2 Timoteo 4 - Diósïri Karakata P´urheepecha Jimbo

¹ Diósï ka Jesukrituni japarinikini kómu arhixaka, enga arhinharhikuauaka tsípiti ka uarhirichani, enga ísï junguaka eska Irecha.

² Eskari arhijtsïkpeaka ka uinhamarhetspeni enga ísï k'uaniaka, ínchajtsïtaa ka arhijtsïkua tekantsparini ka sési jurhenpeparini.

³ Jimboka niáraaka jurhiakua enga nóteru uékanhaaka ambakiti aiangperakuani kurhanhani, erakukorheatiksï jurhetpirini enga imani ambe uandaaka ambe engaksï ima uékaaka kurhaani.

⁴ Nóksï kurhanhchaati ambakiti aiangperakuani k'óruksï ísku jásï uandantskuechani sánderu kurhanhchauati.

⁵ Jimborisï t'u jinguntku jauaka, ka tekantsï mámarhu jásï kómu nitamakorhekuechani, ka jángorhentsï sési arhijtsïkpeni.

⁶ Jimbokani uarhikua niáranchaxakaia.

⁷ Ji méntkisï jángorhentaska iámendu ambe Diósïni kurhandirakuni, ka méntku ísï úska ka Diósïni mintsikaska.

⁸ Niáraati jurhia enga Diósï arhinharhikpeaka, ka mítetixaka eskarini ima jiáni kanakua ma íntskuaka jimbokani ji sési kurhandirakuska, k'óru no jíndenkurinisï íntskuati, iámendu imechantu engaksï májkueni sési kurhandirakuka ka engaksï ísï mintsikani jaka.

Uandanuntskua

⁹ Jángorhentsï sóntkurini jurhani exeni,

¹⁰ jimbokarini Démasï jurarkuska ka Tesalonika nirasti, jimboka parhakpeni anapu ambe sáni xénhchaska, ka Kresente, Galasia ísï nirasti, ka Titu Dalmasia ísï nirasti.

¹¹ Lúkasïjkusï jíndeni jinguni pakarati. Jirinhantsï sáni Márkusïni ka júajta, imarini kánekua jarhuataati jucheti ánchekorhetani.

¹² Ji Tíkikuni Éfesu axaska.

¹³ Engari jurhani jámaaka, juájtacherini sununda ka karakatechani, k'óru ásï mirikurhia sïkuiriri karakatechani, engani Tróasï, Kárpouo jurajkuapka.

¹⁴ Alejandru enga tiámu úrika, kánekuarini nósesi kámasti, Achajtu ísï maiamuntaati eskarini na kámaka.

¹⁵ T'újtu xéparini jáma ima jinguni, jimboka ikiasïnga juchari arhijtsïkperatani kurhani.

¹⁶ Iámenduechajtsïni jurarkuspti ka nónemarini kuájpentaspti juramutichani jinguni, jiáni engani ji nósesi arhinhapka.

¹⁷ Diósïrini k'óru jarhuataspti ka uinhaperantasptirini ka ísï jimbo imeri uandakua uápuru ísï mítenhasti. Ka ísï jámani p'ímutantastirini eskarini púki no ántapiringa.

¹⁸ Acharini métku ísï kuájpeati, ka p'ímutantatirini ka imeri t'ímarhandekuarhurini péraati. ¡Eska ima méntku ísï k'ériuaka! Eska Ísïuaka.

Uandanuntskua

¹⁹ Priskani ka Akilani uandajperata axakuaxaka, ka ístu Onesiforouo anapuechani.

²⁰ Erastu, Korintu pakarasti ka Trófimuni Miletu jurakuska, jimboka p'amenchaxapka.

²¹ Jángorhentsï jiáni ísï janoni enga nótki tsírakorheni jauaka. Uandajperataksïni axachexati Eúbulo ka Pudente ka Lino ka Klaudia ka tiósïo anapu erachicha.

²² Eska Acha Jesukristu t'úngeni jinguni jauaka ka Diósïksïni újchakure.