2 Corintios 7 - Diósïri Karakata P´urheepecha Jimbo

¹ Jimajkani tatecha ka nanecha, ekachi indeni ambe aiamenhaka, ju je jurajkuni iámendu ambeni engajtsïni támisï jánhastatarajka; ka Diósïni janhanharhiparini ju je sánderu xénhchperani.

Páblu Korintu anapuechani tsípesïndi xéani

² Mintsita jinguntsïni kurha je; jucha nónemani nósesi arhiska, nónemanchi nósesi úkuska ka nónemanchi ambe euaska.

³ Nójtuksïni arhinharhikunhchaxaka, arhispkaksïnia eskajtsï jucheti mintsitarhu jauaka ekani xáni irekaska o ekani uarhiska.

⁴ Méntkuksïni iámu aiángukorheska eskani ji chánksïni jimbo kánekua tsípesïnga. Na uéjkini nósesi nitamanchani jarhani, ji cha jimbo uinhapentasïnga ka kánekua sési p'ikuarherani.

⁵ Ixu Masedonia, nójtsïni jurajkuntaxati, iápuru ísïjtsïnisï nósesi kámti, jukarijtsïni ambe arhisïndi ka uandanheatarasïndijtsïni.

⁶ K'óru Diósï enga mískorherichani karhoantajka, sésijtsïni p'ikuastantasti enga Títu janopka,

⁷ ka támu, uandapunguasti eska sési p'ikuarheraspka cha jinguni jarhani, eskajtsïni cha kánekua xénhchasïnga ka eskajtsï jíndeni jimbo uandanheaxaka, ka kánekuamenduni tsípeska ísï kurharini.

⁸ Ji uandanheaxapkia engaksïni ambe jucheti karakata nósesi p'ikuastapka,

⁹ iásï tsípentaskia. Nójtuni tsípentani arhixaka nósesiksïni p'ikuastatini, ima karakata marhuaspti jimbokaksïni Diósïsï mískorhetapka, juchaksïni nómbema nósesi úchespka.

¹⁰ Diósï p'ímutpentasïndi enga mískorhetpeaka, nóchka p'amondakorhekua ambesti; parhakpeni anapu mískorhekuasï uándikpejti.

¹¹ Exe je nenajtsï pakaraspi engaksïni Diósï mískorhetapka: ¡P'irhijkamaskajtsï jíndeni jimbo uandanheani ka kuájpekuekantsïni ka ikiaspkajtsï ka chéntsï. Tátsekuajtsïni uarhixapkia jirhinhantani ka sésijtsïni kurhanguchentani! Iámendu ambe jimbo xarharasti eska arhirperata no cha jimboespka.

¹² Jimajkani ima karakata nónemani xukakuekaxapti o kuájpekuekani. Diósïni japarini jucha uékaspka míteni náxantsïni kurhajchasïnki.

¹³ Jimbosïni jucha p'íjtsamaka engajtsï chájtu sési p'ikuarherantaka. Ka Títuni xéparini jucha sánderu tsípentaska, chájtsï Títuni sési karhoataska.

¹⁴ Nójtsïni k'uratsetaska jimboka ji Títuni arhispka eskajtsï cha kánekua mintsinharhikueska. Juchachkani iámendu ambe sési uandantasïnga ka ísï xarhantasti eskani jucha Títuni na arhirini jápka.

¹⁵ Ka sánderuksïni xénhchaxatiia, miántatini eskajtsï sési kurhajchaspka ka janhanharhintsï.

¹⁶ Tsípexaka jimbokajtsï iámu mintsinharhikueska.