Apocalipsis 16 - Diósïri Karakata P´urheepecha Jimbo

Iúmu tsimani tsúntsuecha

¹ Ka kurhaspka nema tióstarhu uératini k'éri ma uinhachani iúmu tsimani ánjelichani arhiani: “Ni je ka parhakpenirhu mónda je indeni iúmu tsimani tsúntsuechani Diósïri ikiatani.”

² Ka ánjeli ma urhepaspti ka imeri tsúntsuni parhakpenirhu móndaspti, ka kuiripu engaksï nósesi jásï tsípitiri mínda jukapka ka imeri eratakata úkatanksï kómu arhini, uénasptiksï tererhekorheni ka nósesiksï jájkundini.

³ Ka máteru ánjeli imeri tsúntsuni japundarhu móndaspti, ka japunda iurhiri úkorhentaspti uarhiririni jásï, ka iámendu jásï tsípitichaksï uarhimespti.

⁴ Ka materu tanimu uni jamani ánjeli imeri tsúntsuni iurhekuecharhu ka itsarhuecharhu móndaspti, ka iurhiriksï úkorhentaspti:

⁵ Ka kurhaspka ánjeli itsïrhu anapuni, arhini: “T'úrisï sési jimboeka engari jindeka ka engari jindepka, pímbinhaxetiskari jimbokari ísï útatspesïnga,

⁶ jimbokaksï imasï Diósïri erakukatechani ka uandakua párichani uándikuaka, ísï jimborisï t'u iurhiri itsïmataaka; jimbokaksï andakorheska.”

⁷ Ka kurhaspka kéjtsïtakuajtu uandani: “Ísïsti, Acha Diósï engari iámendu ambe újka úni, t'úri jurhimbitku ka sési jimbori útatspesïnga.”

⁸ Ka t'ámu úni jamani ánjeli imeri tsúntsuni tata jurhiatani móptsïtaspti, ka juramumenhasptiksï k'uiripuni kurhirani.

⁹ Ka kurhinhaxanhapti xáni aparhenhani; ka nauejki isï, nóksï moantasïrenti sánderu sánksï Diósïri jakangurhikuani útakuspti, imani enga kasïngurhikuechani juramukuajka, ka nójtuksï móantaspti ka k'éri ambeksï arhini.

¹⁰ Ka iúmu úni jamani ánjeli imeri tsúntsuni nósesi jásï tsípitiri juramukuarhu móptsïtaspti, ka imeri irechekuarhu pájpakandespti ka k'uiripu katsamuskorhesïrempti xáni p'amerani,

¹¹ Xani nósesi jásï p'ikuarherakua ka p'amerakua jimbo Diósïnksï auandarhu anapuni nósesi arhisïrempti, ka nóksï móantaspti imecheri úkuechani jimbo.

¹² Ka kuímu úni jamani ánjeli imeri tsúntsuni móndaspti, urhekuarhu enga Éufratesi arhinhempka; ka iurhekua k'arhinguspti ka irechechani jurhiata andarhakuarhu isï anapuechani xanhari mitakuaspti.

¹³ Ka exespka ambe enga t'arhe k'éri kakoni uéchempka, ka enga nósesi jásï tsípiti manakorheri uéchempka, ka enga arhijtsïkpiti k'arhajpiri uéchempka, tanimu nósesi járhati kókinini járhatichani.

¹⁴ Nóambakiticheri espirituestiksï engaksï k'érati mínda úauempka, ma parhakpenksï uéraspti irechechani ióarhiantani, ka iámenduechanksï májku k'éri úantani, ka Diósï jingunksï uarhipetaraani imani k'éri jurhiata.

¹⁵ “Jinguntku ja je, ¡Ji sïpajkurheni junguaka!. Ka ima engaksï no k'uíni jauaka ka xukuparhakua jimajku jatsikorheni tsípeatiksï, nóksï patsïkjásï jauarati ka k'uratsetakorhenksï.”

¹⁶ Ka irechechaksï jini uandajpanhantaspti enga ebreo jimbo Armajedoni arhinhajka.

¹⁷ Ka iúmu tsimani úni jamani ánjeli imeri tsúntsuni tarhiatani páraspti, ka k'éri ma uandakua tióstarhu uéraspti, k'éri uaxantskuarhu ueratini uandaparini: “Úkorhestia.”

¹⁸ Ka jimajku piritani uénaspti, ka nósesi kúskani, ka charancheni, ka k'éri ma jencheni, enga nóna jatini ísï jencheni jápka eska k'uiripu xáni ióni parhakpeni irekakia.

¹⁹ Ka k'éri ireta tanipuru arhukurhispti, ka iretechaksï iápuru parhakpeni xerendurhikorhentaspti, ka Diósï k'éri ireta Babiloniani miántaspti ka kauikua ikiateri itsïmatani.

²⁰ Ka noretu ma ómekuekua úspti xarharania, ka juátechaksï nóteru únia exénhani.

²¹ Ka k'énharhi xanuata uekorhespti, auandarhu uératini ka k'uiripuni andajtsïkuerani, xanksï k'uetsapenharhini eska ma xúndi tsíri. Enga ísï xánuapka, k'uiripu Diósïni nósesi arhisïrempti, jimbokaksï ikimperakua jimbo xáni nósesi p'ikuarherasïrempka.