Apocalipsis 4 - Diósïri Karakata P´urheepecha Jimbo

Na enga auandarhu Diósï k'éri arhinhajka

¹ Ka tátsekua eranchespka ka auanda mítakorhetini jarhani, ka uandakua engani urhetku kurhapka, enajki nema kústakua p'uninhani japi, arhisptirini: “Karhara axueni ka exerakakini íni ambe enga tátsekua úkorheaka.”

² Ka jimajkurini Espiritueri uinhapekua iámu p'iraspti, ka exespka auandarhu anapu k'éri uaxantskuani, ka nema jima uaxakatini jarhani.

³ Ka ima enga uaxakatini jápka, tsakapu merearini xarharasïrempti enga charhapentajka ka xunhupentani, ka xupakata ma uirhipandaspti k'éri uaxantskuani enga méntkueni meremerejkuni jápka.

⁴ Ka ma uirhipandani k'éri uaxantskuarhu, járhasptiksï máteru ma ekuatse t'ámu uaxantskuecha, ka ma ekuatse t'ámu achamasïchaksï jima jarhani uaxakatini, urapitiksï xukuparhatini, ka kanakua tiripitiri inchajtsïtinksï.

⁵ Ka k'éri uaxantskuarhu kurhakoresïrempti piritani ka charancheni. Ka k'éri uaxantskuarhu urhepani iúmu tsimani k'ueramu tixaraxapti, engaksï iúmu tsimani Diósïri espirituecheka.

⁶ Ka k'éri uaxantskuarhu urhepani, japundeni jásï ma jarhaspti enga sési pímbinhanharipka ka iauani jamberi eramakorheni. Ka terumeni jarhaspti k'éri uaxantskua ka t'ámu tsípitichaksï uirhipandaspti, éskuechanksï iápuru jukarhekorheni, urhepani ka tátsepani.

⁷ Ka púkini jáxespti enga urhepani jápka; ka máteru uakasï sapichueni jáxespti, ka máteru k'uiripueni janharhispti, ka máteru k'uiusïni enga kárakuekani jápka.

⁸ Ka inde t'ámuksï kuímu p'araskua jukaspti, ka éskuaksï uinirhekorheaspti, ka chúrekua ka jurhiakua nóksï mintsikorhesïrempti ísï uandani: “¡Acha tanimu xanhari pímbinhaxesti Acha Diósï enga iámendu ambe újka úni, enga jindepka ka enga jindeka ka enga junguaka!”

⁹ Ka engaksï inde tsípiticha k'éri ambe arhimpka ka janhanharini ka diósïmaiamu arhini imani enga uaxakatini jaka k'éri uaxantskuarhu, enga méntkisï irekani jaka.

¹⁰ Imaksï ma ekuatse t'ámu achamasïcha kápatsentaspti k'éri ambe arhini imani enga méntkisï irekani jaka, enga k'éri uaxantskuarhu uaxakatini jaka, ka kanakuechanksï p'iuantaspti ka urhepanksï pérakuani, uandaparini:

¹¹ “Acha Diósï juchari, t'úrisï k'éri ambe arhikueka, ka k'érikuarhu pérani, ka janhanharhinhaniri ka juramukuari p'irani, jimbokari t'u iámendu ambe kueraska, t'úri uékaska eska ambe jauaka t'úrisï iámendu ambe kueraka.”