3 Juan 1 - Diósïri Karakata P´urheepecha Jimbo

Uandajperata

¹ Tiósïo anapu urhejtsïkuri Gáioni uandajperata axakuxati, imani enga sési jimbo xénhchajka.

Gáioni k'éri ambe arhini

² Erachi xénhchakata, engani uandamukukorhejka, kurhajkorhexaka eskari iámendu ambe sési úni jaka, ísï eska chéti kurhangukua na sési nirani jaka ka eskari no p'amenchani jauaka.

³ Kánekua tsípeska engaksï erachicha máru juka ka aianguntsïni eskari ísï irekaxaka eska néka.

⁴ Imani jimbo sánderu tsípesïnga engajtsïni aianguka eskaksï jucheti uátsïticha sési irekaxaka, eska néka.

⁵ Xénhchakata, sésiri marhuakuaxaka engari juchari erachichani jarhuataani jaka, na uékiksï inde uérakua iretika.

⁶ Indeksï uandantastia iámendu tángorhentsticha japarini na engari xáni sési kámpejka. Íntsaa sánderu, jurajkuksï pákorheni kánekua íntsaa, eska Diósï jaiapanhentaaka.

⁷ Jimbokaksï inde Jesukristuni jimbojkusï uéraka ka no jakajkutichanksï nómbema euaasïndi.

⁸ Jimbochisï jucha íntsauaka, ka ísï jámanchi jarhojpeaka imani jinguni enga ísïka.

⁹ Ji karakuaska jucharichani, enga úka, Diótrefesï no jiókorhesïndi juchari uandakuani, jimboka inde kánekua juramunhchasïnga.

¹⁰ Ísï jimbo, jiájkani engani ji janoaka, xukaaka, jimbokajtsïni nósesi uandatseni jarhasïnga; ka útasï no xántku, erachichantu no jiókaasïndi, ka nójtu jiáretaasïndi imechani engaksï uékani jarhajka sési eroani ka jamberi imeri tiósïo petantaasïndi imechani engaksï uékani jarhajka jarhojpeni.

¹¹ Erachi xénhchakata, ásï nósesi ambe eranhakua p'ita, sánderu sáni sési ambe eranhakua p'ita. Ne enga sési ambe újka Diósïristi; ka ne enga nósesi ambe újka, Diósïni nótki mítesïndi.

¹² Ka Demetrioueri ambeksï k'óru, iámenduecha sési uandantasïndi, imajtu jamberi enga ísïka. Ka juchajtuni sési ambe uandapekusïnga, ka míteskari eskachi no chkuándirasïnga.

Uandanukorhentani

¹³ Uánekua ambeterukini arhikuekaxaka, enga úka, nókini uéksïnga karakata jimbo arhini,

¹⁴ jimbokani erokaxaka eskakini no ióndaaka xéntani ka erateparinikini arhikorheni.

¹⁵ Eskari sési jámani jaka. Chéti p'íchpirichaksïni uandakua axachexati. Ka mándani arhia aianguani juchari p'íchpirichani eskani jucha kurhangorheaxaka.