Apocalipsis 12 - Diósïri Karakata P´urheepecha Jimbo

Uarhimasï ka t'arhe k'éri kakoni

¹ Ka auandarhu k'éri ma mínda xarhanchespti, uarhiti ma tata jurhiateni xukuparhantatini, ka nana kutsïni jatandutini jarhani, ka kanakua ma témbeni tsimani jóskueri úkata jukajtsïtini jarhani.

² Ka ima uarhiti sapini erokorhexapti, ka uinhachasïrempti k'úparhata p'amerani jimboka sapini kámapiringia.

³ Ka auandarhu máteru mínda xarhanchespti: T'arhe k'éri ma kakoni charhapiti xarhanchespti, enga iúmu tsimani éjpuechani jukaapka, ka témbeni sïuanguechani, ka mándani éjpurhuksï kanakua jukajtsïatini.

⁴ Ka ch'éti jimbo sáno terujkani auandarhu anapu jóskuechani pájtamaaspti, ka parhakpenirhu uekopaaspti. K'éri kakoni urhepani anhaxurhikuspti uarhitini enga sapini kámapiringa, ka uájpani enga andajpenupiringa sontku mápchandini.

⁵ Ka uarhiti tataka sapichuni ma kángorhespti, enga iámendu iretechani uinhandirakuauaka juramukuani; ka uarhitinksï euapkuspti chárhakuni ka Diósïni jingunksï imeri uaxantskuarhu pérani.

⁶ Ka uarhiti jimesï sïpakorhespti enga nónema irekaka, enga Diósï ambantskakutini jatsipka eska tanimu uéxurhini ka terujkani jima t'ireranhapiringa.

⁷ Jimajkani uénaspti auandarhu uarhiperanhani: Migeli ka imeri ánjelichaksï t'arhe k'éri kakoni jinguni uarhiperaspti. Ka k'éri kakonijtu imeri ánjelicha jinguni uarhipespti,

⁸ ka nóksï úspti andani, ka auandarhuksï nóteru jatanhesptia.

⁹ Ísï jimbo t'arhe k'éri kakoni, akuitse enga iónikia, enga Nóambakitika ka Satanasi arhinhajka, enga ma parhakpeni terungutpejka auandarhu pétanhantaspti imeri ánjelichani jinguni ka parhakpenirhuksï k'uanijpanhaspti.

¹⁰ Ka tátsekua auandarhu kurhaspka nema uinhachani arhini: Iásï k'óru juchari Diósïri p'ímutantskua ka uinhapekua ka Irechekua janostia, ka Krístueri juramukua; jimboka ima enga juchari erachichani uandakuantauempka uekajpanhaskia, enga Diósïni japarini chúrekua ka jurhiakua uandakuantaani jarhempka.

¹¹ Ka imaksï Karichiri iurhiri jimbo andastia ka imecheri uandantskua jimbo, jimbokaksï no p'amojkukorhespka uarhini.

¹² Ísï jimbo, ¡Cha engajtsï auandarhu jaka tsípe je! ¡Ka cha engajtsï parhakpeni pakaraka ka engajtsï japundarhu jaka náxantsï kómu nitamanchaa, jimboka Nóambakiti kánekua ikiatintku kétseskia, míteparini eska namuni jurhiaterku jámakia!

¹³ Enga k'éri kakoni parhakpeni k'uanijpanhani p'ikuarherapkia, uarhitini andanguni kámaspti enga tataka sapichuni kángorhepka.

¹⁴ K'óru uarhiti tsimani p'arhaskua k'érati tsápkiri intsinhaspti, eska jimesï enga nónema irekaka kárapiringa, k'éri kakonini iauani jarharetini, jima enga uarhiti tanimu uéxurhini ka terujkani t'ireranhapiringa.

¹⁵ Ka akuitse iurhekua k'érini jásï ma uéchaspti, uarhitini iurhentpetarakuekani;

¹⁶ k'óru parhakpeni uarhitini jarhuataspti: Ka echeri mítakorhespti ka iámendu itsï jimesï inchatsespti enga kakoni uéchapka.

¹⁷ Jimajkani k'éri kakoni uarhitini nósesi ikiakuspti, ka niraspti máteru uájpechani urhutakuani, imechani engaksï Diósïri juramukuechani janhanharhiajka ka engaksï Jesukristueni jámajka.

¹⁸ Ka k'éri kakoni kutsarindu japundarhu uanamukuni pakaraspti.