Efesios 2 - Diósïri Karakata P´urheepecha Jimbo

Diósïjtsïni uarhikuarhu p'ímutantasti

¹ Ka chánksïni engajtsï chári no kurhandirakua jimbo ka chári k'amanharhintskua jimbo uarhirini jápka,

² jiájkani engajtsï ísï irekani jápka eska parhakpeni na nósesi jánhka, nóambakiti enga nóambarhati espirituechani juramukuajka engaksï tarhiatarhu ísï jámka; imaksïni juramuchesïrempti, ima espiritu enga no kurhandirechani juramukuani jáka.

³ Juchajtuchi iámenduecha májkueni irekaxapka, nósesi ambejku tsitiparini ka nósesi ambe eratseparini, ka Diósïjtsïni juchantsïntu jatsipirindi ikimeni.

⁴ K'óru Diósï enga xáni tekaatspentajka, ka xáni engajtsïni xénhchajka,

⁵ engachi jucha ísï juchari no kurhandirakua jimbo uarhirini jápka, Krístu jinguntsïni tsítantasti, ka chájtsï p'ímutanhantaska Diósïri kóntperakata jimbo,

⁶ Diósïjtsïni Krístu jinguni tsítantasti ka Krístu jinguntsïni auandarhu uaxastasti,

⁷ ka Diósï, ísï méntkisï xarhataati na enga xáni kánekua kóntpejka, na engajtsïni juchantsïni Krístu Jesusi jimbo xáni kóndpejka.

⁸ Cháchkajtsï Diósïri kóntperakuani jakajkutini p'ímutantskorheska; chájtsï no jandiojku jatini p'ímutantskorheska, jinisï Diósïri kóntperata méti;

⁹ ka nójtu chári jángua jimboesti, ísï jimbo ásïchka nema k'éramakorheni jaue.

¹⁰ Acha Kuerajpirijtsïni kueraasti ka Krístu Jesusi jimbojtsïni sési jájkusti, eskachi sési jámaaka eskamendu Diósï na eratsetini jápka eskachi jámapiringa.

Iámenduechachi májkueska

¹¹ Ísï jimbochka, míantsï je eskajtsï cha no judio andajpenuska, ka eskaksïni judiuecha arhiparhatani jarhasïrempka eskajtsï cha no pasïri p'ikujtsïkumenhaska.

¹² Chájtsï Krístuni kánekua jarharetixapka, ka iauani jarhaspti eskajtsï Israeli anapuepiringa, ka aiatsperakatantsï no míndamenhatixapka, ka nójtsï mintsikaxapka ka Diósïntsï parhakpeni no kángorhesïrempka.

¹³ Iásï cha engajtsï Krístuni kánekua jarharetini jápka, Krístueri iurhiri jimbojtsï cha Diósïni andarheraxakaia.

¹⁴ Jimboka juchari sési jakua Krístueska: Enga tsimani iretechani májku úntaka, k'amajkusti ikiatsperata ambe, enga arhukpempka.

¹⁵ Krístu imeri k'uiripekua jimbo k'amajkusti ambe enga xáni juramukua úrpempka ka uinhamarhetspeni, ka ima tsimani iretechani sési pájperakua jimbo májku úantaasti,

¹⁶ ka enga krúsirhu cháparhatanhaka, tsimani iretechani Diósï jingunirantaasti ka májku anhanhatakua úntasti ka arhirperatani k'amajkusti.

¹⁷ Ima jurhasti sési pájperakua ambeksïni aianguntani chánksïni engajtsï Diósïni kánekua jarharetini jápka, ka imechani engaksï no iauani jakupka.

¹⁸ Jimbokachka Krístuni jimbo, iámenduechachi úsïnga májku Espirituni jimbo Táteni andarherani.

¹⁹ Ísï jimbochka chájtsï nóteru uérakua anapueskia, iásïjtsï Diósïri ireta jingunintaskia, ka engajtsï Diósï uájpentakia márkujtsï irentaskia.

²⁰ Chájtsï imeri k'umanchekueska engaksï Jesusiri uandakua páricha ka Diósïri uandaricha pítsekueka, ka Krístu k'éri pítsekuesti enga k'umanchekuani p'ínguni jaka.

²¹ Ka Krístuni jimbosï k'umanchekua sési uinhapekorhejti, ka imani jimbosï uinhapejti ka k'éni enga Acheri pímpinhasï k'umanchekua úntajka.

²² Chájtu engajtsï Krístu jingunintaka, ima k'umanchekuentaxakajtsï nani enga Diósï irekaka imeri Espirituni jimbo.