Apocalipsis 2 - Diósïri Karakata P´urheepecha Jimbo

Ambe enga Éfeso anapu tángorhekua arhinhajka

¹ Ánjelini enga Éfeso anapu tángorhekuarhu jaka, ísï karaku: Ima enga iúmu tsimani jóskuechani t'irejkandani jatsiaka, ka enga jimesï xanharajka engaksï iúmu tsimani ch'urhinguecha tiripitiri jaka, ísï uandasïndi:

² Míteska chéti úkuechani, na engari xáni jángorhentani jaka ka nóri kuatantani; ka na engari no újka nósesi úrichani tekantaani, ka Jesusiri uandakua pári eratakorherichani ts'éjkuaskari, ka p'iaraaskari eskaksï chkuándirasïnga.

³ Ka kómu nitamakorheskari, ka tekaantaskari ka jíndeni jimbori incharhetakuska ánchekorheni, ka nóri kuatantaska.

⁴ K'órukini ambe ma pátsanhechexaka, eskari mirikurhiskia p'ampsïperakuani engari uénakuarhu jatsipka.

⁵ Jimajkanichka miántsï na engari tsînchekata jaka, k'uanhatsentsï ka sési irentsï; engari no ísï úska, juuakakini exeni ka ekari no móantaska ch'urhinguakini kénditacheaka.

⁶ K'óruri íni ambe jatsiska, enga chéti jimbo jaka, eskari nikolaitecheri ánchekorhetechani ikimchaasïnga ka jíjtuni ikimchaasïnga.

⁷ ¡Ne enga újka kurhani, kurhangue ambe enga Espiritu arhiajka tángorhekuechani! Ne enga andaaka, ji sésikua íntskuaka, tsípekueri anhatapurhu akurhutani enga Diósïri irekuarhu anhaakuka.’

Ambe enga Esmirna anapu tángorhekua arhinhajka

⁸ Ka ísï karaku ánjelini enga Esmirna anapu tángorhekuarhu jaka: Ima enga uénani jámani jaka ka k'amarhutani jamberi ísï uandasïndi, enga uarhipkia ka ménderu tsíntani:

⁹ Ji míteska eskari nósesi nitamanchaska ka uétarhenchandi, nájkirukari jatsikorherika ka na engaksïni judio arhikorericha xáni nósesi uandatsejka, ka jiniksï Nóambakitiri chúngumatini.

¹⁰ Ásï jáma chéni ekari nósesi nitamanchaaka. Era, Nóambakitiksïni máru chánksïni k'ataperakuarhu incharaati, ka jimajtsï témbeni jurhia ts'éjkunhaaka. T'u uarhikuarhu jamberi sési mintsika, ka jíkini tsípikueri kanakua íntskuaaka.

¹¹ ¡Ne enga újka kurhani, kurhangue ambe enga Espiritu arhiajka tángorhekuechani! Ne enga andaaka, nóteru kómu nitamaati eka uarhikua ménderu janotspeakia.’

Ambe enga Pérgamo anapu tángorhekua arhinhajka

¹² Ka ísï karaku ánjelini enga Pérgamu anapu tángorhekuarhu jaka: Ima enga atajpetarakua ma jatsika, tsimoru sési uarhomutini ísï uandasïndi:

¹³ Ji míteska nani engari irekaka, jimini enga k'éri uaxantskua Nóambakitiri jaka. T'úri k'óru jucheti jakangurhikuani mintsikaxakateru, ka nóri uandaxaka nóterurini jakajkunia, ni jimajkani enga jucheti ambakiti jántspiri Antipasï uándikunhapka, jimini Nóambakiti jarhasti.

¹⁴ Nájkirukani jatsika sánhani isï ambe engakini no jaiapanhechentajka: Jimbokari jimini jatsiaska indechani engaksï Balamueri jurhenguani patsajka, enga Balakini arhistakuempka néna Israeli anapuechani p'ínguani, ka t'irerakuekaani ambe engaksï diósïni eratakatecha kéjtsïtamenhapka, ka ístu néna ísku jándi niátataraani.

¹⁵ Ka ísturi jimini jatsiaska indechani engaksï nikolaitecheri jurhentperakuani patsajka.

¹⁶ Jimajkani k'uanhatsentsï, ka ekari no ísï úska, t'úngeni jinguni jurhaxaka, ka jucheti uandakua jimbo atauaka.

¹⁷ ¡Ne enga újka kurhani, kurhangue ambe enga Espiritu arhiajka tángorhekuechani! Ne enga andaaka, ji akua ma no mítekata patsakata íntskuaka, ka ístuni tsakapu sapinharhi urapiti ma íntskuaka, enga jimbanhe jakangurhikua ma jukanharhiaka, ka imajkusï míteati enga intsïnhaaka, ka nóteru nema.’

Ambe enga Tiatira anapu tángorhekua arhinhajka

¹⁸ Ka ísï karaku ánjelini enga Tiatira anapu tángorhekuarhu jaka: Diósï Uájpa íni ambe uandasïndi, enga chpíri jengueratini járhati éskajka, ka tiámu pitsïpitini jándurhani:

¹⁹ Ji míteaska chéti úkuechani, ka chéti uékperakuani, ka chéti mintsikuani, ka chéti jarhojpekuani, ka chéti tekantskuani, ka eskaksï chéti úkuecha urhetku sánderu ambakitispka eska iásï.

²⁰ Nájkirukani jatsika sánhani ísï ambe engakini no jaiapanhechentajka: Engari nana Jesabelini jiáretani jaka, enga uandakua pári arhikorhejka, eska jurhentpeaka ka p'ájtamani jucheti jántspirichani ísku jandini, ka diósï eratakatecheri kéjtsïtakuaksï t'ireni.

²¹ Ka erokaska eska moátapiringa ka no uékasïndi inderi ísku jánguani jurajkuni.

²² Exe je, ji p'amenchataaka ka ísku apondikuntaati, ka imechani engaksï indeni jinguni nósesi úka, ekaksï no móantaska ambe engaksï xáni nósesi niátakia, ka ekaksï inde naneri nósesi úkuechani no jurajkuaska; kánekua nósesi p'ikuarheratauaka.

²³ Ka uájpechani uándikuparini k'amajkuauaka; ka iámendu tángorhekuechaksï míteati, eskani ji eratsekuechani ka p'ikuarhenhekuechani míteaska, ka mándani arhini kúanhaskukuantauaka imecheri jángua.

²⁴ Ka cha engajtsï támu pakaraka, Tiatira anapuecha, engajtsï no ísï jurhengorherini jaka eska imecha engaksï uandajka iauani jamberi míteni ka jini inde Nóambakitiri ambeni, chánksïni arini ambe arhixaka: Nóteruksïni ambe ma kurhacheaka,

²⁵ indeni ambentku engajtsï jatsika, sési patsa je jimajkani jamberi egani ji junguaka.

²⁶ Ka ne enga andaaka, ka jucheti úkuechani k'amarhutani jamberi patsani, ji juramukua uáni iretecharhu íntsauaka.

²⁷ Ka uinhamarhepekua jinguni juramukuauati, méntkueni eska urhani echeriri úkatechani xerendurhiauati,

²⁸ ísï eskarini jucheti Táte na íntskuka juramukua, jíjtuni íntskuaka jóskuani enga xárhentku andarajka.

²⁹ ¡Ne enga újka kurhani, kurhangue ambe enga Espiritu tángorhekuechani arhiajka!’