Apocalipsis 17 - Diósïri Karakata P´urheepecha Jimbo

Uarhiti ísku jándi k'amajkunhantaspti

¹ Ma, ima iúmu tsimani ánjelicheri enga iúmu tsimani tsúntsuechani jatsiapka, andarherasptirini ka arhindini: Jútkiria, exeraakakini enga ima uarhiti k'éri ísku jándi maiampetaranhaaka, enga japundecharhu uaxameka;

² imani jingunksï parhakpeni anapu irechecha íntskukorhentasti ísku jándini, ka parhakpeni anapuechaksï imani ísku jángua jimbo kauisti.

³ Ka tátsekua Espiritu jánhaskua jimborini páspti jimesï enga nónema irekaka. Ka uarhitini ma exespka, enga nósesi jásï manakorheri charhapitini ma jatarini jápka, ka mámaru jásï uandakuechani kararekorheatini jarhani enga Diósïni útakujka; ima nósesï jásï manakorheri iúmu tsimani éjpu jukaspti ka témbeni sïuanguechani.

⁴ Uarhiti takusï charhaptsï ka charhapiti xukuparhatixapti, ka meremerejkuxapti tiripiti jimbo ka tsakapu sési jánharhi jimbo ka pérla jimbo, ka tsúntsu tiripitiri ma kámaxapti nósesi jásï ambe ka ísku jángueri ikichakua ambe uiniratini.

⁵ Ka tsérhukuarhu uandakua ma kararhutixapti, enga no iámendu kurhangunhajka: NÁNDE K'ÉRI BABILONIA ÍSKU JÁNDICHERI, KA IÁMU PARHAKPENI ANAPU KURHUNHPERATA.

⁶ Ka uarhitini exespka eska kaxumbiticheri iurhiri jimbo kauirixapka, ka imecheri iurhiri jimbo engaksï Jesusini jimbo uarhika. Ka ji sési ískuni pakareraspka ísï exerini.

⁷ K'órurini ánjeli arhispti: ¿Andirisï ísku pakarera? Jíkini aianguaka uarhitiri no jánhaskakua, ka nósesi jásï manakorheri enga jatarini jaka, enga iúmu tsimani éjpu ka témbeni sïuangua jukaka.

⁸ K'éri nósesi jásï manakorherini engari exeka, ióntkisï jámendi ka iásï nóteru jámasïndia, k'óru k'éri jauanhekuarhu uénhentaati enga úka uarhikuarhu isï niraxati. Ka parhakpeni anapuecha engaksï tsípekueri karakatarhu no jatanharhika, jiántki enga parhakpeni kueraanhaka. Ískuksï pákareraati nósesi jásï manakorherini exerini, enga ióntki jámempka, ka enga nóteru jámpkia ka enga k'óru ménderu junguaaka.

⁹ Jiminisï mímixekua ka jurhengua uétarhejti: Iúmu tsimani éjpuechaksï iúmu tsimani juátechesti enga uarhiti uaxajtsïkutini jaka, ka iúmu tsimani éjpuechaksï irechechesti.

¹⁰ Iúmu irechekuechaksï k'amakurhistia, ka máteru iásï juramuxati ka máteru nótki jurhasïndi, ka enga janoakia no ióni jauati.

¹¹ Ka k'éri nósesi jásï manakorheri enga ióntki jámempka ka iásï nóteru jarhania, iúmu tanimu úni jamani irechesti ka iúmu tsimanicha jinguni miiukorhesïndi, ka uarhikuarhu isï niraxati.

¹² “Ka témbeni sïuanguecha engari exeaaka, témbeni irechechesti engaksï juramukua nótki p'irajka; k'óruksï k'éri nósesi jásï manakorheri jinguni sóndijku irecheuati.

¹³ Íksï teruatperatixati uinhapekua ka juramukuani k'éri nósesi jásï manakorherini íntskuni.

¹⁴ Íksï Karichi sapichu jinguni uarhiperaati, ka Karichi sapichu andauati, jimboka imasï K'éri Acheka ka K'éri Irecheni, sánderu eska ne uejki, ka p'ímarhekatecha jingunisti ka erakukatecha jinguni ka mintsinharhikuecha jinguni.”

¹⁵ Ka ánjelirini arhisptijtu: “Japunda engari xáni exeka jima enga uarhiti ísku jándi uaxameka, iretechestiksï ka k'uiripuecha ka mámaru jásï uandaricha.

¹⁶ Ka témbeni sïuanguecha ka k'éri nósesi jásï manakorheri engari exeka, uarhiti ísku jándinksï kurhunheati, jandiojku ka patsïki jásïksï jurarkuati, ka ántaatiksï ka kurhintaatiksï,

¹⁷ jimboka Diósï mintsitarhu pérakuaska eskaksï úaka néna enga ima uéjka: Eskaksï teruatperaaka k'éri nósesi jásï manakorherini irechekua íntskuni, eka jamberi k'amarhuska eska na Diósï uandarini jaka.

¹⁸ Ka uarhitini engari exeka, k'éri iretesti enga iámendu parhakpeni anapu irechechani juramukuajka.”