2 Corintios 8 - Diósïri Karakata P´urheepecha Jimbo

Jarhojperakueri ambe

¹ Ka iásï tatecha ka nanecha, aianguakaksïni Diósï néna kóndentaski Masedonia anapu tángorhekuechani.

² Nájkirukaksï nósesi nitamanchani jápka nóksï ambe jatsikorhetini, imaksï tsípekua jinguni k'éri ma jarhojperata tánasti.

³ Ji xékorheska eskaksï tsípekua jinguni íntspeska, eskaksï íntskukorhentaspka íntspeni

⁴ útasïjtsïni kómarhiska eskaksïni jiáretapiringa jakajkutichani jarhuataani.

⁵ Jucha no xáni ísï erokorhexapka, Diósï uékasti eskaksï urheta Achani íntskukorhentapiringa ka tátsekua juchantsïnia.

⁶ Jimbochïsï Títuni kómarhipka eska cha jinguntu pakaripiringa jarhojperata tánani, eska na jimbo uénapka.

⁷ Cha engajtsï iámendu ambe jimbo urhepani jaka sánderuchka íntspe je. Chájtsï sési jakajkuskia ka uandajtsïkpesïngajtsïia ka mímixetiskajtsï ka jarhojpesïngajtsï, ka xénhchasïngajtsïni.

⁸ Nóksïni juramuchekuekaxaka, ekaksï máteruecha íntspeni jaka, chájtuchka xarhata je eskajtsï xénhchpesïnga.

⁹ Míteskajtsïia juchari Acha Jesukristueri kóntperatani, jatsikorheriparini juchantsïni jimbo no jatsikorheri úkorhespti, eskachi jucha imeri no jatsikorhekuani jimbo jatsikorherintapiringa.

¹⁰ Jurajkuksïni sáni arhini nénajtsï sési uéranchaa, jimbokajtsï cha uéxurhintki eratsespka tánani ka uénaspkajtsïa.

¹¹ Iásïchka sési k'amarhuku je eskajtsï na jimbo uénatini jápkia, uandakorhe je náxanhachantsï ua íntspeni.

¹² Jimboka niárani uandakorhenhani, tsípekua jinguni tánanhantaati ka nónema jauati enga no jatsini uandaaka.

¹³ Nójtu uétarhesïndi eska cha kómu nitamokorheni jauaka uékaparini eska máteruecha sési jánhaaka, sánderu sáni eska iámenduecha méntkueni jatsinhaaka.

¹⁴ Máteruechaksï uétarhenchaxati, engajtsï cha jatsika, tátsekuajtsï cha uétarhenchaaka ambe engaksï ima jatsika, ka ísï nónema uétarhenchaati.

¹⁵ Jimboka karakata arhixaka eska: “No jukari pakatasti ima enga kánekua p'ikuntaka, ka nójtu kueratanchasti ima enga sántku p'ikuntaka.”

Páblu Títuni ka pámpiri jémbechani arhistakuaspti

¹⁶ Diósïni diósïmaiamu arhixaka enga Títuni ménderu arhika eska úaka imani ambe engani ji cha jimbo uandanheani jápka.

¹⁷ Imaksïni uandaxechekuekaxapti jimborinisï kurhajchapti ka no jamberichi arhiska ima jandiojku eratsekorhesti niranksïni p'urhembeni.

¹⁸ Ka máteru jarhojpirinchi axaspka ima jinguni, enga ambakiti aiangperakuani iápuru tángorhekuecharhu sési uandantaaka,

¹⁹ ka támujtuksï tángorhekuecha erakusti eskajtsïni pámbeaka jarhojperata íntspentani, engani jucha etsakutspejka Diósïri k'érikuani marhuakuparini.

²⁰ Jimbokachi no uéksïnga eska xáni káni jarhojperata jimbo uandanhani janhaaka,

²¹ jucha no Diósïni jinguntku uéksïnga sési jámani, k'uiripu jinguntuchi uéksïnga sési jámani.

²² Ka mátertu jarhojpiri pámbeaxati, engani jucha uánekua ambe úratarakia, ka sóntku ninhejchasti jimbokaksïni kánekua mintsinharhisïnga.

²³ Títu jucheti pámpiristi, ji axaxaka eskaksïni niuaka jarhuatani; Ka máteruechanksï tángorhekuecha axasti, imaksï Krístuni marhuakuxamti.

²⁴ Kánekua sési káa je, eskaksï tángorhekuecha xéaka andiksïnisï jucha xáni mintsinharhijki.