Colosenses 4 - Diósïri Karakata P´urheepecha Jimbo

¹ Ánchetpiri, chéti jántspirini sési maiamu, ásï mirikurhi eska chéti Acha auandarhu jarhaska.

Máteru arhistatsperakuecha

² Méntku uandamukokorheni ja je, iámu ambe arhiparini ka diósïmaiamu arhiparini,

³ ka Diósïntu kómarhi je juchantsïni jimbo, eskachi sésikua intsïnhaka uandantani ka jurhentpeni Krístueri ambe enga no mítekorheka, nóchkani jimbosïni ónhanha andi,

⁴ ka uéksïnga sési ambonhastpeni.

⁵ Sési eratsekuntsï je néna jámani no jakajkuticha jinguni, exeparini ambesï jánhaskorhe.

⁶ Sési uandaxekua je ka tsípekua jinguni, ka úakajtsï mándani arhini sési mókukuani.

Uandanuntskua

⁷ Tíkikuksïni aianguntati sánderu jucheti ambe, xénhchasïnga inde pámpirini jimboka mintsinharhikueska ka márkuchi jámaska Achani marhuakuni.

⁸ Jimboksïnisï axacheni jaka, indeksïni aianguntaati juchari ambe ka karhoatantaatiksïni.

⁹ Onesimujtu pámbexati enga cha jinguni tángorhetika, jucha xénhchasïnga jimboka mintsinharhikueska. Indeksïni aianguntaati iámendu ambe enga ixu úkorheni jaka.

¹⁰ Aristarku enga jíndeni jínguni ónhakata jaka uandajperakua máksïni axachexati ka Márkusïjtu ísï Bernabeo anapu. Chájtsï kurhariskia Márkusïri ambe, sési káma je ekaksïni ambe niraska p'urhembeni.

¹¹ Jesusijtu engaksï Jústu arhijka uandajperata máksïni axachexati, indejtsïni kánekua karhoatasti jimbokaksï judio mínda jukariska ka jarhuataxatijtsïni Diósïri irechekuani uandantani.

¹² Epafrasi enga cha jinguni tángorhetika uándajperata máksïni axachexati, indeksïni méntku kómarhijpecheni jarhasïndi eskajtsï Diósïni sési mintsikani jauaka ka eskajtsï imani marhuakuni jauaka.

¹³ Ji exeriska eska kánekua uandanheasïnga cha jimbo, ka Laodisea anapuecha jimbo ka ístu Ierapolisï anapuecha jimbo.

¹⁴ Demasï ka Lúkasïjtuksïni uandajperata ma axachexati, indesï tsinajpiriti ka kánekua xénhchanhasïndi.

¹⁵ Arhia je sáni Laodisea anapu jakajkutichani eskakï uandajperata ma axakuaxaka, ka Ninfasïni ka iámendu chénjembo tángorhetichani.

¹⁶ Engajtsï íni karakatani k'amaraaka arhintani, Laoisea anapuechani axakua je jurajkue jimajtu arhinhantani, ka chájtu arhintsï je karakatani engani jini axaka.

¹⁷ Arkipuntsï arhiaka eska k'amaraaka ánchekorhetani enga Acha míndakuka.

¹⁸ Ari uandakuechani ji Páblumenduni karhaxaka: “Ásï mirikurhi je eskani ónhakata jarhaska, Diósïksïni újchakure”.