Apocalipsis 18 - Diósïri Karakata P´urheepecha Jimbo

Enga k'éri Babilonia xerenhantapka

¹ Tátsekua i ambe nitamatinia, exespka máteru ánjelini auandarhu uératini kétseni jarhani, kánekua juramukua jinguni, ka parhakpeni imeri t'íntskua jimbo eramarhendespti.

² Ka uinhachasïrempti uandani: “¡K'éri Babilonia xerenhantastia, jo xerenhantastia! Nóambakiticheri k'umanchekuestia ka nósesi jásï espirituecheri k'ataperakuestia ka iámendu nósesi járhati káraticheri xerekuestia, ka ikichekueni járhati tsípiti manakorhericheri irekuestia.

³ Jimbokaksï iámendu iretecha kauikuani arhaska enga ísku jandi újpejka, ka parhakpeni anapu irechecha inde jingunksï ísku jándi úkorhesti, ka parhakpeni anapu ambe atarantsïtichaksï inde jingun jatsikorheri úkorhesti jimboka ima xáni tiripitiri ambe piákuasïrempka.”

⁴ Ka máteruni uandakua ma kurhaspka auandarhu uératini enga arhimpka: “Jucheti ireta, Babilonia uéakuntsï je, ásïksïni pájtame k'amanharintani ka cha jamberijtsï nósesi p'ikuastanhani; ka kasïngurhikuechantsï cha jamberi p'iuani.

⁵ Jimbokaksï inderi k'amanharhintskuecha, auandarhu jamberi niaraskia, ka Diósï imeri k'amanharintskuechani miákuantastia.

⁶ Tsimani xanhari sánderu k'uanhaskukuntsï je, eska inde na xáni nósesi útspeka, tsúntsuni enga inde kauirpetarempka, tsimani xanhari sánderu jatsirakuntsï je.

⁷ ¡Iásïchka uétarantsï je xáni nósesi p'ikuastaparini!, Enga inde jatsikorhekua jimbo xáni k'éramakorhempka. Jimboka mintsita jinguni ísï p'ikuerhenhesïnga: ‘No tsîndiska, irecheni uaxakatixaka, ka nómeni nósesi p'ikuarheraaka.’

⁸ Ísï jimbosï ma jurhiatekua jimbojku kasïngurhikuechaksï janokuaati: K'arhimaati ueraati ka uarhiati, ka kurhinhantaati. Jimboka Acha Diósï enga imani k'amanharhitantaka uinhapitiska.”

⁹ Ka parhakpeni anapu irechecha engaksï imani jinguni íntskukorhentaka tsípekorheni ka ísku jándini, tátsekuaksï p'amojkuni ueraati, engaksï exeaka jima sïrajpeni jarhani.

¹⁰ Imaksï iauani pakaraati xáni chéni, enga ima k'amajkuni jauaka, ka uandaatiksï: “¡Ájkeru, ájkeru k'éri ireta Babilonia, engari xáni uinhapekua jatsika! Andikinisï mátirku janoche iámendu jásï k'amanharhintskuecha.”

¹¹ Ka parhakpeni anapu ambe atarantstichaksï uerasïndi ka p'amondakorheni imani iretani jimbo, jimboka nóteru jauakia nésï piákuaua:

¹² Tiripiti ka taiakata ambe, ka tsakapu sési jánhari ka tsakapu ambakiti mereari ambe; ka ambakiti takusï, urapiti ka charhapiti ka sanupiti ka sununderi ambe; ka mámaru jásï chkári p'untsup'untsujkuti ambe, ka iámendu úni ambakitiri úkata ambe ka ístu ambakiti chkáriri ka tiámu charhapitiri ka tiámu chuperiri ka tsakapu urapitiri ambe;

¹³ ka p'untsumarhari ambe, ka tiósxunhanda ambe, ka kauikua ka aseti ambe, ka tsïreri ka tríju ambe, ka xanchakicha ka karichicha ka tekechuechani ambe, ka mótsetarakuechani ambe, ka jántspiri atarantskatechani ambe.

¹⁴ Ka uandaatiksï: “Nóteruri jatsiakia amanhejchakua áspenharhi, engari xáni anhejchempka; ka iámendu sési jásï ka jukaparhakua ambe ka mereari ka pitsïpiti ambe k'amakurhistia ka nóteruri méni exeakia.”

¹⁵ Ka ambe atarantsticha, engaksï ima jimbo jatsikorheri úkorheka, iauanksï niántaati xáni chéni enga ima k'amajkunhantani janhaaka, ka ueparini ka p'amondakorheparinksï uandaati:

¹⁶ “¡Ájkeru! ¡Ájkeru! K'éri ireta enga xáni ambaki takusï urapiti ka charhaptsï ka charhapiti xukuparhantempka, ka enga tiripiti ka tsakapu mereanhari ka ambakiti uekajchakua pirirekorhentempka

¹⁷ Jimboka mátirku k'amandeska xáni kánekua jatsikorhekua.” Ka iámendu engaksï icharhuta teparichani manatajka, ka engaksï jima jatapajka ka uarhuricha, ka iámendu engaksï japundarhu ánchekorherika, iauanksï pakaraspti;

¹⁸ ka ísï exerini enga kurhini jápkia, uinhachasptiksï: “¿Náki máteru i k'éri ireteni májkueni jáxespi?”

¹⁹ Ka ueparini ka p'amondakorheparinksï t'upuri jápu atajtsïtini uandasïrendiksï: “¡Ájkeru! ¡Ájkeru, k'éri ireta! Enga ima xáni jatsikorhekua jimbo icharhuta kámatichani jatsikorheri úaka. ¡Ka mátirkuksï k'amantskanhastia!

²⁰ Auanda, tsípe imani jimbo, ka cha Diósïri uandarichajtu tsípe je, ka Diósïri erakukatechajtu tsípe je, ka Diósïri arhijtsïkpirichajtu tsípe je, jimboka Diósï chánksïni jimbo imani ikimeska.”

²¹ Jimajkani ánjeli uinhapiti ma, k'énharhi tsakapu urhurhatarhakua ma tarhataspti, ka k'éri japundarhu k'uanimaspti uandaparini: “K'éri ireta Babiloniajtu májkueni mátirku k'uanimanhaati, ka nóteru méni xénhantaati.

²² Ka nóteru ma jásï kústati kurhakorhiati uanajtsïkuni, ka nóteru ma pireri; ka nóteru ma jásï ánchekorheri jauatia; ka nóteru ma urhurhatarhakua kurhakorhiati urhuni jarhani.

²³ Ka nóterukini ma jásï erajkutarakua t'íntskaracheati; nóteru ma tembuchakua kurhakorhiatia úkorheni. Jimbokaksï chéti ambe p'ípaticha parhakpenini mingorhesïrenka, ka iámendu iretechaniri sïkuaaska.”

²⁴ Ka imani iretarhu Diósï uandaricheri ka Diósïri erakukatecheri iurhiri xénhantasti, ka ístu iámenduecheri engaksï xáni parhakpeni uándikunhaka.