2 Timoteo 1 - Diósïri Karakata P´urheepecha Jimbo

Uandajperata

¹ Ji Páblu, Jesukristueri uandakua pari, jimboka Diósï ísï uékaska, engajtsïni tsípekua aiacheka Jesukristuni jimbo.

² Timote, jucheti uátsïti xénhchakata. Eskakini Acha Diósï ka Acha Jesukristu újchakuraaka ka sési jakuakini íntskuni.

Engakini miántka

³ Engani uandamukukorhejka chúrekua ka jurhiakua miántasïnkakini ka diósïmaiamukua arhintasïnga Diósïni, engani ji sési marhuakujka, májkueni eskaksï na marhuakupka jucheti tuo anapuecha.

⁴ Mémechani engakini miántajka, imani miántasïnka engari uerapka ka jirinhantasïngakini jimbokarini t'u sési p'ikuastasïnga

⁵ Ka ístuni miántasïnga chéti ambakiti jakajkukuani, ísï eskaksï námendu jakajkuempka chéti nanita Loida ka chéti nánde Eunise.

Ambakiti aiangperakua kéri ambesti

⁶ Uinhaperantapiringari Diósïri kóntperatani engari jiákani p'ípka engakini újchakurapka.

⁷ Jimbokajtsïni Acha Diósï no íntskuska Espiritu chkéri ma o chérperakueri ma, Espiritu uinhapiti ma ka xénhchperakueri ka kaxumbekuerijtsïnisï íntskuti.

⁸ Ísï jimbo, ásï jáma k'uratseni jarhani engari juchari Acheri ambe jámaaka uandantani, níjtu jíndeni jimbo engani k'atakata jaka. Acheri uinhapekua jimbo uinhapekorhentsï ka tekaantsï iámendu kómu nitamakorhekua ambe, engari ambakiti aiangpekuani jimbo ísï nitamanchani jaka.

⁹ Diósïjtsïni p'ímutantasti ka p'ímarhestijtsïni k'axubentani ka ambakiti ambejtsïni míndasti, no juchari jángua jimbo, imeri xénhchperata jimboesti, engajtsïni Jesukristuni jimbo xarhatacheka,

¹⁰ ka iásï juchari p'ímutantskua Jesukristuni jimbojtsïni xarhatachesti xénhchperata, enga uarhikuani k'amajkuka ka t'ímarhandekuarhu pérasti ambakiti aingperakuani enga tsípekua íntspejka ka enga nómeni k'amakurhiaka.

¹¹ Diósïrini míndasti imeri uandakua etsakuni jamani ka jurhentpeni.

¹² Ísï jimbosïni kómu nitamanchani jaka. Koruni no k'uratsesïnga jimbokani sési mítetixaka nénisïni mintsikajki, ima k'eri ambesti ka mítetixaka eskarini kuájchakuaka ima jurhia jamberi.

¹³ Sési marhuata jurhengua ambe engakini jurhendaka, ka Jesukristueri jakajkukua jimbo xénhchpera je.

¹⁴ Espiritu Sántueri jarhojperata jimbo sési jurhentpe.

¹⁵ Eskari na mítekia, eskarini Fijelu ka Ermojenesi jurarkuska ka ístu Ásia anapuecha.

¹⁶ Eska Acha Diósï púakuantauaka Onesifuroeri k'umanchekuarhu anapuechani, jimbokarini Onesifuru k'óru mémechani uínhaperantaspka ka no k'uratsespti engani ji k'atakata jápka ka mémechandini sési arhintaspti.

¹⁷ Enga niáratinku jápka Roma, sónditkurini jámaspti jirinhantani ka xentasptirini.

¹⁸ Eska Acha Jesusï no mirikurhiaka ka eska p'ímutantaaka imani jurhiatekua enga arhinharhikperanhaaka. Iámendu ambe jimbo engajtsïni xáni jarhuataka jimajkani engachi Éfesu jápka, t'úri míaxaka.