Apocalipsis 11 - Diósïri Karakata P´urheepecha Jimbo

¹ Ka pirimueri ts'éretatarakua ma intsïnhaspka sïmbeni jásï ma, arhiparintsïni: “Jauara ka Diósïri tióstani ts'éreta ka ístu kéjtsïtarakuani, ka miauantsï namuni engaksï jima kómu arhani jaka.

² K'óru ekuarhuni ásï ts'éreta, jimbokaksï no jakajkuticha intsïnhaska ka imaksï Jerusaleni erakukatani, tanimu uéxurhini ka terujkani nósesiksï jántskantaati.”

³ Ji axauaka jucheti tsimani uandarichani turhipiti ch'éch'erasï xukuparhantinksï, eskaksï tanimu uéxurhini ka terujkani arhijtsïkpeaka.

⁴ Imaksï tsimani olibusïri anhatapuechesti ka tsimani ch'urhinguecha, engaksï Diósïri urhepani ka echerhindu jaka.

⁵ Ka eka nema jámapiringa nósesi úkuani, chpíriksï uéchasïrempti ka imeri ikiatspirichanksï kurhiraani, ísïksï uarhiati ne enga jámaka nósesi úkuani.

⁶ Íksï uinhapekua jatsisti auandani míkani eska imani jurhiatekuechani no janiaka, engaksï Diósïri uandakuani aiangpeni jámani jauaka; ka uinhapekuajtuksï jatsisti itsïni iurhiri úntani, ka parhakpeni anapuechanksï nósesi úkuani, iámendu nósesi jánhaskorhekua jimbo, na enga jatinksï ima uékaaka.

⁷ Ka engaksï k'amarakia aiangpentani, nósesi jásï tsípiti jauanhekuarhu uénheati ka Diósïri uandarichani jingunksï uarhiperaati, ka andauati ka uándikuauati.

⁸ Ka ima tsimani uarhirichaksï kópekuarhu péranhaati k'éri iretarhu enga Sodoma o Ejiptu jinguni terukutanhantajka, jima engajtu imecheri Acha cháparhatanhapka.

⁹ Ka iápuru isï anapuechaksï, ka máteru iretechaksï, ka mámaru jásï uandarichaksï uarhirichani tanimu jurhia ka terujkani exeauati, ka nóksï jurajkuauati eskaksï jatsianhantaaka.

¹⁰ Ka parhakpeni anapuechaksï tsípesïrendi engaksï ísï uándikunhapka, ka k'uínchekuaksï ma úntapirindi ka uánekua ambeksï intsïmperapirindi, jimbokaksï i tsimani Diósïri uandaricha parhakpeni anapuechani xáni nósesi káaspka.

¹¹ K'óru tanimu jurhia ka terujkani nitamatinia, Diósï imeri tsípekua p'unirhukuaspti ka incharhiaspti, ka jauarasptiksï, ka ima engaksï exeani jápka ískuksï pakareraspti chéni,

¹² ka kurhasptiksï, k'éri ma uinhachakuani auandarhu ueratini, arhiani “Ixueni karhara je” ka janikuecharhu ísïksï karhanchentaspti; imeri ikiatspiricheri japandiru.

¹³ Ka jimajku k'éri ma jenchespti, ka namuni k'umanchekuechani iretarhu xeriantaspti, ka jenchekua jimbo iúmu tsimani míli uarhinhaspti, ka engaksï no uarhipka chérakorhesptiksï ka Diósï auandarhu anapunksï k'éri ambe arhispti.

¹⁴ Ka tsimani úni jámani nósesi úkorhekua nitamaspti. Exe k'óru máteru jurhaxati.

Iúmu tsimani úni jámani siuangueri kústatarakua.

¹⁵ Iúmi tsimani úni jámani kústaspti, ka auandarhu uinhachanhani kurhakorhespti arhinksï: Iámendu juramukua íni parhakpenirhu juchari Acheristia ka imeri Újchakurakateri, ka imaksï juramuati méntkisï.

¹⁶ Ka ma ekuatse t'ámu achamasïcha engaksï uaxantskuecharhu Diósïri urhepatini uaxakatini jápka, Diósïnksï tinguikuatsekuspti ka k'éri ambeksï arhini,

¹⁷ arhiparinksï: Diósïmaiamu Acha Diósï, engari iámendu ambe újka úni, engari jindeka ka engari jindepka, jimbokari chéti uinhapekua p'iraskia ka juramuxakaria.

¹⁸ Ka k'éri iretechaksï ikiakorhespti; k'óru janostia chéti ikimperakua, ka engari uarhirichani arhinharhikuauaka, ka chéti uandakua párichandi maiamuantauakia, ka ístu chéti erakukatechani, ka imani engaksïni t'úngeni janhanharhijka, sapirhati ka k'ératichani; ka imechandi k'amajkuauaka engaksï parhakpenini ikichakua újka.

¹⁹ Jimajkani Diósïri tiósta enga auandarhu jaka mítakorhespti, ka tióstarhu Diósïri aiatsperakueri jatakua eranditakorhespti. Ka piritaspti, ka uinhachanhani, ka charancheni, ka jencheni, ka k'énharhi xanuani.