2 Timoteo 3 - Diósïri Karakata P´urheepecha Jimbo

K'amarhuni jámani nósesi jánhaskorheati

¹ K'úanisïndi eskari mítetini jauaka eskaksï jurhiatekuecha enga k'amarhukuni jámaaka, nósesi jánhaskorheka;

² K'uiripu tumina kanhchaati ka sési xékorheati ka Diósïniksï no janhanharhiati, níjtuksï táte jémbechani kurhandirakuaua.

³ Nóksï p'amojkpeati, ka nóksï tekatspentaati ka arhinhchpitiuatiksï ka sési jásï ambeksï no jaiapanhentaati.

⁴ Nóteruksï mintsinharhikueuati ka nóksï eratseparini úati ambe ka Diósïnksï no kurhandirakuati ka néna uéjkiksï jámati.

⁵ Diósï jákajkutinksï jámati, koru irekua jimboksï no jákajkutini jámaati, jarharea xárhati k'uiripuechani.

⁶ Imajtuksï imecha jingunisti engaksï inchatspepujka ka uarhiti ísku jándichani tandojchaani, engaksï no újka p'íngukorheni.

⁷ Méntku ísïksï jurhengorheni járhasïndi k'óruksï no úsïndi sési kurhanguni.

⁸ Ísï eska Jánesi ka Jámbresi engaksï no uékempka Moisesini kurhajchani, xárhati k'uiripuechaksï nósesi eratsesïndi ka nóksï uékasïndi eska ambakiti aiangperakua mítekorheaka.

⁹ Nómbemaksï úsïndi úni, jimboka sóntku mítekorheaka eskaksï tsîjtsïtixaka, ísï eskaksï na úkorhenchapka Jánesi ka Jámbresi.

Máteru arhistakuecha

¹⁰ T'u k'óruri sési míteska jucheti jurhentperakuani ka jucheti irekua ka jucheti eratsekua ka jucheti jakajkukua ka jucheti tekantskuani.

¹¹ Mítetixakari nénasïni kómu jámapki engajtsïni jupikuekapka Antiokia ka Ikoni ka Listra, k'órurini Acha Jesukristu kúajchakuspti.

¹² Ka iámendu engaksï uékaaka ísï irekani eska Jesukristu, Diósïni marhuakuparini jupikakuekaatiksï.

¹³ Ka no ambarhati k'uiripuecha ka tandojchpiricha sánderuksï no ambarhaati, ísï eskaksï na tandochpeaka imajtuksï májkueni tandojchanhaati.

¹⁴ T'u sési úra imani engari jurhengorheka ka engari mintsikani jaka, ka ásï mirikurhi nékinisï jurhenda.

¹⁵ Miántsï eskari sapichku míteska Diósïri karakatani, ima karakatakini mímixetaraati ka p'ímutantatikini Jesukristuni jakajkuparini.

¹⁶ Karakata Diósïri eratsekuesti ka jurhentpesïndi ka jánhastpesïndi ka sési irestpentasïndi,

¹⁷ Ka ísï jámani Diósïri jántspiri iámendu ambe sési úati.