Apocalipsis 9 - Diósïri Karakata P´urheepecha Jimbo

Iúndarhekua Sïuangueri kústatarakua

¹ Ka iúmu úni jámani ánjeli kústaspti, ka jóskua ma exespka uekorheni auandarhu uératini écherindu andatserani, ka uarhichao jauanhekuarhu anapu mítakua intsïnhaspti.

² Ka jauanhekuani mítaspti, ka kánekua sïraata uénhespti eska k'éri ma kurhini jarhani, ka tata jurhiatani ka tarhiatani pajpakajkuantaaspti.

³ Sïratarhuksï k'érati chóchuecha uéakuspti ka echerinduksï janoni, ka parhakpeni anapu k'uarapueriksï jásï uinhapekua intsïnhaspti.

⁴ Ka juramumenhasptiksï eskaksï, nóma uitsakuani ka nómbe ma xunhupiti ambeni ka nóma p'ukurini ambendarhepiringa parhakpenirhu, imechani k'óru jo engajksï Diósïri selluni no jukarhupiringa.

⁵ K'óruksï no intsïnhasti sésikua uándikpeni, ka k'óruksï iúmu kutsï nósesi p'ikuastaapirindi, ka uinhamenduksï p'amerapirindi isï eska k'uarapu atajpeni

⁶ ka imani jurhiatekuechani uarhikorhenchanhaati, ka tata uarhikua sïpakorhekuauati.

⁷ Ka chóchuechaksï tekechueni jarhaspti engaksï sési jurhendakata uarhipekuarhu pánhajka; kanakua tiripitiri járhatichanksï jukajtsïatini, ka k'uiripuenksï janharhispti.

⁸ Ka uarhimasïri jauiriksï jukaspti, ka púkinksï jándirani.

⁹ Ka chésïksï tiámueri jukarhekorhespti, ka p'araskuechaksï tekechueni kurhakorespti engaksï uarhipekuarhu parhari áspani jarhajka.

¹⁰ Ka k'uarapuenksï t'enarhpetarakua jukaspti, ka ch'étirhuksï kámasïrendi uinhapekua atajpeni ka iúmu kutsïksï nósesi p'ikuastpespti.

¹¹ Ka ánjeli jauanhekuarhu anapunksï irecheni jatsikorhespti, enga Abadoni jakangurhinhajka ebreo jimbo, enga xerendurhijpiti arhikuekajka.

¹² Ka i ambe uénaspti nósesi úkorheni, exe k'óruksï máteru tsimani jurhaxatiteru.

Kuíndarhekua Sïuangueri kústatarakua

¹³ Ka kuímu úni jámani ánjeli p'uninhaspti sïuangueri-kústakuani, ka uandakua ma kurhaspka enga uérempka t'ámu sïuanguecharhu engaksï kéjtsïtarakua tiripitirirhu jápka, enga Diósïri urhepani jaka.

¹⁴ Arhiparini ánjelini enga iúmu tsimani úni jámani kústakuani jatsipka, kueratantantsï t'ámu ánjelichani engaksï k'éri iurhekua Éufratesirhu uanamukuni jótakata jaka.

¹⁵ Ka kueratanhantasptiksï t'ámu ánjelicha engaksï ima jándu ka ima jurhia ka ima kutsï ka ima uéxurhini míndakata jápka, sáno terujkani parhakpeni anapuechani uándikuani.

¹⁶ Ka uánesptiksï p'urhejkuti tekechu jataricha, terujkani irepeta millonisptiksï ji kurhaspka na engaksï xáni uánepka.

¹⁷ Ísï jánhaskua jimbo exespka tekechuechani ka tekechu jatarichani, chésï tiámueriksï chpírini jáxespti, ka chúpitinksï ka tsïpamtsïnksï, ka tekechuecheri éjpuksï púkini járhaspti; ka chpíri ka sïraata ka nósesi jájkundikuaksï uéchasïrempti.

¹⁸ Íni tanimu nósesi jánhaskorhekua jimbo sáno terujkani jamberi uarhinhaspti, chpíri jimbo, ka sïrata jimbo ka janhajanhajkundikua jimbo engaksï ima uéchempka.

¹⁹ Jimbokaksï tekechuecha pénchumekuarhu ka ch'étirhu uinhapekua kámasïrempka; ka ch'etichaksï akuitsespti ka katsarhpesïremptiksï.

²⁰ Ka enga xáni pakaranhapka, enga no uarhinhapka imani nósesi jánhaskorhekua jimbo, nójtuksï uékaspti móantani engaksï xáni nósesi úrini jápka, ka nójtuksï jurajkuspti Nóambakitichani ka diósï eratakatechani kómu arhiani, engaksï tiripitiri ka meremeresïri úkateka, ka tiámu ninirantskateri, ka tsakapueri, ka chkáriri úkateni, engaksï no exejka ka nóksï kurhani ka nójtuksï xanharani.

²¹ Ka nójtuksï móantaspti engaksï xáni uándikpepka, ka sïkuajpenksï, ka ísku jandinksï, ka engaksï xáni ambe sïpatspepka.