Jimbo

Ambe enga Páblu míndanhaka úni

¹ Ísï jimbosïni ji Páblu, Krístuni jimbo ónhakata jaka chári sési jimbo engajtsï no judioueka.

² Chájtsï mítetini jáka ambe engarini Diósï míndaka imeri kóntperatakua jimbo chánksïni aianguni:

³ Diósïrini jánhastasti ka aianguntastirini ambe enga imajku mítepka, ísï eskaksïni íri ambe urhetku na karachepka.

⁴ Engajtsï arhintaaka, úakajtsï kurhanguni ambe engani ji jánhaskani jaka Krístueri ambe, enga no uánekua mítenhapka;

⁵ ima ambe iásï Espiritu, uandakua párichani ka Diósïri uandarichani jánhastaastia.

⁶ Eskajtsï chájtu no judiuecha p'iuaka ambe engaksï judiuecha míndamenhatini jaka, eskajtsï Krístuni jimbo májkuentaska, ka eskajtsï márku p'iuaka ambe enga míndanhatini jaka ambakiti aiangperakuani jimbo,

⁷ imani engani ji uandantani jámani jáka. Jimbokarini Diósï imeri kóntperatani míndaska uandantani jámani, jimbokarini ima uinhaperasïnga.

⁸ Ji míndanhaska indeni kóntperakuani no judiuechani aianguantaani engani imeri erakukatecha jinguni sánderu nómbe méka, Krístueri xáni ambarhati kóntperakuechani.

⁹ Ka k'amak'amasï jánhastpeni na enga úkorheka ima ambe enga méntkisï Diósïjku mítetini jápka, enga iámendu ambe kueraaka,

¹⁰ eska iásï jakajkutichani jimbo, ánjelicha ka nóambakiticha ka ima engaksï auandarhu juramujka míteauaka Diósïri mímixekuechani,

¹¹ ísï eska Diósï, uénakuarhutki juchari Acha Krístu Jesusini jimbo námendu eratseni jápka úni.

¹² Engachi jucha Krístuni mintsikaaka, Krístujtsïni uinhaperantasïndi eskachi úaka Diósïni mintsikaparini andarherani.

¹³ Ísï jimboksïnisï ji kómarhini jaka eskajtsï no p'ikuarheraaka iásï engani ji chánksïni jimbo xáni nósesi nitamakorheni jaka, jinijtsïsï tsípeaka.

Diósï k'éri ambe arhinhe

¹⁴ Íni jimbosïni ji Táteni tinguixurhikujka,

¹⁵ enga iámendu auandarhu anapuechani ka echerirhu anapuechani kueraaka ka jakangurhitaani.

¹⁶ Eskaksïni imeri xáni k'éri kóntperakua jimbo, Espirituni jimbo mintsitechani uinhaperacheantauaka,

¹⁷ ka Krístuntsï sésimendu mintsikani jarhani, ka imeri xénhchperakuantsï chári irekuarhu sési marhuatani jarhani.

¹⁸ Ísïjtsï úaka jánhaskani, iámendu Diósïricha jinguni na enga xáni káneka ka nani enga jamberi niárajka, ka enga xáni k'éka, ka nani enga jamberi Krístueri xénhchperakua niáratspejka;

¹⁹ eskajtsï Krístueri xénhchperakuani míteaka enga iámendu jurhenguechani uanokuajka, ka eskajtsï iámendu Diósïri kóntperatechani p'iuauaka.

²⁰ Diósï k'éri ambe arhinhe, enga juramujka ka enga jucha jinguni xarharajka, engajtsïni jukari jamberi íntskujka engachi eranhaskajka kurhakuni.

²¹ ¡Iásï ka méntkisï anapuecha engachi Krístu Jesusini jakajkujka, Diósïnksï k'éri ambe arhi méntkisï! Ka ísïsti.