2 Timoteo 2 - Diósïri Karakata P´urheepecha Jimbo

Tekantskua kánekua marhoasïndi

¹ Jucheti uátsïti uinhapentsï Jesukristueri kóntperata jimbo,

² ka indeni ambe engakini uánekuechani japarini jurhendaka, máteruechani ísï míndaa, eskaksï uánekuechani jurhendantauaka.

³ P'íkukorhentsï chéti nósesi nitamanhchakuechani eska Jesukristueri ambakiti p'urhejkuti ma.

⁴ Nóma p'urhejkuti enga íntskukorhentajka, ísku ambe ma míani jarhasïndi, imeri urhejtsïkurinkusï míani jarhajti sési marhuakuni.

⁵ Ístu ch'anari ma íntskukorhentasïndi sési ch'anani ka tátsekua andakua intsïnhasïndi.

⁶ Ka tarheri májtu enga echerini ánchetaaka, k'uanisïndi eska ima urheta intsïnhaaka p'ikuntskata.

⁷ Sési eratsentsï íni ambe engakini arhini jaka ka Achakini iámendu ambe jánhastaati.

⁸ Míantsï Jesukristuni enga tsíntaka, enga Dabiri sïrukuepka, ísï eska na arhijka ambakiti aiangperakuarhu engani ji arhijtsïkpejka.

⁹ Ka ambakiti aiangperakuani jimbosïni xáni nósesi nitamakorhenchani jaka ka tiámu tepekukata jimbo jotakata jaka, eska nosési úri ma, k'óru Diósïri uandakuani no néma úati jótani ka p'ínguni.

¹⁰ Diósïri erakukatecha jimbosïni tekaantka kómu nitamakorhekuechani ka ísïksï indejtu p'ímutanhantati ka Jesukristuni jinguniksï irentaati.

¹¹ I ísïsti: Ekachi Krístuni jimbo uarhiaaka, ístuchi Krístuni jínguni irekaaka;

¹² ekachi tekantaska nósesi nitamakorhekuechani, Krístuni jingunchi juramuaka; Ka ekachi no míteni uandaaka, imajtutsïni no míteni uandaati;

¹³ Na uéjkichi jucha Krístuni no kurhandirakuni, imajtsïni k'óru miáni jarhasïndi jimboka ima, ma ambejkusï uandajka. Ima no mómuntasïndi imeri aiatsperakuani.

Ambe enga Timoteu úaka

¹⁴ Míatantaa íni ambe ka Diósï japarini jurhendaa ka eskaksï no arhirperani jauaka. Arhirperata nómbema marhoasïndi, jinijkusï nósesi p'ikuastpejti ne enga kurhauaka.

¹⁵ Jángorhentsï Diósïni sési p'ikuastani. Ísï eska Diósïni ánchekorhekuni enga no k'uratsekuejka imeri uandakua etsakuni.

¹⁶ Ísku k'urha ísku jarhati uandakuechani, jimboka ne enga imani ambe uandaparini jámka sánderu arhisïndi no janhanharhini Diósïni,

¹⁷ ka xárhati uandakua pamenchakueni etsakurhipasïndi. Ísï jámaspti Imeneo ka Filetu,

¹⁸ támu ísïksï uandaparini jámasïrempti eskanha tsíntskua nitamaskia, ka ménderuenksï jakajkutpeni jakajkukuani.

¹⁹ K'óru Diósï sésimendu úskusti ambe enga karakata jaka: “Acha mítetixati nésï ima jínguni” ka “Ne enga kómu arhijka Achani, jarhare nósesi jásï ambeni.”

²⁰ K'éri k'umanchekuarhu ma, mámaru jásï t'irekua atarakuechaksï jarhasïndi, máruksï tiámu tiripitiristi ka máruksï chkáriristi ka máruksï k'uerekueristi: Máruksï k'uinchekuarhu úranhasïndi ka máteruksï mándani pauani úrakuesti.

²¹ Eka nema p'íngukorheska ka no k'amanharintani, ísïuati Diósïni jinguni eskaksï sési jásï atarakuecha tiripitiri, ka pímpinhaxeati ka sési marhuakuati Achani iámendu ambe jimbo.

²² Ásï ísku ambema eratseni ja eska tumbi ma na eratseni jarhajka, jángorhe kaxumbeni ka jakajku, ka xénhchpe ka sési jásï mintsita jinguni uandajpa Achani.

²³ Ísku kurha arhirperatechani, mítetixakari eska uarhiperata k'amarhusïnga.

²⁴ Ka Diósïri jántspiri ma no jindesti eska uarhiperatarhu ísï jámaaka, jima ménderueni sési arhijpe ka jurhentpe ka tekaantsï.

²⁵ Ka iatsitakuarhu ka sési arhiparini xukaani no kurhandirechani, mintsikaparini eska Diósï sési jájkuantauaka ka eskaksï míteaka ambakiti aiangperakuani.

²⁶ Ka imaksï jiáni exekorheati néna uérakuni no ambakitini enga katsijkuatini jápka.