Apocalipsis 3 - Diósïri Karakata P´urheepecha Jimbo

Ambe enga Sárdisi anapu tángorhekua arhinhajka

¹ Ka ísï karaku ánjelini enga Sárdisi anapu tángorhekuarhu jaka: Ima enga iúmu tsimani espirituechani Diósïri jatsiaaka, ka ístu iúmu tsimani jóskuechani ini ambe uandasïndi: Ji chéti úkuechani míteska, ka na engari uandani jaka eskari tsípiti jarhaska ka jiniri uarhirini jarhani.

² Sési pátsakorhe ka uinhaperantsï indeni ambe enga pakarani jaka, engari nótki uarhirakorheni jaka; jimbokani nóma chéti úkua k'amarakata xéntaska Diósïni japarini.

³ Miántsï ambe engari intsïnhaka ka engari kurhandika, sési exe ka moántsï. Ekari no jinguntku jarhaska, ji janoaka ísï eska sïpajkurha ma, ka nóri míteaka ambe jándukini janochea

⁴ k'óruri namuni máru jimini Sárdisi jatsiaska, engaksï xukuparhakua no jájkuni jaka, ka indeksï jíndeni jinguni xanharaati, urapiti xukuparhantatini, jimbokaksï nitatarhenchaska.

⁵ Ne enga andaaka, urapiti xukuparhatanhantaati, ka imeri jakangurhikua nómeni p'íkuntaaka Karakatarhu engaksï tsípikua p'iticha jataka, ka uandantaaka néski ima, jucheti Táte urhepani japarini, ka ístu imeri ánjelichani urhepani japarini.

⁶ ¡Ne enga újka kurhani, kurhangue ambe enga Espiritu tángorhekuechani arhiajka!’

Ambe enga Filadelfia anapu tángorhekua arhinhajka

⁷ Ka ísï karaku ánjelini enga Filadelfia anapu tángorhekuarhu jaka: Íni ambe arhisïndi ima enga pímbinhaxeka ka enga ísïka, enga Dabiri mítakuani jatsika, enga mítajka ka nónema úni míkantani, ka enga uapanhajka ka nónema úni mítantani:

⁸ Ji míteska chéti úkuechani; exe na engakini mítachetini jurajkucheni jaka, ka nónema úati míkantani, jimboka nájkiruka sántkueka chéti uinhapekua, jucheti uandakuani uraska, ka nómendini uandaska no míteni.

⁹ Exe, ji péraxaka máru Satanasiri tángorhekuarhu anapuechani engaksï Judioueni uandajka, ka nóksï jindeni, jimbokaksï chkuándiraxaka; exe, jíkini juácheauaka ka tinguixurhicheatiksïni, ka míteatiksï eskakini ji t'úngenisï xénhchajka.

¹⁰ Jimbokari jucheti uandakuani mintsikaska, jíjtukini patsaaka ima jándu enga ts'éjkukua janoaka, ka iápuru enga xáni irenhaka janoati, jimbokaksï iámenduecha ts'éjkunhaaka.

¹¹ Ji sóntku junguaka, sési patsa ambe engari jatsika, ka eskakini kánakua nónema euantaaka.

¹² Ne enga andaaka, ji anhandakua úntaaka jucheti Diósïri k'umanchekuarhu, ka jima pakaraati méntkisï, ka jucheti Diósïri jakangurhikuani ka ístu jucheti Diósïri iretani jima karaaka, enga jindeka Diósïri jimbanhe Jerusaleni enga auandarhu uératini kétsejka, ka jucheti jimbanhe jakangurhikua karaaka.

¹³ ¡Ne enga újka kurhani, kurhangue ambe enga Espiritu tángorhekuechani arhiajka!’

Ambe enga Laodisea anapu tángorhekua arhinhajka

¹⁴ Ka ísï karaku ánjelini enga Laodisea anapu tángorhekuarhu jaka: Ima enga uandantajka ambe enga ísïka, enga mintsinharhikueka ka enga no chkuándirajka, enga Acha Kuerajpiri jimbo uandaka ka iámendu ambe kueraani, arhixatikini:

¹⁵ Ji chéti úkuechani míteaska, eskari no ts'irapitiska ka nójturi jurhepitini. ¡Uékapiringa eskari méntku ts'irapitipiringa o méntku jurhepitini!

¹⁶ Engari ísï kuakuataxeka, ka nóri jurhepitini ka nójturi ts'irapitini, jíkini jiuantaaka.

¹⁷ Jimbokari t'u uandasïnga, ji jatsikorheriska, jimbokani jatsikorheri úkorheska ka nómbema kueratanchasïnga, ka nóri jánhaskasïnga eskari nósesi irekorheska, tsînchekorhentatixakari, ka jandiojkueskari, ka eskari pátenharhiska ka patsïkjásïri jarhani.

¹⁸ Ísï jimbo, arhistachexakakini eskarini juuaka ambakiti tiripiti puruatantskata piácheni, ka sési jimbori jatsikorherini, ka ísturini piáche xukuparhakua urapiti engakini kasïperantaaka, ka nóteruri patsïkjasï jauaka jimbokari k'uratsetakorhexaka, ka atanhari sïpiati ka sésiri éskantaaka.

¹⁹ Ji kurhangukuasïnga ka xukaasïnga, iámendu imechani engani xénhchajka, t'úchkari jurhepitku jauaka ka sési jimbo móantsï.

²⁰ Exe, ji uámutatspexaka, ekarini nema kurhaska ka mítachendini, ji inchaaka imo ka márkuchi t'ireaka.

²¹ Ne enga andaska, íntskuaka sésikua k'éri uaxantskuarhu jarhani jíndeni jinguni, ísï eskani jíjtuni na andaka ka jucheti Táteni jinguni imeri irechekuarhu uaxakaska.

²² Ne enga újka kurhani, kurhangue ambe enga Espiritu arhiajka tángorhekuechani.’