Apocalipsis 8 - Diósïri Karakata P´urheepecha Jimbo

Iúmu tsimani sellu

¹ Enga karichi iúmu tsimani úni jámani selluni p'ikuparhakupka, auandarhu sáni ióni pínanchentaspti.

² Ka iúmu tsimani ánjelichani exeaspka Diósïri urhepanksï jarhani; ka iúmu tsimani sïuangua-kústakuechanksï intsïnhaspti.

³ Ka máteru ánjeli jurhaspti ka kéjtsïtakuarhu urhepani niáraspti, tiripitiri tióxunhanda jatakua ma jinguni. Ka kánekua tióxunhanda intsïnhaspti, iámendu jakajkuticheri uandamukukorhekuecha jinguni, eska tiripitiri kéjtsïtakuarhu pérapiringa enga k'éri uaxantskuarhu urhepani jaka.

⁴ Ka tióxunhanderi sïraata tarharasïrempti jakajkuticheri uandamukukorhekuecha jinguni, enga Ánjeli jájki jimbo Diósïni axakuempka

⁵ Ka tátsekua ánjeli tióxunhanda jatakuani jupikaspti, ka kéjtsïtakuarhu anapu turhiri uiniptsïtaspti ka jini k'uanintskaraspti; ka piritani uénaspti, ka charancheni, ka jencheni.

Sïuangueri kústatarakuecha

⁶ Ka iúmu tsimani ánjelichaksï engaksï iúmu tsimani sïuangua-kústakuechani jatsiapka p'iaraptiksï kústaani.

⁷ Ka ánjeli ma uénaspti kústani, ka chpíri ka xánuata uekorhespti iurhiri jinguni jeuekorhetini, ka parhakpenirhu k'uanijpanhaspti; ka sáno terujkani jamberi écherini kurhiraspti, ka sáno terujkani jamberi anhatapuechani kurhiraaspti, ka uitsakua xunhupiti iámu kurhiraspti.

⁸ Ka tsimani úni jámani ánjelijtu kústaspti, ka k'éri ma juáteni jásï enga kurhini jápka japundarhu k'uanimanhaspti, ka japunda sáno terujkani jamberi iurhiri úkorhentaspti.

⁹ Ka sánoksï terujkani jamberi tsípiti manakorhericha engaksï japundarhu irekapka uarhisptiksï, ka ístuksï sáno terujkani jamberi k'éri icharhutecha xerendurhikorhentasptiksï.

¹⁰ Ka tanimu úni jámani ánjeli kústaspti, ka auandarhu uératini k'éri ma jóskua uekorhespti, k'ueramueni tixarapuni, ka sáno terujkani jamberi iurhekuecharhu ka itsarhuecharhu andameraspti.

¹¹ Ka jóskua arhinhasïrendi k'amenda arhinhani, ka sáno terujkani jamberi itsï k'ameraspti; ka uánekua imani itsï k'ameri atini uarhinhaspti.

¹² Ka t'amu úni jámani ánjeli kústaspti, ka sáno terujkani jamberi tata jurhiata ambendarhekorhespti, ka sáno terujkani jamberi nana kutsï ka sáno terujkani jamberi jóskuechaksï, nóteru t'inskarasptia, ka isï jimbo sáno terujkani jamberi pájpakandespti jurhiakua ka sáno terujkani chúrekua no erajkukorheni.

¹³ Ka kurhaspka ka eraani ka tsápki ma, terujkani auandarhu kárani jarhani uinhachaparini, ájkeru, ájkeru, ájkeru na xántsï kómu nitamanchaa, iámendu cha engajtsï parhakpenirhu irekaka, engaksï máteru tanimu ánjelicha kústauaka sïuangua kústakuechani.